Read anuak Edhikiel 48 Bible Online

Edhikiel 48 - anuak bible

Edhikiel 48

¹«'Ba moi beege nyeŋ mo wïth tuŋi mo jø Icriel ki jöö mano pääŋge ŋöömö ki gø: Ki mano täge ki jï løø kur wï-piny ki deŋ jöö mar Ëthlön mano ci Lïbö-Amath, këël mano këët Adhar-Enan waŋ keew ki Damacka, ni put døø ki jï løø wï-piny ki deŋ Amath, ni beeye ki mano täge ki jï løø kur tuul-cäŋ këël jï løø kur pänh-cäŋ, beeye ŋöömö mano cïp jï jø tuuŋ Daan na kurge.

²«'Ba jø tuuŋ Acer, løøk aciel mana kïïö ki ŋööm jø tuuŋ Daan wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

³«'Ba jø tuuŋ Naptali, løøk aciel mana kïïö ki ŋööm jø tuuŋ Acer wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

⁴«'Ba jø tuuŋ Maneeca, løøk aciel mana kïïö ki ŋööm jø tuuŋ Naptali wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

⁵«'Ba jø tuuŋ Ipariem, løøk aciel mana kïïö ki ŋööm jø tuuŋ Maneeca wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

⁶«'Ba jø tuuŋ Ruben, løøk aciel mana kïïö ki ŋööm jø tuuŋ Ipariem wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

⁷«'Ba jø tuuŋ Juuda, løøk aciel mana kïïö ki ŋööm jø tuuŋ Ruben wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

⁸«'Ba ŋöömö mana kïïö ki ŋööm jø tuuŋ Juuda, ki mano täge ki jï løø kur tuul-cäŋ këël mano këët jï løø kur pänh-cäŋ, beeye ŋöömö mano cïbu kur keere na mar Jwøk. 'Ba dööŋ yie wär tïme na gööye ma kume ma pïërariiø ka abïïc, ni bär mare ki mano täge ki jï løø kur tuul-cäŋ këël mano këët jï løø kur pänh-cäŋ dïët ki ŋöömö mano cïp jï jø wï tuuŋ man nø. 'Ba Øt Lam mana en kur keere wär tïme ni ena dïëre.

⁹«'Ba thääŋ ŋöömö manøgø nou cïbu kur keere na mar Wuuö Jwøk enø, bär mare wär tïme na gööye ma kume ma pïërariiø ka abïïc, ni ö dööŋ yie ni tïme na gööye ma kume apaar;

¹⁰ni beeye ŋöömö mana en kur keere mano cïp jï dïlämme na kurge. 'Ba bär mare ki jï løø wï-piny wär tïme na gööye ma kume ma pïërariiø ka abïïc, ni ö dööŋ yie ki jï løø kur pänh-cäŋ ni tïme na gööye ma kume apaar. 'Ba dööŋ yie ki jï løø kur tuul-cäŋ wär tïme na gööye ma kume apaar, ni ö bärri mare ki jï løø tier-piny ni tïme na gööye ma kume ma pïërariiø ka abïïc. 'Ba Øt Lam mana en kur keere na näk mar Wuuö Jwøk wär tïme ni ena dïëre.

¹¹'Ba ŋöömö manøgø otïmö ni beeye kany bëët dïlämme yie moa näk dëëtge ege cïp kur keerge na mo Wuuö Jwøk, ni beege nyïïkwaac Dhadök, jøøa näk dëëtge ege cïbö na kare ki man tïnyge aani, ni ge kär gaa wøk keda mana tïïc jø tuuŋ Libay kanya ö jø Icrielli na gaage wøk.

¹²Ŋöömö manøgø otïmö na muuy mana pere leth mano cïp jïge na kurge ki ri ŋöömö mana en kur keere, ni beeye ŋöömma en kur keere na pere leth døc na kïïö ki ŋööm jø tuuŋ Libay.

¹³«'Ba deŋ ŋöömö mar dïlämme, jø tuuŋ Libay ge di mooø yie ki ŋöömö mo bär mare beeye gööye ma kume ma pïërariiø ka abïïc, ni ö päl yie ni tïme na gööye ma kume apaar. 'Ba bär mare bäre wär tïme na gööye ma kume ma pïërariiø ka abïïc, ni ö dööŋ yie ni tïme na gööye ma kume apaar.

¹⁴'Ba ŋöömö manøgø kär gathge wala ki man wiilge gø. Ŋöömö manøgø beeye ŋöömö mana pere letha eni ki ri ŋööm Icriel bäre, ni ba beer ki man wëëgi dhaanhø mør, kiper ena ŋöömö mo ocïp kur keere jï Wuuö Jwøk.

¹⁵«'Ba thääŋ ŋöömö mano dööŋ wøk ri ŋöömmögø, dööŋ yie wär tïme na gööye ma kume abïïc, ni ö bärri mare ni tïme na kume ma pïërariiø ka abïïc, ni beeye ŋöömö mano ö päänynyi noo køny ree ki gø na kany geer uudi yie ki kar kwaath; ni ö päänynyi ni tïme ni ena dïëre.

¹⁶'Ba rumme mo deŋ ŋöömmögø wär tïmge ni beege ii: Deŋŋe mana en jï løø wï-piny wär tïme na gööye ma kume aŋween ki dïpe abïïc, ni ö deŋŋe mana en jï løø tier-piny ni tïme na kume aŋween ki dïpe abïïc, ni ö deŋŋe mana en jï løø kur tuul-cäŋ ni tïme na kume aŋween ki dïpe abïïc, ni ö deŋŋe mana en jï løø pänh-cäŋ ni tïme na kume aŋween ki dïpe abïïc thuwø.

¹⁷'Ba kar kwaath kiper jø pääny, rumme mo deŋŋe ki jï løø wï-piny wär tïme na gööye ma dïpe ariiø ki pïërabïïc, ni ö deŋŋe mana en jï løø tier-piny ni tïme na gööye ma dïpe ariiø ki pïërabïïc, ni ö deŋŋe mana en jï løø kur tuul-cäŋ ni tïme na gööye ma dïpe ariiø ki pïërabïïc, ni ö deŋŋe mana en jï løø kur pänh-cäŋ ni tïme na gööye ma dïpe ariiø ki pïërabïïc thuwø.

¹⁸'Ba ŋöömö mano dööŋ wøk ki deŋ ŋöömö mana en kur keere, bär mar deŋŋe ki jï løø kur tuul-cäŋ wär tïme na gööye ma kume apaar, ni ö bär mar deŋŋe mana en jï løø kur pänh-cäŋ ni tïme na gööye ma kume apaar thuwø; ni ö jammi mo wø ciek yie ni tïmge na cam kiper jø wø tïïö yi pääny.

¹⁹'Ba jiy moo ööi ki pääny noo puur gø wär tïmge ni beege jiy mo käla røk tuŋi bëët mo Icriel.

²⁰Ŋöömö manøgø bäre na cïp kur keere beeye ŋöömö ma deŋŋe aŋween; 'ba bär mar yïthakic deŋŋi moe wär tïme na gööye ma kume ma pïërariiø ka abïïc. Ni manøgø beeye thääŋ ŋöömö mana cïp na mar Jwøk, ge ki ŋööm pääny bäre.

²¹«'Ba ŋöömö mano dööŋ wøk na aŋuudi ki deŋ ŋöömma en kur keere ki ŋööm pääny, wär tïme ni beeye mar dïbwödhi mar paac. Ni ö bär mare ni tïme na gööye ma kume ma pïërariiø ka abïïc, ni beeye ki mano täge ki jï løø kur tuul-cäŋ mar ŋøøpa en kur keere këël mano cør keew mana coony jï løø kur tuul-cäŋ, ni cäŋ tägö ki jï løø kur pänh-cäŋ këël mano cør keew mana coony jï løø kur pänh-cäŋ, ni kïïö ka ŋøøm mo wïth tuŋi mo jø Icriel; ni bär mare ki jï løø kur pänh-cäŋ thuwø poot na gööye ma kume ma pïërariiø ka abïïc. 'Ba ŋöömö manøgø wär tïme ni beeye mar dïbwödhi mar paac, ni ö ŋöömma en kur keere ki Øt Lam mana en kur keere ni tïme ni ena dïëre.

²²Kiper manøgønø, ŋööm jø tuuŋ Libay ki ŋööm pääny otïmö ni ena dï ŋöömö mar dïbwödhi mar paac. 'Ba ŋöömö manøgø na mar dïbwödhi mar paac enø, otïmö ni ena yïthakic ŋööm jø tuuŋ Juuda ki ŋööm jø tuuŋ Benjamen.

²³«'Ba jø wïth tuŋi møga, ŋöömö marge wär cïp jïge na ennønø: Jø tuuŋ Benjamen løøk aciel wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

²⁴«'Ba jø tuuŋ Cimien, løøk aciel mana kïïö ki ŋööm jø tuuŋ Benjamen, wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

²⁵«'Ba jø tuuŋ Icakar, løøk aciel mana kïïö ki ŋööm jø tuuŋ Cimien, wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

²⁶«'Ba jø tuuŋ Dhebulan, løøk aciel mana kïïö ki ŋööm jø tuuŋ Icakar, wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

²⁷«'Ba jø tuuŋ Gaat, løøk aciel mana kïïö ki ŋööm jø tuuŋ Dhebulan, wär cïp jïge na kurge, ni beeye ki mano täge ki jï løø kur tuul-cäŋ këël mano këët jï løø kur pänh-cäŋ.

²⁸«'Ba ŋööm jø tuuŋ Gaat ki jï løø tier-piny, tägi ka Tamar këël mana këët naam Meriba-Kadëc, ni put cør waŋ naam Ijep, këël mana pïïe bäät naama dwøŋ.

²⁹«Manøgø beeye ŋöömö mano pääŋŋï jï wïth tuŋi mo Icriel ki køør ŋïïce mo wø tïïc na nyuuthe nee dööŋe jïge na moge; ni kwörögø bëët beege kwöro pïï jï jø tuuŋ man nø na kurge. Luummögø caana aani, a na Kwäärö Wuuö Jwøk.

³⁰«'Ba dhøgi mo kiir mar pääny wär pääŋŋï na ennønø: Deŋŋi mo kiir moa näk aŋween na näk yïthakicge da rumme ma kume aŋween ki dïpe abïïc,

³¹dhøk kiir moa en yïthge wär cak ki nyeŋ wïth tuŋi mo jø Icriel. Dhøgi adäk moa en deŋ kiir mana en jï løø wï-piny wär tïme ni bee dhi kiir mar Ruben, ki dhi kiir mar Juuda, ki dhi kiir mar Libay.

³²«'Ba deŋ kiir mana en jï løø kur tuul-cäŋ, na näk bär mare rumme ma gööye ma kume aŋween ki dïpe abïïc, dhøgi adäk moa en yie wär tïme ni bee dhi kiir mar Jocep, ki dhi kiir mar Benjamen, ki dhi kiir mar Daan.

³³«'Ba deŋ kiir mana en jï løø tier-piny, na näk bär mare rumme ma gööye ma kume aŋween ki dïpe abïïc, dhøgi adäk moa en yie wär tïme ni bee dhi kiir mar Cimien, ki dhi kiir mar Icakar, ki dhi kiir mar Dhebulan.

³⁴«'Ba deŋ kiir mana en jï løø kur pänh-cäŋ, na näk bär mare rumme ma gööye ma kume aŋween ki dïpe abïïc, dhøgi adäk moa en yie wär tïme ni bee dhi kiir mar Gaat, ki dhi kiir mar Acer, ki dhi kiir mar Naptali.

³⁵«'Ba kiir pääny manøgø noo rømi ki deŋŋe bäre ni di wïrö, tïmö na gööye ma kume apaar ka abära. «'Ba nyeŋ pääny manøgø ki mano täge ki dïcäŋöca, ocwøl ni WUUÖ JWØK ENA YIE.»