Read anuak Edhikiel 7 Bible Online

Edhikiel 7 - anuak bible

Edhikiel 7

¹'Ba dwør Wuuö Jwøk aö bääta ni kööe,

²ni «Wär dhaanhø, luumma caan Kwäärö Wuuö Jwøki kiper ŋööm Icriel bee en, ena köö, ni ‹Man beeye aŋuudi! Aŋuun nïne aö bäät wïth tuk piny karge ŋweeri mo ŋööm Icriel.

³Ennø, aŋuun bëëtö maru aløny ni öö. Aani, wëër mara jääŋŋa jääŋŋö bäätu; luup mou ŋøla ŋølø ki køør uutjïëthe mou, ni ö gïïa raac eci ki ge na tïïyu bëët ni dwøga ge wïthu.

⁴Aani, cwïnya ba pädhi ki gïru, ni ba wara cwïnya ki uuni; 'ba aani, u jääla jäälö ki køør bëëtö maru ki japa raac yia ki ge na en dïïu. Køøre nø, ŋäyu ŋääö ni bee aani na Wuuö Jwøk.›

⁵«'Ba man beeye luumma caan Kwäärö Wuuö Jwøki, ena köö: Gïn mo leth aöö! Gïn mo leth mo poot kär wïnyö cøøn aöö!

⁶Aŋuun nïne aöö! Aŋuun nïne anø öö! Aløny ni tägö ki man käl ränynyö bäätu; anø öö!

⁷Ajäla maru aö baŋu, u ni bëëdö yi ŋöömmi en! Kanya wäŋŋi aløny ni öö; cäŋa wäŋŋi kare cään. 'Ba otïmö ni nuta oduuru bäät kïte ni patha kwöŋŋö ki met ec.

⁸Aani, ki kany mo cään, wëër mara kønynya bäätu, ni liel cwïnya ki uuni døc; ni ŋøla luup mou ki køør bëëtö maru, ni ö gïïa raac eci ki ge na tïïyu ni dwøga ge wïthu.

⁹Aani, cwïnya ba pädhi ki gïru, ni ba wara cwïnya ki uuni; 'ba aani, u jääla jäälö ki køør bëëtö maru ki japa raac eci ki ge na en dïïu. Køøre nø, ŋäyu ŋääö ki man näk mo beeye aani na Wuuö Jwøk na jääl uuni.

¹⁰«Ka adïëri møn, cäŋöca beeye en! Ena nø öö! Cäŋ man jääl uuni yie aløny ni öö; wëër mano ö bäätu anø tägö ki man nyooth ree; atöör anø døøŋŋø bäätu.

¹¹Okiera anø døøŋŋø ni døøa røk jøøa reyø kaamar athøra mo pwöta ge ki gø. Bäŋ dhaanhø mo wec rege, wala røk lwaae moge, ni bäŋ jap kwär moge mo wec wala gïn mo pere leth jaak mo ena dïge.

¹²Kanyaca anø öö, cäŋöca anø pïï. Jø wø ŋëëö ki jammi kär yïthge mïnnö, ni ö jø wø gädhö ni ba kïmge, kiper wëër mano ööi ööa bäät lwaak bäre.

¹³Kiper bäŋ dïgädhi këët mo døø baŋ japa näk ee dwøk pwödhö këël aŋuun kwøw mare, kiper luum ajäla mana nyooth ööa bäät lwaak bäre ni ba kääŋi; 'ba kiper raay moge, bäŋ aciel dïge mo jwïëye di piemø.

¹⁴'Ba këël tuŋi dege koodhø ni jiiŋge jammi bëët, bäŋ dhaanhø aciel dïge mo ci baŋ leny, kiper wëër mara ena bäätge bëët.

¹⁵«Opëëllö otïmö ni ena wøk töök kiir, ni ö täwi ki käc ni en yi kiir. Ŋato en yi pwödhö onäk ko opëëllö, ni ö jø wø en yi kiir ni thööri ya täwi ki käc.

¹⁶'Ba moo bøth ki thøø noo reŋi, geno tïmö ni ge bëëdö bäät kïte, ni ge jwöŋö kaamar akuyi yïth aleye, ni ŋati man nø jwøga raay moe.

¹⁷Ceŋge oniläp bëët, ni ö nyeŋ cøkge ni øcge piny kaamar pïï.

¹⁸Geni, keece orøcge na abïïe ni bëët dëëtge ni kwanynyi ki lwär; wïthge otïmö ni laay bëët, ni ö wïthge ni gwääri wøk bëët.

¹⁹Gwet-bïrö moge oleeŋge nyeŋ jïëthe, ni ö warkie moge ni tïmge kaamar gïn mo ba waany. Gwet-bïrö moge ki warkie moge otïmö ni bäŋ køny mo tïïcge kiperge kanyo tïme na ri cäŋ wëër mar Wuuö Jwøk. Japøge ba cïpi ki jäŋ jïge wala yïthge päŋ ki ge, kiper beege japa wëëk geni päth yïth raay.

²⁰Gena töödö kiper jap mïërö moge, ni dëëtge kønyge kønyø ki ge ki man tïïcge kït gïï wø lamge na näk yia raac ki ge. Kiper manøgønø, aani japøge tïïa tïïö jïge kaamar gïn mo ba waany.

²¹Japøge cïba ceŋ jøøa path ki jø piny moa reyø nee twierge, ni ö geni ni päätge ge.

²²Aani täärnyïma oløøa wøk bäät jø Icriel, ni ö jøøa pathi ni päätge kar bëëtö mara na pere leth, ni put kuuwe døny yi gø thuwø ni päätge gø.

²³«Jiiŋ tiimme, kiper piny apäŋ ki jø wø køny rem jiy piny, ni ö päänynyi ni pääŋe ki jø okiera.

²⁴Aani, a kännö ki wï jur mana näk raac døc, nee öge kuna lwørge mïëri mo jøøgø; aani, a ööa kuna raanynya atöör mar jøøa teek, ni ö kwör lam moge na en kur keerge ni wëëga ge nipäät.

²⁵'Ba kanyo ö lwärri bäätge, bëët mëër omanyge, 'ba otïmö ni bäŋgø.

²⁶Jammi mo leth otägi ni rege döötge döötö, ki waae mo ööi ni rege lwöbö, ni ö geni ni manyge luup mo wø nyooth ki baŋ nyikuk Jwøk; 'ba otïmö ni bäŋ ciik ki baŋ dïlämme, ni bäŋe pwöc ki baŋ jø døøŋŋø.

²⁷Nyeya okïmmi, ni ö jø kööre moe ni rïïŋ dëëtge ki lwär; 'ba jø paac bëët bäätge opädhi. Aani luup moge oŋøla ki køør bëëtö marge, ni jääla geni ki køør mana tïïcge. Kanyøgø nø oŋäcge ni bee aani na Wuuö Jwøk.»