Read anuak Daniel 5 Bible Online

Daniel 5 - anuak bible

Daniel 5

¹Nyeya ma Belthacör atïïö ka ajwöm-cam mo dwøŋ kiper jø kööre moe ma kuma, ni bëëde ni mädhö ki køøŋ nyïïomøki nyïm jøøgø na kuma yøø.

²'Ba Belthacör kanya bel køøŋ nyïïomøki, ena put cïpö ki dwøl nee athääk warkie ka athääk gwel-bïrö øømmi moa käl wänni wøk ma Nabukedenecör ki yi Øt Jwøk mana en Jerucalem, kiper nee eni na nyeya, ki jø kööre moe, ki määre, ko omëërri moe nee mäthge ki ge.

³Kanyøgø jiy athääk warkie aøømge moa käl wøk ki yi Øt Lam ni beeye Øt Jwøk mana en Jerucalem, ni ö nyeya, ki jø kööre moe, ki määre, ko omëërri moe ni mäthge ki ge.

⁴Kanya mäthge, marge atïmö ni ge pwøya juu moa näk tïïc ka warkey, ki gwel-bïrö, ki jwïël, ki nywïënyö, ki jenni, ki kïte.

⁵Ki nyi kany mo thiinh, lweet cer dhaanhø aput nëënnö ni göödö dëër øtø mar øt nyec mana näk opuuö, na dïët ki lamba, ni ö nyeya ni joot cenø ni göödö.

⁶Køøre nyeya täärnyïme aput niduk, ni put cwïnye tïmö ni pärö ka acaara mare, ni ö nyeŋ ocwiiye ni tïmge ni nhønhnhi, ni ö wïth cøŋŋe ni pöötge rege.

⁷Ni ö eni na nyeya ni cwöte ki dwøl mo päl nee jøøa nyeŋge reegø, ka ajuuk mo jø Kaldia, ki jø adïëda, käli. Ni cään jø Babiløn moøgø na wïthge leer, ni kööe, ni «Nee da ŋat mo løny ki man kwaan gïn jïra no ogöörö en, ni caan tier gïna cääne kipere, eni dëëre di runynyö ka abïï ma abïcøle, ni kïth cwaage ki tiin warkey, ni tïme na dää kwääri moa näk teek ocïp ceŋge ni wø käär akwöm nyec man.»

⁸Kanyøgø jic nyeya bëët moa wïthge leer gena öö, 'ba kär løny jïge ki man kwaange gïna näk ogöörö jï nyeya, wala ki man caange tier gïna cääne kipere.

⁹'Ba nyeya ma Belthacör cwïnye abëëdö ni pärö døc, ni ö täärnyïme ni put niduk døc, ni ö jø kööre moe ni put yïthge nithay.

¹⁰'Ba gwanynyø mii nyeya adøny kar ajwöma mar cam yi øtø kiper luup moa caan nyeya ki jø kööre moe. Ni ö gwanynyø ni cäänne ni kööe, ni «Wui nyeya, ïïno bëëdö na bäre bäre! Kär cwïnyï wëëk pärö ki køør acaara marï, ni ba wëëgï täärnyïmï niduk.

¹¹Da dhaanhø yi po nyec marï mo jwïëc juu mo ena kur keerge ena bääte. Ki yïth nïne moa beet wäru, ŋatøgø ajoot na ŋat mo kwel wïc, ki leec ŋeth, ki leec wïc mo caala leec wïc mar juu ena bääte, ni ö nyeya ma Nabukedenecör ni beeye wäru, wäru ma nyeya, ni røøny gø na kwäärö bäät ajuuk, ki jøøa nyeŋge reegø, ka ajuuk mo jø Kaldia, ki jø adïëda.

¹²Ŋatøgø na Daniel enø, na nyeŋŋe cak nyeya ni Belthacacör, ajoot na ŋat mo jïre da jwïëy ma wøp, mo tiet jammi ŋääe, mo wïïe kwel, mo tiet lääk di caanø, mo tiet leere di lamø, mo tiet luup mo teek päde pädö. Ennø, beerra man cwøl Daniel nee tier gïna näk ogöörö caane.»

¹³Kanyøgø Daniel aput kïth nyïm nyeya, ni ö nyeya ni cääne ki gø ni kööe, ni «?Beeye ï Daniel na en røk jøøa mak ki tøŋ Juuda, na käl wära ma nyeya ki yi Juuda?

¹⁴Ennø, gïrï awïnynya ki man näk mo jwïëc juu ena bäätï, ni ö kwel wïci, ki leec ŋeth, ki leec wïc mo opöödhö ni joodi baŋï.

¹⁵Kawaane waane en, jøøa wïthge leer, ni beege jøøa nyeŋge reegø, gena käli ni öge nyïma kiper nee gïn no ogöörö en kwaange jïra ni caange tier gïna cääne kipere; 'ba kär løny jïge ki man caange luum gïna cääne kipere.

¹⁶'Ba aani ki dëëra, gïrï awïnynya ki man näk mo løny jïrï ki man caanï tier gïrpiny, ki man pätï tiet luup mo teek. 'Ba ennø, ni näk mo løny jïrï ki man kwaanï gïn no ogöörö en jïra, ni caanï tier gïna cääne kipere, ïïni dëërï di runynyö ka abïï ma abïcøle, ni kïth cwaagï ki tiin warkey, ni tïmï ni ïïna dää kwääri moa näk teek ocïp ceŋge ni wø käär akwöm nyec man.»

¹⁷Kanyøgø aløk Danielli nyïm nyeya ni kööe, ni «Muuce moï kanï kiper dëërï, wala jap met ec moï moøgø tïme ni cïpï jï ŋat mør; 'ba aani gïnögø no ogöörö enø, kwaana kwaanø jïrï, ï na nyeya, ni caana tier gïna cääne kipere.

¹⁸«Wui nyeya, Jwøa Dwøŋ ni en Maal wäru ma Nabukedenecör amooe ki teek nyec, ki dööŋ kar, ka ajiem, ki wödö.

¹⁹'Ba kiper dööŋ kar mana cïbe jï gø, wïth jiy bëët, ki wïth juurre bëët, ki teeŋ wïth dhøgi bëët, gena bëëdö ni ge lwäär ni dëëtge kwanynyi nyïme. Ni ŋata manynye nee nääe, nääe nääö, ni ŋata manynye nee bëëde ni kwøw, wiie wiiø, ni ŋata manynye nee cuume, cuume cuumö, ni ŋata manynye nee dwøk piny, dwøge piny.

²⁰'Ba kanya tïm cwïnye ni ena maal ka atöör, ni jwïëy moe bëënna koorrø, ni töödö bäät jiy, ena käl wøk ki bäät wäl nyec mare, ni ö ajiemmi mare ni lwøri baŋe.

²¹Eni thuwø, ena rïëm wøk ki dï jiy, ni ö acaara mare ni tïme ni caala mar lääc paap, ni ö kar bëëtö mare ni tïme ni ena dï arëëni mo paap. Ena bëëdö ni cama luum kaamar dhieŋ, ni bëët dëëre ni thec ki thööy, këël kanya ŋäc gø ki man näk mo Jwøa Dwøŋ ni en Maal jïre da teek bäät akwöp nyec mo jiy, ni løny jïre ki man cïp gø jï ŋato manynye jaak.

²²«'Ba ï na wääde ma Belthacör, dëërï kärï dwøk piny, këël na bëëdï ni gïï bëët ii ŋäyï.

²³'Ba ïïna tïmö niï tïŋa riï maal niï läädö ka Kwääc maal, ni ö jiyi ni øømge athääe mo Øt Lam mare, ni kälge ge nyïmï, ni ö ïïni ki jø kööre moï, ki määrï, kö omëërri moï ni bëëdu ni køøŋ nyïïomøki maathu ka geni; ni tïme nou pwøya juu moa näk tïïc ka gwel-bïrö, ki warkey, ki jwïël, ki nywïënyö, ki jenni, ki kïte, ni beege gïï mo ba rääŋö, mo ba wïnyö, ni bäŋ gïn ŋäcge. 'Ba Jwøk, na näk jwïëc kwøw moï ena cere, ki jïëth tïïe moï, kärï jiemø.

²⁴'Ba bee eni na jääŋ cenø mana öö na göör gïn en.

²⁵«Ennø, man beeye gïna göör piny: MENE, MENE, TEKEL, ki PARCIN.

²⁶«Ni man beeye tier gïnögø: «MENE beeye kwäänö, ni tiere beeye ni Jwøk nïr akwöm nyec marï akwaane ni raany gø.

²⁷«TEKEL beeye røm, ni tiere beeye ni ïïna røm ki gïr røm ni joot ïïni niï jööt.

²⁸«PARCIN beeye pääŋŋö, ni tiere beeye na akwöm nyec marï di pääŋŋö ni mëëge jø Mëdön ki jø Parca.»

²⁹Kanyøgø Belthacör aput cïpö ki dwøl, ni ö jiyi ni runyge dëër Daniel ka abïï ma abïcøle, ni kïthge cwaak gø ki tiin warkey, ni putge gööc piny ki luubö kipere ni ki mano täge ennø, ena jïtö ki teek ni ena dää kwääri mo wø käär akwöm nyec.

³⁰'Ba kanya tïme na dïwäänögø kiree, Belthacör aput 'näk, eni na nyeny jø Babiløn,

³¹ni ö Dariöci nyï Mëdön ni lwør nyec ni cwiiri moe pïërabïciel ka ariiø.