Read anuak Daniel 1 Bible Online

Daniel 1 - anuak bible

Daniel 1

¹'Ba kanya tïme na ri dää cwiiri moa beet Jeyöakëmmi ni ena nyeny Juuda, Nabukedenecör nyeny Babiløn aö Jerucalem ni ciel gø dïër.

²'Ba Kwäärö Wuuö Jwøk Jeyöakëm nyeny Juuda acïp cer Nabukedenecör ki jap Øt Jwøk møøk, ni ö Nabukedenecörri ni kïth geni yi ŋööm Cinaar[1] yi øt jwøe, ni kïth jap Øt Jwøk kar kän yi øt jwøe.

³Køøre nyeya ma Nebukedenecör, Acpenath na bëëdö na wïth jø kööre moe aköömme ki man lwöte ki jø Icriel møøk røk jø dhi øt nyeya, ki røk dhøk uudi mo dïbwöthe,

⁴ni beege wøpe mo bäŋ möönynyö dëëtge, mo mïërö, mo wïthge kwel ni wïthge leer, mo nyeŋge reegø ki kwänynyö, ni tiet luup laara ci wïthge, mo orømø ki man tïïge paan dwøŋ. Ni tïïc geni nee pwönynyi ki göör luubö, ki dhøk mar jø Kaldia.

⁵Køøre nyeya acïp piny jïge ki cam ki køøŋø kiper yi cäŋ cooth ri cam mare ki ri køøŋø man wø maadhe, ni cïpe ki dwøl nee ge pwönynyi ki cwiiri adäk; køøre nø, ge tïmö ni ge tïnynya nyeya.

⁶'Ba ki røk jøøgø, jø Juuda beeye Daniel, ka Ananiya, ki Micaël, ka Adhariya.

⁷Køøre ŋata bëëdö na wïth jø kööre acïpö ki nyeŋ mo nyään jïge; nyeŋ mana cïbe kiper Daniel beeye Belthacacör, ni mar Ananiya beeye Cidarak, ni mar Micaël beeye Micak, ni mar Adhariya beeye Abedenagø.

⁸'Ba Daniel acuuŋö ki cwïnye ni eni dëëre ba dee døøc mo ba waany ki cam mar nyeya ki køøŋø man wø maadhe. Kanyøgø eni ŋata bëëdö na wïth jø kööre akwaae kiper nee eni wec ki man ba døøc dëëre mo ba waany ki jöö manøgø.

⁹Kanyøgø Jwøk ŋata bëëdö na wïth jø kööre atïïe nee met ec mare ki mëër mare nyoodhe jï Daniel.

¹⁰'Ba ŋata bëëdö na wïth jø kööre aköö jï Daniel, ni «Aani, a lwäär ki kwääya ma nyeya, eni na cïp piny jïïu ki cam ki gïn maathu. ?Aŋø, per nee nyïmmu joode ni nëëni no oniköök ni ba caal nyïm wøpe moa näk tïëŋu? 'Ba u tïïya aani nee wïïa ŋul nyeya wøk.»

¹¹Køøre Daniel acäänö ki ŋat koor mana kwany ŋata bëëdö na wïth jø kööre, ŋat mo koora eni na Daniel, ka Ananiya, ki Micaël, ka Adhariya, ni kööe,

¹²ni «Ïïni, wa ni en cerï ii, pääny wa ki nïne apaar, ki man mooyï wa ko omarø nee camwa ki pïï mo maathwa.

¹³Køøre nø, dëëtwa raŋï raŋø niï päära gø ki dëët wøpe moa bëëdö ni cama cam mar nyeya. Køøre nø, ki køør mano jootï, gïno tïïyï ki wa ni en cerï ennø, tïïyï tïïö.»

¹⁴Kanyøgø ena put jïëy ki marge, ni pääny geni ki nïne apaar.

¹⁵'Ba kanya thum nïne apaarri, dëëtge anëënö ni pulli ni beyø geni ni kaala dëët wøpe bëët moa bëëdö ni cama cam mar nyeya.

¹⁶Kanyøgø ŋat koor manøgø cam mar nyeya mana dege camø ki køøŋø mana dege maadhø aput wec ni put bëëdö ni cïpa omarø jïge.

¹⁷'Ba wøpe moø na aŋween yøø, gena mooc Jwøki ki kwänynyö, ni tiet luup kwänynyö bëët moa no ogöör piny cøøa wïthge. Ni ö Danielli ni tïme ni løny jïre ki man ŋäc tiet jammi bëët mo wø nyooth ki yi wïc ki yïth lääk.

¹⁸'Ba kanya thum nïne moa kwaan nyeya ma Nabukedenecör ki man ö jøøgø nyïme, ŋata bëëdö na wïth jø kööre jøøgø akäl nyïm nyeya.

¹⁹'Ba kanya cään nyeya ki geni, ki røk jiy bëët ajoode ni bäŋ dhaanhø mo caala Daniel ka Ananiya ki Micaël ka Adhariya. Kanyøgø gena put tïmö ni ge tïnynya nyeya.

²⁰'Ba jöör leec wïc bäre ki jöör ŋäc tiet luup moa ö nyeya na pëëny geni ki ge bëët, ajoode na ajuuk ki jø wø nyeŋge reegø ni wø pëënynye yi po nyec mare bäre ege kaalø kwöre apaar.

²¹'Ba Daniel aput bëëtö këël mana pïïe cwiir mana dïkwøŋ mana tïm Kiröci na nyeya yie.