Read anuak Daniel 8 Bible Online

Daniel 8 - anuak bible

Daniel 8

¹Kanya tïme na ri dää cwiiri moa beet Belthacörri ni ena nyeya, a na Daniel, aana nyuunhnhi ki lääk køør lääk mana kwøŋ nyooth jïra dïkwøŋ.

²'Ba kanya bëëda naa raŋŋa gïna nyooth ki yi wïïa, ajooda naa ena yi kiira näk ogeerø ni teek yi pääny Cuca na en po jø Ilam, ni kanya raŋŋa gïna nyooth ki yi wïïa, ajooda naa ena deŋ naam man wø cwøl no Ulay.

³Køøre waŋa akëëlla dëëre ni jooda nywø røømmø mo cuŋŋö deŋ naamøgø, mo jïre da tuŋi ariiø. Tuŋi moøgø na ariiø yøø bäyö, 'ba aciel bäärra eni ki maya, ni mana bäär tuya ŋää cään.

⁴Nywø røømmø manøgø ajooda ni cööba jï løø kur pänh-cäŋ, ki jï løø wï-piny ki jï løø tier-piny, ni bäŋ lääy mør mo oløny ki man cuŋŋe nyïm gø, ni bäŋ ŋat mo da gïn mo ee piemø cer teek mar gø; 'ba ena tïmö ni tïïya gïna met yie ki gø, ni døøc dëëre mo dwøŋ.

⁵'Ba kanya bëëda naa caara gïr gïnögø, aana nëënnö ki nywø ateea mo käla jï løø kur pänh-cäŋ ni ŋøla bäät piny bäre ni ŋøøm ba gude, na ateea manøgø yïthakic nyeŋŋe da tuuŋ mo nëënö jaak.

⁶Ni ööe ni cääth baŋ nywø røømmø mana näk jïre da tuŋi ariiø na jooda ni cuŋŋö deŋ naam, ni läät baŋ gø ki wëër mo teek.

⁷Ni jooda gø ni nyiiga buut nywø røømmø ni cwïnye okëënynyö ki gø, ni tuk nywø røømmø ni tëëŋ tuŋi mo gø wøk moa näk ariiø, 'ba nywø røømmø bäŋ teek jïre ki man cuŋŋe ki gø. Kanyøgø ena put ateea gøø piny ni nyør gø, ni bäŋ ŋat mo oløny jïre ki man piem nywø røømmø cer teek mar gø.

⁸Køøre nywø ateea manøgø dëëre aput døøc mo dwøŋ døc, 'ba kanya bëëde ni teek, tuuŋ mare mana dwøŋ atoor, ni ö kare ni twöe ki tuŋi aŋween mo nëënö jaak, ni wïthge ege løø but piny karge ŋweeri kwör wø kwön jam maalli ki yïthge.

⁹'Ba tuuŋ mo thiinh atuy ki ri tuuŋ aciel røk tuŋi moøgø, ni ö teeki mare ni nyaae ni cäätha jï løø tier-piny, ki jï løø kur tuul-cäŋ ki jï løø ŋøøp wø cwøl ni Mïërö.

¹⁰Ena døøŋŋø këël mana put këët ri lwaa gïïa en maal, ni ö lwaa gïïa en maalli møøk ki ceer møøk ni leeŋ ge piny ni nyør ge.

¹¹Eni dëëre atïŋ maal ni døøc dëëre mo dwøŋ ni päär dëëre ki Kwääc lwaa gïïa en maal, ni ö olämme mo wø cïp cooth jï Kwääc lwaa gïïa en maal ni män ge, ni päät kar lam na en kur keere.

¹²'Ba kiper gïïa no obayø, lwaa gïïa en maal ko olämme mo wø cïp cooth acïp dhi cere, ni ö jammi bëët mo wø tïïe ni thurge karge, ni ö adïëri ni leeŋi piny.

¹³Køøre aani dwør ŋat mo ena kur keere awïnynya ni cäänö, ni ö ŋat mør mo ena kur keere ni kööe jï mana cäänö, na «?A këël yi wäne no ö gïna nyooth noo thur kare, gïna cäänö kiper olämme mo wø cïp cooth, ki bääyö man wø käl ränynyö, ki cïp kar lam na en kur keere, ki lwaa gïïa en maal ki man nyøri ki tiel?»

¹⁴Ni kööe jïra, ni «Thöödhö ki nïne ma kuma aciel ki dïpa ki pïërabïïc, no olämme mo wø cïp ka abøøya ka amöölla ba cïp yïthge. Køøre kar lam na en kur keere cäŋ ka dwøk kare ni beer.»

¹⁵'Ba a na Daniel, kanya bëëda naa raŋŋa gïna nyooth, naa manynya gø nee tiere kwanya, ajooda ni da ŋat mo cuŋŋö nyïma mo caala dhaanhø.

¹⁶Ni puta dwør dhaanhø wïnynyö mo cwödö ya ageel naam wø cwøl no Ulay ni kööe, ni «Geebriel, caan tier gïna nyooth jï ŋati en nee ŋääe.»

¹⁷'Ba kanya pïïe buut kanya cuŋŋa yie, aana lwäyö ni pädha ki täärnyïma. Ni kööe jïra, ni «Wär dhaanhø, wär ŋäyï ki man näk mo gïna nyooth cäänö kaper kanyo ŋuut pinynyi yie.»

¹⁸'Ba kanya bëëde ni cäänö ki aani, nyeŋŋa aput gämmö døc ni täärnyïma poot yaa këël yïth ŋøøm; køøre aana gude ni tïŋ aani maal naa thïïŋ.

¹⁹Ni kööe, ni «Neenï, aani gïïo tägi ya aŋuudi yïth nïr wëër caana caanø jïrï, kiper gïna nyooth cäänö kaper kanya wäŋŋi na näk aŋuudi.

²⁰Nywø røømmø mana jootï na näk jïre da tuŋi ariiø, nyootha nyeye mo jø Mëdön ki mo jø Parca.

²¹Ni nywø ateea nyootha nyeny jø Gïrïïk, ni tuuŋ mana dwøŋ na en yïthakic nyeŋŋe nyootha nyeya mana dïkwøŋ.

²²Ni tuŋi moa näk aŋween moa tuy kar tuuŋ mana toor, nyootha akwöp nyec aŋween mo rege pääŋge ka ri wï jur marge, 'ba ge ba teek ni caala akwöm nyec mana dïkwøŋ.

²³«'Ba noo tïme ni ya aŋuun nyec marge, kanyo tïm jø bääö ni reyø døc, da nyeya mo ree di thïïŋö mo täärnyïme di lwäärö, na ŋat mo waŋe riek ki cwøk.

²⁴Eni teek mare tïmö ni dwøŋ døc, 'ba paa teek mare ki dëëre. Eni, räänyö mo dwøŋ tïïe tïïö, ni ö gïn wø tïïe jaak ni thur kare. Eni jiy moa teek, këël ki jic Jwøk raanynye raanynyø.

²⁵'Ba ki jöör riek waŋe, cwøk otïïe ni thur kare jïre; ni døøc dëëre mo dwøŋ ki yi cwïnye, ni kanyo bëët jiyi ni bëëtö marge wøp jaak, wïth jiy mo thööth raanynye raanynyø, ni thïïŋ ree dëër Kwääc kwääri. 'Ba eni petø ni bäŋ cer dhaanhø ree.

²⁶«Gïna nyooth manøgø na cäänö kiper olämme mo wø cïp ka abøøye ka amöölle na tiere nyooth jïrï beeye adïëri. 'Ba gïna nyooth manøgø wär kan cwïnyï, kiper cäänö kaper nïne mo poot ena yi nyïm kuya.»

²⁷'Ba a na Daniel, dëëra aput nidhooth piny, ni bëëda naa tuu ki nïne møøk. Køøre aana cäŋ ö maal ni døøa baŋ tïï nyeya, 'ba aani a bëëdö ni yia othäŋŋö jaak ki gïna nyooth, kiper tiere kär ci wïïa.