Read anuak Edhikiel 8 Bible Online

Edhikiel 8 - anuak bible

Edhikiel 8

¹'Ba kanya tïme na ri bïcier cwiiri, ni nïr dwää abïciel abïïc, ni beege cwiiya beetwa ni waano maa ki tøŋ, kanya ena yi øtø mara ni aano pï piny ni jø døøŋŋø mo Juuda geno pï piny nyïma, cer Kwäärö Wuuö Jwøk aö bääta kaace.

²'Ba kanya lwïtha, gïn mo kede dhaanhø aputa joot. 'Ba eni ki mana täge ki piere këël piny nëëni kaamar maac. 'Ba ki mana täge ki piere këël wïïe nëëni ni wärri kaamar nywïënyö mo ena yi maac.

³Kanyøgø gïn mo bëëdö kede cere arwiee ni mak aani ki gø ki jïëc wïïa; ni ö Jwïëc Jwøki ni put a tïŋ maal yïthakic piny ki maal; ni kïth a Jerucalem ki ri gïï wø nyooth Jwøki ki yi wïc, ni kïth a dhi kal mana en jï løø wï-piny mar kal mana en dïër, kanya näk ocöönhnhö ki kït gïn wø lam na käl këëny cwïny jï Wuuö Jwøk.

⁴'Ba ka adïëri møn, ajiem Jwø Icriel aputa joot nyïma kaace, ni beeye teeŋ ajiem mo caala mana kwøŋ nyooth jïra bäät naam Kebar.

⁵Køøre ena köö jïra, ni «Wär dhaanhø, lwïthï jï løø wï-piny.» Kanyøgø na lwïtha jï løø wï-piny, kït gïn wø lam manøgø na käl këëny cwïny jï Wuuö Jwøk aputa joot dhi kal man wø døny baŋ gïn wø cïp olämme bääte.

⁶Køøre ena cäŋ köö jïra, ni «?Wär dhaanhø, japi ni raac eci døc ki ge ii na tïïc jø dhi øt Icrielli kany en, ni beege japo tïïc aani naa tïma ni kara bäär ki øtø mara na en kur keere, nëënö jïrï? 'Ba ïïni, ï cäŋa jïtö ki jammi mo ec raac ki ge døc mo kaala moi.»

⁷Køøre aana käle ni kïth a dhi kal. 'Ba kanya lwïtha, aana jïtö ki kany mo ŋaam dëër kal.

⁸Køøre ena köö jïra, ni «Wär dhaanhø, cäŋ kanya ŋaam dëër kal koonynyø.» 'Ba kanya koonya gø, aana tuc wøk ni jïta ki dhi øtø mør.

⁹Køøre ena köö, ni «Ciï ni raŋï japø ni reyø na näk ec raac ki ge ni ege tïïö kaa enø.»

¹⁰Kanyøgø aana dønyø ni puta dëër øtø manø bäre joot no ogöörö ki kït gïï wø muuli ki piny, ki kït lääy mo reyø, ki kït gïï mo määnö, ki kït gïï wø lam bëët mo jø dhi øt Icriel.

¹¹'Ba nyïm gïïögø da jø døøk dhi øt Icriel ma pïërabïriiø mo cuŋŋö yie. 'Ba Jaadhania o Capan ena dï jø døøgøgø ni cuŋŋö thuwø; ni ŋati man nø dëëtge cere da gïn wø duuŋ gïn wø jïye ŋwääi ni met yie; ni gïn wø jïye ŋwääi ni met bëëdö ni duuŋ ceŋge yïth gïïögøøni.

¹²Kanyøgø Wuuö Jwøk aköö jïra, ni «?Wär dhaanhø, gïn ni tïïc jø døøk dhi øt Icriel yi muudhö en, ni ŋati man nø ena øt kït gïï wø lame, nëënö jïrï? Kiper gena köö, ni ‹Wuuö Jwøk wa ba nëëni jïre; Wuuö Jwøk ŋöömö marwa awiie.› »

¹³Ni cäŋ köö jïra, ni «Ge cäŋï ka jootø ni ge tïïö ki gïï wø raac eci ki ge døc mo kaala man.»

¹⁴Køøre Wuuö Jwøk aana kïth dhi kal mana en jï løø wï-piny ki øt Wuuö Jwøk, ni puta jïtö ka apoole mo jwöŋö kiper jwøk mo othøw mo cwøl ni Tamudh.

¹⁵Køøre ena köö jïra, ni «?Wär dhaanhø, gïn nëënö jïrï? Ï poot jïtö ki gïï wø raac eci ki ge døc mo kaala man.»

¹⁶Køøre eni aana kïth yi kal mana en dïër mar øt Wuuö Jwøk. 'Ba dhi øt Wuuö Jwøk kaace yïthakic agööla ki gïn wø cïp olämme bääte, da cwøw mo jïtö ki pïërariiø ka abïïc mo ŋäthge ege løø baŋ øt Wuuö Jwøk ni nyïmge ege løø jï kur tuul-cäŋ, ni cøŋge ege këël piny ni rege kemø ki cäŋ ni ge lama gø.

¹⁷'Ba Wuuö Jwøk aköö jïra, ni «?Wär dhaanhø, gïn ee, nëënö jïrï? ?Aŋø, bee gïn mo jööt jaak ki baŋ jø dhi øt Juuda ki man tïïge ki gïï wø raac yia ki ge kany, ni piny ege pääŋö ki tïïe mo raay ni ge wëëga aani gootø cooth? Raŋ ge mø, ge tïïö ki jap abuua!

¹⁸Kiper manøgønø, a wëër ki geni. Cwïnya ba pädhi ki gïrge këët, ni ba wara cwïnya ki geni. Ge këël doo jwöŋö deŋ ïtha ni döötge ena maal, aani ïtha ba ciia ko oduuru marge.»