Read anuak Daniel 2 Bible Online

Daniel 2 - anuak bible

Daniel 2

¹'Ba kanya tïme na ri riet cwiiri moa beet Nabukedenecörri ni ena nyeya, ena lägö ki lääk, ni ö wïïe ni kier ree, ni dhäth nyeŋŋe ki gämmö.

²Køøre nyeya acïpö ki dwøl na ajuuk, ki jøøa nyeŋge reegø, ki jø wø thöödhö ki war, ka ajuuk mo jø Kaldia cwøl ki man caange tier lääk mar nyeya jïre. 'Ba kanya öge na cuŋge nyïm nyeya,

³nyeya aköö jïge, ni «Aana lägö ki lääk, ni ö wïïa ni kier ree ki man ŋääa tier lääk.»

⁴Kanyøgø ajuuk mo jø Kaldia gena put köö jï nyeya ki dhøk mar jø Aram, ni «Wui nyeya, ïïno bëëdö na bäre bäre! Caan lääk jïwa, wa na jiyi ii, køøre waani tier lääk caanwa caanø.»

⁵Køøre aput nyeya dwøgø jï ajuuk mo jø Kaldia ni kööe, ni «Man beeye mana nø ŋøla ni yaa tïïö ni teek: Ni näk mo lääk mara ba caannu jïra ki tier gïna cääne kipere, uuni, u di ŋørø na bulli, ni ö uudi mou ni nyaay piny ni tïï na wïthur.

⁶'Ba ni näk mo lääk you caanø ki tier gïna cääne kipere, u jïtö ki muuce baŋa ki gïr mïn ec, ki wödö mo dwøŋ. Kiper manøgø nø, caannu lääk jïra ki tier gïna cääne kipere.»

⁷Ni løkge gø ri rietge ni köge, ni «Ï na nyeya en, beerra man caanï lääk jïwa, wa na jiyï ii; køøre waani tier gïna cääne kipere caanwa caanø.»

⁸Ni dwøgi ya nyeya ni kööe, ni «Ka adïëri møn, aani, ŋääa nou thaya luubö jaak kiper mana jootu gø ni mana nø ŋøla yaa tïïö ni teek,

⁹ni ni näk mo lääk ba caannu jïra, tïmö ni da ciik aciel keere kiperu. Uuni dhøgu atuutu, u bëët, ki man caannu tööt ki luup mo reyø nyïma nee dee gïn mo ree wiile. Ennø, caannu lääk jïra kiper nee ŋääa ni løny jïïu ki man caannu tier gïna cääne kipere jïra.»

¹⁰Køøre aløk ajuuk mo jø Kaldia jï nyeya ni köge, ni «Bäŋ dhaanhø bäät ŋøøm mo løny jïre ki man caan gïnögø jïrï, ï na nyeya en; kiper ki mana bëëde cøøn bäŋ nyeya mo dwøŋ mo teek ma ajuuk moe ki jøøa nyeŋge reegø ka ajuuk mo jø Kaldia ee kwøŋ pëënynyö ki teeŋ gïnögø.

¹¹Ni gïnögø na pëëny nyeya enø beeye gïn mo teek døc, ni bäŋ ŋat mo løny jïre ki man caan gø jï nyeya, ni näk mo paa juu ni wø näk kar bëëtö marge ba en dï jiy.»

¹²'Ba kiper luummögø, nyeya aput wëër døc ni cwïnye okëënynyö, ni put cïpö ki dwøl nee jø Babiløn bëët moa nyeŋge reegø ni wø caan tiet lääk 'näk.

¹³Køøre ciik manøgø akäl wøk kiper nee jøøa nyeŋge reegø moøgø 'näk; ni jääŋ jiy kuna manyge Daniel ki nyïïawääte kiper nee ge 'näk.

¹⁴'Ba kanya ö Aryöki, eni na wïth jø koor mo nyeya, na nø cøøe nee jø Babiløn moa nyeŋge reegø nääe, Daniel acäänö ki eni ki jöör leec wïc, ki jöö ma kare.

¹⁵Ni pëëny Aryök, ŋat wø käär teek nyeya, na «?Aperŋø na ö nyeya na käl teeŋ ciik manøgø wøk ni teek enø?» Køøre Aryök tier gïnögø alame jï Daniel.

¹⁶Ni ö Danielli ni put cøø ni pëëny nyeya nee eni kwäänni ki nïne kiper nee lønye jïre ki man caan tier lääk jï nyeya.

¹⁷Køøre Daniel aduu yi øtø mare ni caan tier gïnögø jï nyïïawäätge ma Ananiya, ki Micaël, ka Adhariya,

¹⁸kiper nee met yi Jwø maal pëënyge kiper gïnögø ni tiere okanø enø, nee eni na Daniel ki nyïïawäätge nee ba 'näk na aciel ki jø Babiløn moa nyeŋge reegø moøgø.

¹⁹Kanyøgø gïnö ni tiere okanø enø aput nyooth jï Daniel ki wäär yïth lääk. Køøre Daniel Jwø maal aput pwøc,

²⁰ni kööe, ni «Pwøc en ri nyeŋ Jwøk na bäre bäre, kiper leec wïc ki teek beege moe.

²¹Bee eni ni wø wel nïne ki ruun. Bee eni ni wø dwøk nyeye piny, ni wø këël tiet nyeye piny. Bee eni ni wø cïp leec wïc jï jøøa wïthge leer, ni wø cïp kwänynyö jï jø wø ŋäc tiet luup.

²²Bee eni ni wø nyooth tiet gïï mo ena piny mo okanø; bee eni ni wø ŋäc gïï mo ena yi muudhö, ni tar bëëdö ka eni.

²³Wui, ï na Jwø kwäya, a duua met ec jïrï ki pwøc, kiper aana mooyï ki leec wïc ki teek, ni ennø, aana tïïyï ki man ŋääa tier gïna pëënywa ïïni ki gø, kiper waana tïïyï ki man ŋäcwa tier lääk mar nyeya.»

²⁴Kanyøgø Daniel aput ci baŋ Aryök, ŋata kwany nyeya ki man 'näk jø Babiløn moa nyeŋge reegø; ena cøø ni caan gïn en jïgø, ni «Kär jø Babiløn moa nyeŋge reegø 'nägï! Lwør aani ni kïthï aani nyïm nyeya, køøre aani tier lääk mare caana caanø.»

²⁵Køøre Aryök Daniel aput kïth nyïm nyeya ni caan gïn en jïgø, ni «Aana jïtö ki dhaanhø dï jøøa no omaaø ki tøŋ røk jø Juuda mo løny jïre ki man caan tier lääk marï jïrï, ï na nyeya en!»

²⁶Kanyøgø aput nyeya jøl ni pëëny Daniel, eni na näk nyeŋŋe Belthacacör, ni kööe, ni «?Løny jïrï ki man caanï lääk mana jooda ki tier gïna cääne kipere?»

²⁷Ni løgi ya Danielli jï nyeya ni kööe, ni «Gïnögø ni tiere okanø enø, gïna pëënynyï, ï na nyeya, ba løny jï jøøa wïthge leer, ki jøøa nyeŋge reegø, ka ajuuk, ki jø adïëda ki man caange tier gø jïrï, ï na nyeya en.

²⁸'Ba da Jwøk mo ena maal ni wø nyooth tiet gïï mo okanø. Eni gïno tägi yi nyïm anyoodhe jïrï, ï na nyeya ma Nabukedenecör en. Lääk marï ki gïïa nyooth jïrï ki yi wïïï kanya bëëdï niï ena kar niine beege ii:

²⁹«Wui ï na nyeya, kanya bëëdï niï ena kar niine, wïïï ree aløø baŋ gïïo tägi yi nyïm, ni ö eni ni wø nyooth gïï mo tietge okanø ni nyuth ïïni gïno tägi yi nyïm.

³⁰'Ba aani, gïnögø ni tiere okanø enø, anyooth jïra, ni paa kiper ni da leec wïc jïra mo dwøŋŋa eni mo kaala mar jiy bëët moi ni kwøw ii, 'ba beeye kiper nee tier gïna cääne kipere ŋäyï, ï na nyeya, na acaare moa en wïïï tietge ŋäyï.

³¹«Wui ï na nyeya en, ïïna räŋŋö ni neenï gïn mo dwøŋ mo otïïö na kït dhaanhø, ni beeye gïn mo päl, mo mïërö mare thääŋa ec, ni beeye gïn mo cuŋŋö nyïmï, ni kany wø neeni, lwär di kälö.

³²Gïnögø no otïïö na kït dhaanhø enø, wïïe beeye warkey mana tøŋ, ni kööre ki bääte beeye gwel-bïrö, ni yie ki ämme beeye jwïël,

³³no otweege beeye nywïënyö, ni cääthe moe løøk mør otïïö ki nywïënyö, ni løøk mør otïïö ko odhöönh mo obulö.

³⁴'Ba kanya bëëdï niï rääŋö, da thääŋ kïdi ma amuk mo kär gudö ki cenø, ni päth bäät cääthe mo gïnögø no otïïö na kït dhaanhø enø kwöra näk otïïö ki nywïënyö ko odhöönh, ni pet geni.

³⁵Ni ö nywïënyö, ko odhöönh, ki jwïël, ki gwel-bïrö, ki warkey ni putge petø na thäŋi yie aciel, ni tïmge kaamar lethø mo ena yi laara ri jam arïïa, ni køøli ya jame, ni bäŋgø mo odööŋ rege. 'Ba thääŋ kïdi mana päth bäät gïnögø no otïïö na kït dhaanhø enø, aput tïmö na kïdi mo dwøŋ ni pääŋ piny bäre.

³⁶«Manøgø beeye lääk; ennø, tier gïna cääne kipere caanwa caanø jïrï, ï na nyeya.

³⁷Wui ï na nyeya en, beeye ïïni na nyeny nyeye. Jwø maal käädö mar nyec, ki teek, ki thwønh, ka ajiem acïbe jïrï,

³⁸ni cïp jiy cerï yïth kwöro bëëtge yïthge, këël ki lääc paap ki wec maal, ni nø tïïc ïïni nee bëëtge ni ge ena cerï bëët. Wïc mana näk warkey beeye ïïni.

³⁹«'Ba køørï da akwöm nyec mo ööa maal mo thiinhnha eni ki marï. Køør manøgø beeye dää akwöm nyec mo mar jwïël, mano käär piny bäre.

⁴⁰Ka aŋuudi tïmö ni da ŋweer akwöm nyec mo teek kaamar nywïënyö, kiper nywïënyö jammi bëët wø di petø ni ŋiith geni. Kaawat man wø ö nywïënyö wø pet jammi na thäŋi, akwöm nyec manøgø akwöp nyec moøgø bëët pete petø na thäŋi ni ŋiith ge.

⁴¹Kaawat mana raŋï gïnögø ni cääthe moe ki lweete løøk mør otïïö ko odhöönh mo obulö ni løøk mør otïïö ki nywïënyö, manøgø tïmö na akwöm nyec mo dëëre di pääŋŋö; 'ba poot da kur teek mo caala nywïënyö yie, kaawat mana jootï gø ni nywïënyö okuurö ko odhöönh.

⁴²Kaawat mana bëëde ni lweet cääthe mo gïnögø løøk mør beeye nywïënyö ni løøk mør beeye odhöönh, akwöm nyec manøgø løøk mør tïmö ni teek, ni løøk mør jääk.

⁴³Kaawat mana jootï nywïënyö no okuurö ko odhöönh, jiy obëëdö ni rege ege jääbö ki ri nywöm; 'ba bëëtö marge ba nyääyi, kaawat mana bëët nywïënyö ni kär nyääyö ko odhöönh.

⁴⁴«'Ba noo tïme na yïth nïr nyeye moeke, Jwø maal da akwöm nyec mo këëlle piny mo ba ränynyi na bäre bäre; na akwöm nyec manøgø ba wëëk jiy møøk. Eni akwöm mo nyec moeke bëët di nyadhø ni dïïr wïthge; 'ba eni ki dëëre keere, bëëdö na bäre bäre.

⁴⁵Man beeye tier gïna jootï kiper thääŋ kïdi mana muk ri kïdi mana näk kär gudö ki cenø, na pet nywïënyö, ki jwïël, ko odhöönh, ki gwel-bïrö, ki warkey. Jwøa dwøŋ gïïo tägi yi nyïm anyoodhe jïrï, ï na nyeya. 'Ba lääk beeye adïëri, ni tier gïna cääne kipere di ŋäädhö na kare.»

⁴⁶Kanyøgø nyeya ma Nabukedenecör cøŋŋe aput këël piny ni kuul wïïe piny nyïm Daniel ni wøøra gø. Ni cïpe ki dwøl nee cïpö ki muuy ki gïn wø jïye ŋwääi ni met jï Daniel.

⁴⁷Ni kööe jï Daniel, ni «Ka adïëri møn, Jwøï beeye wïth juu, ni beeye kwääc nyeye ni wø nyooth gïï mo tietge okanø, kiper mana lønye jïrï ki mana nyoothï tier gïn no okanø en.»

⁴⁸Køøre nyeya kar Daniel aput tïïc ni dwøŋ, ni mooc gø ki muuce mo thööth, ni tïïc gø nee ŋööm Babiløn bäre kääre, ni ena kwäärö thuwø mar jø Babiløn bëët moa nyeŋge reegø.

⁴⁹Ni ö Danielli ni kwac nyeya, ni ö nyeya ni røøny Cidarak, ki Micak, ka Abedenagø na jø käär ŋööm Babiløn; 'ba eni na Daniel eni bëëdö cwöt.