Read anuak Daniel 12 Bible Online

Daniel 12 - anuak bible

Daniel 12

¹«'Ba noo tïme na kar kaace, Mikaël, eni na nyïïatwiel maal mana dwøŋ ni wø koor jø pou ma jø Icriel, dëëre di thïïŋö. 'Ba kar kaace tïmö na kar jwør gïï mo leth, na gïï mo poot kär kwøŋ tägö cøøn ki mana täge ki kanya täk wï jur këël kar kaace. 'Ba kar kaace jø pou moo nyeŋge joot no ogöör piny yi wëëlö, ge di piemø.

²'Ba jiy mo thööth moa no othøw no okoony piny yi ŋöömö, ge päy, ni møøk cøøa yi kwøw mana näk bëëdö na bäre bäre, ni møøk cøøa kar lään wïc ki kar ataa mo bëëdö na bäre bäre.

³'Ba jiy moa wïthge leer ge rieny ni caala tar mar maal. Ni ö jø wø bwøth jiy mo thööth jöör bëënynyö ni rienyge kaamar ceer na bäre bäre.

⁴'Ba ï na Daniel en, cïëk luup moa en yi wëëlö ni mwönï gø, këël kanyo tïme na aŋuun nïne. Jiy mo thööth oreŋ kun ki kun ni ge meeta kwänynyö.»

⁵Køøre a na Daniel, aana räŋŋö, ni jooda jiy ariiø møøk ni ge cuŋŋö, na aciel cuŋŋa bäät naam jï løøi, ni maya cuŋŋa bäät naam løøga.

⁶Ni kö acielli jï dhaanhø mo oruyö ka abïï ma lïïna mo ena bäät pïï yi naam, na «?A këël yi wäne noo ö gïïa näk rëëma ec noo ŋuutge?»

⁷Køøre ŋata näk oruyö ka abïï ma lïïna na en bäät pïï yi naam, ceŋŋe karge riet athaaŋ maal. Ni wïnynya dwøre ni kööŋŋa ri Jwøa kwøw ni wø bëëdö na bäre bäre, ni kööe, ni «Beeye cwiiri adäk ki thääŋö. 'Ba kanyo ö bäät jic Jwøk no nigelway, beeye kanyo ö gïïögø noo ŋuutge.»

⁸Køøre aani gïnögø awïnynya, 'ba tiere kär ci wïïa. Køøre aana pëëö, ni «?Kwääya, aŋuun gïïögø otïme nidïï?»

⁹Ni løk gø, ni «Daniel, aayï ki jöörï. Kiper luup moøgø ocïëgö no omwönö këël kanyo tïme na aŋuun nïne.

¹⁰Jiy mo thööth di tïïö ni tøŋ, ni tar, ni waany. 'Ba jø raay ge bëëdö ni ge tïïya raay, ni bäŋ ŋat raay mo tiet gïïögø cøøa wïïe; 'ba jøøa wïthge leer, tiet gïïögø cøøa wïthge.

¹¹«'Ba ki mano täge ki kanyo män olämme yie mo wø cïp cooth, ki kanyo ö gïna näk ec raac ki gø døc na näk gïr ränynyö noo cwödhi piny, thöödhö ki nïne ma kuma ki dïpe ariiø ki pïërabïŋween.

¹²Gwïëth en bäät jø wø kurö ni cwïnyge ege maaø noo pïï ri nïne ma kuma ki dïpe adäk ki pïëradäk ka abïïc.

¹³«'Ba ïïni, cäädhï ki jöörï këël aŋuunne. Køøre ï cøøa kar jwöm mar thøø. 'Ba noo tïme na aŋuun piny, ï tïŋa maal ni jootï kurï mano mëëk ïïni.»