Read anuak Edhikiel 41 Bible Online

Edhikiel 41 - anuak bible

Edhikiel 41

¹Køøre ŋatøgø aana kïth yi øt lam mana en kur keere na en wøk, ni røm odhïŋ deŋ dhi øtø løøi ki løøi, ni tïmge na gööye abïciel abïciel.

²'Ba dööŋ-ec mar dhi øtø manøgø bee gööye apaar, ni ö bär mar deŋ dhi øtø løøi ki løøi ni tïmge na gööye abïïc abïïc. Ni røm bär mar dï øtø manøgø bäre thuwø, ni tïme na gööye ma pïëraŋween, ni røm päl-ec mar dïëre ni tïme na gööye ma pïërariiø.

³Køøre ena døny yi-øtø mana en dïër ni røm odhïŋ deŋ dhi øtø løøi ki løøi, ni tïmge na gööye ariiø ariiø. 'Ba päl-ec mar dhi øtø bee gööye abïciel, ni ö bär mar deŋ dhi øtø løøi ki løøi ni tïme na gööye abïriiø abïriiø.

⁴Køøre eni bär mar dï øtø mana en dïër arøme, ni tïme na gööye ma pïërariiø, ni ö dööŋ yie ni näk gööye ma pïërariiø thuwø, ni røm ni tägi ka aŋuun øtø mana en wøk. Køøre ena köö jïra, ni «Kany beeye kanya en kur keere na pere leth døc.»

⁵Køøre eni odhïŋ dëër Øt Jwøk arøme, ni tïme na gööye abïciel. Ni røm yïth-øtø bëët moa no ocielø ki deŋ Øt Jwøk, ni tïm päl-ec marge na gööye aŋween.

⁶'Ba yïth-uudi moøgø ogeerø na tëëŋe adäk, ni man nø ena bäät wati, ni bäät tëëŋŋö man nø, yie da yïth-uudi ma pïëradäk, ni peedhe moge owïrö ki deŋ dëër Øt Jwøk bäre na mo piem yïth-øtø moøgø. 'Ba peedhe moøgø kär tïïö no orep dëër Øt Jwøk.

⁷'Ba yïth-øtø moøgø ni en deŋ Øt Jwøk bäre yøø, dööŋö mar yïthge tägi ki mana en maal ni cäätha piny ni therø. Kiper yi jöö mana geer yïth-øtø manøgø ki gø otïïö ni wetø ki tietge ni cäätha maal ni døøŋŋø. Kiper manøgønø, kany wø näk mo dhaanhø etha maal, yïth-øtø tïmö ni reegø. 'Ba da kwör tiel mo othørø ki dï øtø mo etha maal ki yie, ni tägi ka tëëŋ øtø mana en piny këël mana këët tëëŋŋe moa en maal.

⁸Køøre Øt Jwøk ajooda ni tiere othørø ki kïte ki deŋŋe bäre, ni beeye kïte moa cuŋ yïth-øtø bääte, ni bär mar maal mar kanya thør beeye gööye abïciel, ni beeye bär mar athøra.

⁹'Ba dëër øtø ki jï wøk mar yïth-uudi, odhïŋ mare bee gööye abïïc. 'Ba kanya laac na en yïthakic deŋ yïth-øtø mo Øt Jwøk,

¹⁰ki yïth-øtø mo dïlämme, dööŋ yie bee gööye ma pïërariiø, ni beeye kany mo deŋ Øt Jwøk ee wïrö bäre.

¹¹'Ba kaa ni laac enø, da dhøgi mo dønynya yïth øtø ki ge; dhøk maya ena jï løø wï-piny, ni ö maya ni en jï løø tier-piny. 'Ba kaa ni laac enø, dööŋ yie mar deŋŋe bäre bee gööye abïïc.

¹²'Ba da øtø mo ogeerø nyïm yi-kal mar Øt Jwøk ki jï løø kur pänh-cäŋ, mo dööŋ yie bee gööye ma pïërabïriiø. 'Ba odhïŋ dëër øtø manøgø ki deŋŋe bäre bee gööye abïïc, ni ö bärri mare mar piny ni näk gööye ma pïërabïŋween.

¹³Køøre eni Øt Jwøk arøme; ni joot bär mar piny mar gø na gööye ma dïpa, ni joot bär mar yi-kal mar Øt Jwøk ki dëër øtø maya na gööye ma dïpa thuwø.

¹⁴'Ba dööŋ-ec mar yi-kal mar Øt Jwøk ki jï løø kur tuul-cäŋ ki nyïm Øt Jwøk bäre, bee gööye ma dïpa.

¹⁵Køøre eni bär mar øtø mana en nyïm kal mar Øt Jwøk na en ŋää Øt Jwøk, arøme ni dwale ka uutjïëthe moa en deŋge, ni tïme na gööye ma dïpa. 'Ba øt lam mana en kur keere na en jï wøk, ki øt lam mana en dïër, ki yi-øtø mana en nyïm na dïët ki kal,

¹⁶këël ki dhøk uudi ka awëërnyeŋŋi moa therø, ki uutjïëthe moa no owïrö ki deŋŋe kiper yïth-øtø moa näk tëëŋŋe adäk, ki jammi bëët moa en deŋŋe, ki were mo dhi øtø, orämmö ko opämi. 'Ba dëëre ki yie orämmö ko opämi ki mana täge ki piny këël dhøk awëërnyeŋŋi; këël awëërnyeŋŋi thuwø orämmö.

¹⁷'Ba yi Øt Jwøk bäre, ki mano täge ki piny këël maal,

¹⁸dëëre ogöönnö ki kït nyïïatwiet maal mo wø cwøl ni kirubëlli, ki kït jer twöe. Ni kït jer twöe ogöörö ni ena yïthakic kirubël aciel man nø. 'Ba kirubël man nø jïre da täärnyïm ariiø.

¹⁹Täärnyïm mana näk otïïö kaamar täärnyïm dhaanhø, odïëdö ki jï løø kït jaath twöö kurciel, ni ö täärnyïm mana näk otïïö kaamar täärnyïm ŋuu, ni dïëdi ki jï løø kït jaath twöö kurciel maya, ni geno göörö na enøgønø ki dëër Øt Jwøk bäre.

²⁰'Ba ki mana täge ki piny këël maal bäät dhi øtø, kït nyïïatwiet maal mo wø cwøl ni kirubëlli ki kït jer twöe ogöör dëër øt lam mana en kur keere na en wøk.

²¹Øt lam mana en kur keere na en wøk, were moe otieŋø na dibal ma gïïŋŋe aŋween. Ni mana en dhi øt lam mana en kur keere na pere leth dïët ki maya.

²²'Ba da gïn wø cïp olämme bääte ma mar jaath, mo bär mare mar maal bee gööye adäk, ni ö bär mar yïthakic deŋŋi moe ni näk gööye ariiø. 'Ba deŋŋi moe, ki yie, ki teegi moe beeye jaath bäre. Køøre ŋatøgø aköö jïra, ni «Manøgø beeye tharabëëta man wø en nyïm Wuuö Jwøk.»

²³'Ba øt lam mana en kur keere na en wøk ki øt lam mana en kur keere na pere leth døc, dhøgi moge man nø okaa na ariiø.

²⁴Ni dhøk man nø da thäge ariiø mo jabi ki gø.

²⁵'Ba dhøk øt lam mana en kur keere na en wøk ogöörö ki kït nyïïatwiel maal man wø cwøl ni kirubël ki kït jer twöe kaawat moa no ogöörö dëër øtø, ni da jaath nyïm yi-øtø mana en nyïm mo orïïö maal.

²⁶'Ba deŋ dhi øtø da awëërnyeŋŋi mo therø mo deŋge ogöörö ki kït jer twöe. Ni beeye deŋ øtø mo Øt Jwøk ki dhøk øtø moe.