Read anuak Edhikiel 44 Bible Online

Edhikiel 44 - anuak bible

Edhikiel 44

¹Køøre ŋatøgø aana cäŋ dwøk dhi kal mana en wøk na en jï løø kur tuul-cäŋ, ni beeye dhi kal mar Øt Jwøk bäre; 'ba dhi kal atïmö no odëëdö.

²Køøre Wuuö Jwøk aköö jïra, ni «Dhi kal man puta bëëtö no odëëdö ni ba jap, ni bäŋ dhaanhø mo dønyi ki yie këët, kiper Wuuö Jwøk, Jwø Icriel, onø dønyø ki yie. Kiper manøgønø, bëëde no odëëdö.

³'Ba bee dïbwödhi keere noo pï piny dhi gø kuna cäme nyïm Wuuö Jwøk. 'Ba eni dønyi ka dhøk mar yi-øtø mana en nyïm, ni duu wøk ki yi gø thuwø.»

⁴Køøre ŋatøgø aana käle ki dhi kal mana en jï løø wï-piny, ni kïth aani nyïm Øt Jwøk. 'Ba na lwïtha, ajiem Wuuö Jwøk aputa joot ni Øt Wuuö Jwøk ee pääŋö, ni puta dëëra leeŋ piny ni pädha ki bäp yia.

⁵Kanyøgø Wuuö Jwøk aköö jïra, «Wär dhaanhø, këël wïïï røk luup moi. Raŋï ki waŋï, ni cegï ïthï ki luup caana jïrï bëët ii kiper bëëtö mar Øt Wuuö Jwøk ki ciik moe; ni raŋŋï jiy døøc mo wø dunynyi ki mo wø døny wøk ki yi øt lam mana en kur keere ki man näk mo geno jïëö wala ge kär jïëö.

⁶Caanï jï jø Icriel ni wø bëëdö na jø ageem, ni man beeye luumma caan Kwäärö Wuuö Jwøki, ena köö, ‹Wui jø Icriel, wär yïthu thumge nø ki japa näk yia raac ki ge ni wø tïïyu!

⁷Uuni, japa näk yia raac ki ge bëët na tïïyu, bäätge acäŋu mëënnö ki mør, ni beeye ki mana kälu juurre moa path na näk kär daŋø ki yïth cwïnyge ki dëëtge ni kïthu ge yi øt lam mara na en kur keere, ni päätge øt lam mara kany wø cïpu ko olämme jïra, ni beege dwäle ki rem lääy, ni ö uuni ni raanynyu luumma tuuda.

⁸Uuni ki dëëtu, tïïc maru mana doo tïïö ki man gwøgu jammi 'moa na en kur keerge, käru tïïö; 'ba acïbu ceŋ jøøa path ni tïme ni tïïö geni yi øt lam mara na en kur keere.

⁹« ‹'Ba a na Kwäärö Wuuö Jwøk, luum caana jïïu bee en: Jøøa path, na näk kär daŋø ki yïth cwïnyge ki dëëtge, kär dee gø mo døny yi øtø mara na en kur keere, ni beege jøøa path bëët mo wø bëëdö dï jø Icriel.

¹⁰« ‹'Ba jø tuuŋ Libay moa tïïc karge ni bäär ki aani kanya ö jø Icrielli na wecge aani ni caathge køør kït gïï wø lamge, ajäla marge ojootge ki køør raay moge.

¹¹Geni, ge poot bëëdö ni ge tïïö yi øtø mara na en kur keere, ni ge gwøga dhøk kal mo Øt Jwøk ni ge tïïö yïthge; ni ge ŋädö ki lääy mo wø cïp no olämme mo wø waaŋ bäre ki teeŋ olämme møga mo wø cïp jiyi; ni ge cuŋŋö nyïm jiy ni ge tïnynya geni.

¹²'Ba kiper mana tïnyge jiy ni ge ena nyïm kït gïï wø lamge, ni wëëkge jø Icriel päth yïth raay, ennø, aana kööŋ na adïëri ki man jääla geni ki køør japa reyø na tïïcge. Luummögø caana aani, a na Kwäärö Wuuö Jwøk.

¹³Geni, ge ba nyänh buuta kuna tïnyge aani ni gena dïlämme, ni ge ba nyänh buut jammi 'moa na en kur keerge ki buut olämme 'moa moa en kur keerge na perge leth døc. Geni, geno jïti ki lään wïc ki køør japa näk yia raac ki ge na tïïcge.

¹⁴'Ba aani, ge poot cïba bäät tïïe mo wø tïïc yi Øt Jwøk, ni wëëkge jammi bëët tïïc yi Øt Jwøk.

¹⁵« ‹'Ba dïlämme, ni beege jø tuuŋ Libay na käl ri dhi øt Dhadök, na wara tïïc tïïe na karge yi øt lam mara na en kur keere kanya bëët jø Icrielli naa ege wiiø, geno nyänh buuta kuna tïnyge aani, ni cuŋge nyïma ni cïpge ko olämme mo dwäle ki rem mo lääy. Luummögø caana aani, a na Kwäärö Wuuö Jwøk.

¹⁶Jøøgø keerge beege noo døny yi øt lam mara na en kur keere; ni beege keerge noo nyänh buut tharabëëta mara kuna tïnyge aani ni wëëkge jammi 'moa tïïc.

¹⁷« ‹'Ba kanyo wäro dunyge ki dhøk kal mana en dïër, wär rucge ka abïïk lïïna; kärge ruyö ka abïïk jïëc rööm kany wø näk mo ge tïïö dhøk kal mana en dïër wala yi Øt Jwøk.

¹⁸Geni, wïthge wär mëënge ka abïïk lïïna ni runyge dëëtge ki libaae mo abïïk lïïna. Kärge ruyö ki teeŋ abïï mo wëëga dëëtge cöödö ki kwäk.

¹⁹'Ba kanyo wäro dønyge yi kal mana en wøk kany wø bëët jiyi yie, abïïk tïïc moa tïïge ki ge na en dëëtge wär kälge wøk ni wiige ge yïth-øtø moa en kur keerge, ni dwøkge abïïe moge dëëtge, nee bëët waany marge na en kur keere ba pööth bäät jiy møga ki køør abïïe moøke.

²⁰« ‹'Ba geni wïthge kär lielge, ni ba wecge jïëcge nee piithge ni bäyö; 'ba jïër moge wär nyaarge ni ena dïër jaak.

²¹Ni bäŋe dïlämi mo mäthi ki køøŋø kany wø näk mo eni dunynya yi kal mana en dïër.

²²Ni bäŋe gø mo nyöömmi ki cï thøø wala dhaagø mo opää ki cwøre; 'ba ge doo nywøma nyïïakuk Icriel moa näk dëët cwøw poot kucge ki määr dïlämme moa näk cwøwge othøw.

²³Geni jiya wär pwönyge ki man ŋäcge gïn mo ena kur keere na mar Jwøk ki gïn mo ba en kur keere, ni ŋäcge gïn mo waany ki gïn mo ba waany.

²⁴« ‹'Ba kany wø näk da pïëm mo tägö, dïlämme wär tïïge ni gena jø ŋøl luup, ni ŋølge luup ki køør ciik 'moa. Geni, ciik 'moa ki luup moa caana bëët kiper ajwöm mo wø wøør ki yi cwiir wär gwøkge, ni gwøkge cääŋŋe mo jwöm 'moa ni ena kur keerge.

²⁵« ‹'Ba dïlämme kär dëëtge tïïcge ni ba waany ki man cige buut dhaanhø mo othøw; 'ba ni näk mo thøwa wänni, wala menni, wala wääde, wala nyaare, wala coki ma dïcwøø, wala coki ma dhaagø mo poot kär nywømø, løny jïre ki man ci buut gø ni tïm dëëre ni ba waany.

²⁶'Ba ni näk mo dëëre ee cäŋ dwøk kare ni waany, manynya gø nee kure ki nïne abïriiø, ni ba ci baŋ tïïc yi Øt Jwøk.

²⁷'Ba eni, dïcäŋo døny yi kal mana en dïër mar øt lam mana en kur keere ni cøøa baŋ tïïc yi øt lam manøgø, eni wär cïpe ko olämi mar wëën raay kiper dëëre. Luummögø caana aani, a na Kwäärö Wuuö Jwøk.

²⁸« ‹'Ba kiper luum ŋöömö mana doo dööŋ jïge na marge, bee aani noo dööŋ jïge naa caala ŋöömö mana doo dööŋ na kurge. Kär geni mooyu ki ŋöömö yi ŋööm Icriel; aano dööŋ jïge naa caala ŋöömö mana doo dööŋ na kurge.

²⁹Geno cämö ki beel mo wø cïp na muuce, ko olämme mo wø cïp na mo wëën raay ki mo wø cïp na mo wëën bääyö ki ge; ni ö jammi bëët moa näk ocïp kur keerge na 'moa dï Icriel ni tïmge na moge.

³⁰Nyïïjenni moa beyø ki røk nyïëdi bëët mo wø kwøŋ ŋweelø, ki muuce moa beyø røk muuce mou bëët mo wø cïpu, tïmö na mo dïlämme. Ge wär mooyu ri kwön marra ra abäy mo wø kwøŋ ciek; køøre nø, gwïëth dunynya paac maru.

³¹Dïlämme kär cämö ki wenyø wala lääy mo thøwa eni keere, wala baga lääyi mør.