Read anuak Edhikiel 42 Bible Online

Edhikiel 42 - anuak bible

Edhikiel 42

¹Køøre ŋatøgø aana käle ki waŋjöö mana näk coonya yi-kal mana en jï wøk, ni kïth aani yïth-uudi moa näk raŋŋa rege ki yi-kal mar Øt Jwøk, ki yi-kal mana en jï wøk ki løø kur wï-piny.

²'Ba øtø manøgø dhøgi moe ena jï løø wï-piny, ni bär mare bee gööye ma dïpa, ni ö dööŋ yie ni näk gööye ma pïërabïïc.

³Øtø manøgø ogeerø na tëëŋŋe adäk, ni løøk aciel raŋŋa rege ki kanya laac na en yi-kal mana en dïër na näk dööŋ-ec mare gööye ma pïërariiø, ni løøk maya raŋŋa rege ki kanya laac yi-kal mana en wøk na näk opëënhnhö ki kïte.

⁴'Ba nyïm yïth-øtø da waŋjöö ki dïër mo dööŋ yie gööye apaar, ni bär mare gööye ma dïpa. 'Ba dhøk øtø manøgø ena jï løø wï-piny.

⁵'Ba yïth-øtø moa en tëëŋ øtø mar maal atïmö ni therø kiper kwör møøk atïmö rege na kwör wääth ni ba caal yïth-øtø moa en tëëŋ øtø mar piny ki dïër.

⁶'Ba yïth-øtø moa en dää tëëŋ øtø maal bäŋ cööthe jïge kaamar mo kal; kiper manøgønø, yïthge therø ni ba caal yïth-øtø moa en piny ki moa en dïër.

⁷'Ba da kal mo ogeerø ki wøk ki deŋ yïth-øtø ki nyïm dï kal wøk, mo bär mare bee gööye ma pïërabïïc.

⁸'Ba yïth-øtø moa en jï løø kal mana en wøk, bär marge bee gööye ma pïërabïïc, ni ö moa en jï løø Øt Jwøk ni näk gööye ma dïpa.

⁹'Ba deŋ yïth-øtø moa en tëëŋŋö mar piny, ki jï løø kur tuul-cäŋ, da dhøk man dønyø ki yie kany wø ö dhaanhe ki dïkal wøk.

¹⁰'Ba ki jï løø tier-piny yïthakic yi-kal mana en wøk ki yi-kal mar Øt Jwøk, da yïth-øtø yie.

¹¹'Ba yïth-øtø moøgø da waŋjöö yïthakicge kaamar yïth-øtø moa en jï løø wï-piny, ni bär marge ki dööŋ yïthge röömi. Ni uutjïëthe moa en nyïmge röömi, ni dhøgi moge thuwø otïïö na teeŋ aciel kaamar moa en jï løø wï-piny.

¹²Ni yïth-øtø moøgø man nø da dhøk jïre, ni døny yïthge ni öö ka dhøk mana en buut dhi kal ki jï løø kur tuul-cäŋ.

¹³Køøre ŋatøgø aköö jïra, ni «Yïth-øtø moa en jï løø wï-piny ki moa en jï løø tier-piny na dïët ki kal mar øt Jwøk beege kiper dïlämme, ni beege kwör wø ö dïlämme mo wø ci nyïm Wuuö Jwøk noo camge muuce yïthge moa en kur keerge na perge leth døc. Geni, muuce moa en kur keerge na perge leth døc cïba piny kwörögø, ni beege muuce mo beel, ki muuce mo wëën raay, ki muuce mo wëën bääyö ki ge, kiper kaagø ena kur keere.

¹⁴Kany wø näk dïlämme geno døny kaagø ni en kur keere enø, ge ba duu wøk ŋää kal na abïïk tïïc moge kärge wii yi øtø, kiper abïïe moøgø ena kur keerge. Geni, abïïe moa näk moge dwøga dëëtge; køøre nø, ge ööa wøk baŋ jiy.»

¹⁵'Ba ŋatøgø kanya lønye ki røm øtø mana en dïër, aana käl wøk ki dhøk mana en jï løø kur tuul-cäŋ, ni røm deŋ kal bäre ki wøk.

¹⁶Eni jï kuna en løø kur tuul-cäŋ arøme ka athøra, ni tïme na gööye ma dïpe abïïc mo athøra.

¹⁷Ni røm jï løø kur wï-piny, ni tïme na gööye ma dïpe abïïc mo athøra.

¹⁸Ni røm jï løø kur tier-piny, ni tïme na gööye ma dïpe abïïc mo athøra.

¹⁹Køøre nyïme aløø jï løø kur pänh-cäŋ ni røm gø, ni tïme na gööye ma dïpe abïïc mo athøra.

²⁰Kanyøgønø, ŋää kal arøme ki løøk moe moa na aŋween bëët, ni beeye kanya näk deŋŋe ocielø ki kal. 'Ba bär mare atïmö na gööye ma dïpe abïïc, ni tïm dööŋ yie na gööye ma dïpe abïïc. 'Ba kal manøgø pääŋŋa kanya näk ena kur keere na mar Jwøk ki kanya näk ba en kur keere.