Read anuak Daniel 4 Bible Online

Daniel 4 - anuak bible

Daniel 4

¹Aani na nyeya ma Nabukedenecör, man beeye dwøra kiper wïth jiy, ki wïth juurre, ki wïth dhøgi, jø wø bëëdö bäät piny bäre: Bëët-mëër opälli jïïu.

²Aani yia met ki man caana nyuuthe jïïu ki gïïa näk rëëma ec na tïïc Jwøki dëëra, Jwøa Dwøŋ ni en Maal.

³A teeŋ dööŋö mo nyïëdi na døøŋ nyuuthe moe ki gø! Naa teeŋ dööŋö mo nyïëdi mar gïïa tïïe na näk rëëma ec! Buc nyec mare beeye bura mo bëëdö na bäre bäre; ni teek mare këëta yïth beenhnhe bëët.

⁴A na Nabukedenecör en, kanya bëëda naa ena yo owinyø mara ni yia met jaak, ni aano dhøøŋ paan dwøŋ mara,

⁵aana lägö ki lääk, ni put aani tïïc naa lwäär. Kït gïïa jooda kanya bëëda naa ena bäät pëëm niine, ki gïïa nyooth ki yi wïïa, aana tïïcge naa lwäär.

⁶Kanyøgø aana jäägö ki dwøl nee jø Babiløn bëët moa nyeŋge reegø øømmi nee käl nyïma kiper nee tier gïna cään lääki kipere caange jïra.

⁷Køøre ajuuk, ki jøøa nyeŋge reegø, ka ajuuk mo jø Kaldia, ki jø adïëda, gena öö, ni lama lääk jïge; 'ba kär løny jïge ki man caange tier lääk jïra.

⁸'Ba ka aŋuudi, Daniel, ni wø nyeŋŋe cwøl ni Belthacacör ki køør mana caa nyeŋŋe ri nyeŋ juu 'moa, eni na jwïëc juu mo ena kur keerge ena bääte, ena ö nyïma, ni caana lääk jïre ni kööa,

⁹ni «Wui Belthacacör, ï na kwääy ajuuk, aani ŋääa ni jwïëc juu mo ena kur keerge ena bäätï, ni bäŋ gïn mo tiere okanø mo dhäthö jïrï. 'Ba ennø, gïïa nyooth jïra ki yi lääk na jooda, ki tier gïna cääne kipere caanï jïra.

¹⁰Gïïa nyooth jïra ki yi wïïa kanya bëëda naa ena bäät pëëm niine beege ii: Aani kanya räŋŋa, aana nëënnö ki jaath mo bäär døc yi ŋöömö.

¹¹Jaath manøgø apiith, ni døøŋ dëëre ni tïme ni teek, ni ö bärri mare ni pïïe maal; ni tïme ni nëënö teegi mo piny bäre.

¹²Bøøge moe mïërö døc, ni nyïëdi moe thööth jaak, ni bëëdö na cam kiper gïïa nut bëët. Lääc paap ajïtö ki kar bëëtö tiere, ni ö wec maalli ni jïtge ki kar bëëtö bääte, ni tïme ni gïïa kwøw bëët cam marge jootge ri gø.

¹³«Aani, kanya bëëda naa raŋŋa gïïa nyooth jïra ki yi wïïa, naa ena bäät pëëm niine, aana nëënnö ki nyïïatwiel maal man wø kurö mo ööi ki maal.

¹⁴Ena rëëdö døc ni caan luupi ii: ni ‹Ŋødu jaadhøgø piny, ni ŋøøru bäädi moe; lweerru bøøge moe, ni kethu nyïïe. Beerra man aac lääc paapi tiere, ni ö wenynyi ni aacge bääte.

¹⁵'Ba gutö ki lweedi moe wär wiiu yïth ŋøøm, ni you meenø ki nywïënyö, ki jwïël, ni bëëde yi luuma nyään dï pwöla. Ni bëët dëëre ni thec ki thööy, ni eni nywääö ka lääy na aciel dï luum paap.

¹⁶Beerra man ö acaara mare ni wiil ree ni paa acaac dhaanhø, ni tïme ni beeye acaac lääy noo en jïre, këël kanyo pööth cwiiri abïriiø bääte.

¹⁷Luummögø beeye mana cem nyïïatwiet maalli, ge na jø koor, ni beeye mana ŋølge, ge na en kur keerge, kiper nee ŋäc jøøa kwøwi ki man näk mo Jwøa Dwøŋ ni en Maal jïre da teek bäät akwöm nyec mo jiy, ni løny ki man cïp gø jï ŋato manynye jaak, ni beeye ŋata kare bäŋgø dï jiy.›

¹⁸«Manøgø beeye lääk mana jooda, a na nyeya ma Nabukedenecör. 'Ba ennø, ï na Belthacacör en, caan tier lääk jïra; kiper ki man bëëde cøøn en, ki røk jøøa nyeŋge reegø ya akwöm nyec mara, bäŋ ŋat moo løny jïre ki man caan tier lääk manøgø jïra. 'Ba ïïni, løny jïrï, kiper jwïëc juu mo ena kur keerge ena bäätï.»

¹⁹Kanyøgø Daniel, ni wø nyeŋŋe cwøl ni Belthacacör, amak apïte ki kany mo bäär mëëth, ni bëëde ni cwïnye pärö ki køør acaara mare. Ni luup nyeya ni kööe, ni «Belthacacör, lääk manøgø ki tier gïna cääne kipere, kär cwïnyï døøcge mo pärö.» Ni dwøgi ya Belthacacörri ni kööe, ni «Wui nyeya, doo beerra eni ki mana di lääki cäänö kiper jøøa män ki ïïni, ni tier gïna cään lääki kipere doo na poot cäänö kaper nyïïmän moï.

²⁰Jaath mana jootï na piith, ni døøŋ dëëre ni tïme ni teek, ni ö bäye ni pïïe maal ni nëënö dï piny bäre,

²¹na näk bøøge moe mïërö ni nyïïe thööth jaak, na bëëdö na cam kiper gïïa nut bëët, na jït lääc paapi ki kar bëëtö tiere, ni ö wec maalli ni jïtge ki kar bëëtö bääte,

²²wui nyeya, jaath manøgø beeye ïïni. Kiper ïïna bëëdö ni karï dwøŋ, ni bëëdï niï teek, ni ö dööŋ karri marï ni døøŋŋe ni pïïe maal, ni ö pinynyi bäre ni en cerï.

²³«Køør manøgø, ï na nyeya, ïïna nëënnö ki nyïïatwiel maal man wø kurö mo ööi ki maal ni kööe, ni ‹Ŋødu jaadhøgø piny ni raanynyu gø; 'ba gutö ki lweedi moe wär wiiu yïth ŋøøm ni you meenø ki nywïënyö ki jwïël yi luum mo nyään yi pwöla, ni bëët dëëre ni thec ki thööy, ni eni nywääö ka lääy na aciel dï pwöla, këël kanyo pööth cwiiri abïriiø bääte.›

²⁴«Wui ï na nyeya, man beeye tier lääk, ni beeye mana ŋøl Jwøa dwøŋŋi ni en maal ni beeye gïno pänh bäätï, ï na kwäärö mara ma nyeya,

²⁵ki man näk miï riema wøk ki dï jiy, ni tïm kar bëëtö marï ni ena dï lääc paap, ni tïmï niï cama luum kaamar dhieŋ, ni bëët dëërï ni thec ki thööy ki cwiiri abïriiø, këël kanyo ŋäyï gø ki man näk mo Jwøa Dwøŋ ni en Maal jïre da teek bäät akwöm nyec mo jiy, ni løny ki man cïp gø jï ŋato manynye jaak.

²⁶Dwøl mana caan ni gutö mar jaath ki lweedi moe wär wec, nyootha gø na akwöm nyec marï di duuö jïrï kanyo ŋäyï gø ni teek mar käär jiy ena maal.

²⁷Kiper manøgønø, ï na nyeya en, beerra man tïm gïno caana en ni yiï met ki gø. Ïïni wec gïïa bayï, ni bëëdï niï tïïya gïn mo beer, ni weyï raay moï, ni bëëdï niï nyootha køny jï jøøa no ocaarø. Kanymør ni kwärö marï løny ki man ruue.»

²⁸Gïï bëët ii, beege gïïa tägö dëër nyeya ma Nabukedenecör.

²⁹Kanya tïme na køør dwäde apaar kurriiø, ni eni na nyeya eni cäädhö maal bäät øt nyec paan dwøŋ mar Babiløn,

³⁰ena köö, na «?Aŋø, man paa beeye Babiløn na dwøŋ na geera, ni beeye kar bëët nyec na geera ki teek mara na dwøŋ, na gïr ajiem mar dööŋ kar mara, a na nyeya?»

³¹'Ba kanya poot nyeya ni luummögø poot ena dhee, dwøl aput öö ki maal ni kööe, ni «Ï na nyeya ma Nabukedenecör, luummi en caan kaperï: Teek nyec marï akäl wøk baŋï,

³²ni riem ïïni wøk ki dï jiy, ni tïm kar bëëtö marï ni ena dï lääc paap. Ïïni, ïïno cämö ki luum kaamar dhieŋ ki cwiiri abïriiø, këël kanyo ŋäyï gø ki man näk mo Jwøa Dwøŋ ni en Maal jïre da teek bäät akwöp nyec mo jiy, ni løny ki man cïp gø jï ŋato manynye jaak.»

³³Ki nyi kany mo thiinh, luummögø na cäänö kiper Nabukedenecör enø aput thur kare; ni ö eni ni riemi wøk ki dï jiy, ni put tägö ki man cam luum kaamar dhieŋ, ni bëët dëëre ni thec ki thööy, këël mana døøŋ jïërri moe ni tïmge kaamar okwöre mo coor, ni tïm kwök lweete kaamar kwök lweet wenyø.

³⁴'Ba kanya thum cwiiri moøgø na abïriiø yøø, a na Nabukedenecör, nyeŋŋa ataa maal, ni ö acaara mara ni put duu baŋa, ni ö Jwøa dwøŋŋi ni en maal ni puta gø pwøc, ni wøøra eni, ni jiema eni, eni ni wø bëëdö na bäre bäre. Teek mare bëëdö na bäre bäre, ni buc nyec mare këëta yïth beenhnhe bëët,

³⁵ni jø wø bëëdö wï ŋöömö geno kwaanø kaamar gïï mo bäŋgø. 'Ba eni man wø tïïe yïthakic lwaae mo maal ki yïthakic jø wø bëëdö wï ŋöömö wø tïïe ka køør man wø manynye, ni bäŋ ŋat mo løny jïre ki man gëëŋ cer gø, wala ki man kööe jï gø, na «?Agïnaŋø na tïïyï?»

³⁶Teeŋ kar kanya duu acaara mara baŋa, nyec mara, ki wödö mara aput duu baŋa, ki nyeŋ ajiem mar akwöm nyec mara. Ni ö jø wø cïpi ka acaare jïra, ki jø kööre 'moa, ni täkge ki man manyge aani, ni ö nyeci mara ni døø kare, ni ö teek mørri mo dwøŋ ni meedi jïra.

³⁷Kawaane a na Nabukedenecör, a pwøya nyeya mar maal, ni tïŋa nyeŋŋe maal, ni jiema eni, kiper tïïe moe bëët beege adïëri, ni jïëth tïïe moe tiir, ni eni løny jïre ki man dwøk jiy piny mo wø bëëdö ni cwïnyge da atöör.