Read anuak Daniel 9 Bible Online

Daniel 9 - anuak bible

Daniel 9

¹Kanya tïme na yi cwiir mana dïkwøŋ mar Dariöc wär Ayacewëëröc na käl røk jø Mëdön, ŋata røøny na nyeya mar akwöm nyec mar jø Babiløn,

²yi cwiir mana dïkwøŋ kanya bëëde na nyeya, a na Daniel en, da tier gïn maa kwanya yïth weet Jwøk ki køør luubö mana nyooth Wuuö Jwøki jï nyikuŋ Jwøk ma Jeremaya, ki man näk mo ränynyö mar Jerucalem thöödhö ki cwiiri ma pïërabïriiø.

³Kanyøgø nyïma aputa løø baŋ Kwäärö Wuuö Jwøk ki lam, naa manynya eni ni mara kwac, naa lämö ki lam wödö ki cam, naa käära keece na abïïe, naa bëëdö yi bur.

⁴Aana lämö jï Wuuö Jwøk, Jwøk mara, ni køba raay jïre ni kööa, ni «Wui Kwäärö Wuuö Jwøk, ï na Jwøa dwøŋ ni wø lwäärö ki eni, ï ni wø gwøk luumma tuutï, ki mëër man wø ba jøøl, ni tuutï ka jø wø mëër ki ïïni, ni wø gwøk ciik moï,

⁵waani, waana gaa wøk, ni bääcwa ni tïïwa ki raay, ni gëëmwa, ni løøwa ŋäthwa baŋ gïïa cemï ki ciik moï.

⁶Maya thuwø, dööt jiyï ma nyïïkuk Jwøk kärwa wïnynyö, jø wø køp luup ki nyeŋŋï jï nyeye mowa, ki jï kwääri mowa, ki jï wëëkwa, ki jï jiy bëët moa en yi ŋöömö.

⁷«Wui Kwäärö Wuuö Jwøk, ïïni bee ï wää bëënynyö, 'ba waani marwa beeye lään wïc, kaawat man bëëde dïcäŋi en, ni bee wa jø Juuda ki jø wø bëëdö Jerucalem, ki jø Icriel bëët moa en kwör mo cärö ki moa en kwör mo bäyö yïth mïëri bëët moa riemï ge yïthge, kiper ageeme moa tïïcge dëërï.

⁸Wui Kwäärö Wuuö Jwøk, waani marwa beeye lään wïc møn, wa ki nyeye mowa, ki kwääri mowa, ki wëëkwa, kiper waana bääyö dëërï.

⁹Ï na Kwäärö Wuuö Jwøk, Jwøk marwa, marï beeye mëër ki wëën jiy, këël na bëëtwa ni wa gëëmö ki ïïni,

¹⁰ni kärwa dwørï wïnynyö, ï na Wuuö Jwøk, Jwøk marwa, ni kärwa cäädhö køør ciik moï na cïpï jïwa ki dhøk jiyï ma nyïïkuk Jwøk.

¹¹Dhaanh Icriel bäre ciik moï akaalge, ni løkge ŋäthge, ni kwierge dwørï. «Kiper manøgønø, acïëni ki kööŋ mar ajäla na näk ogöör piny yi wëël ciik Modhe, eni na dhaanh Jwøk, akïth bäätwa, kiper waana bääyö dëërï.

¹²Ïïni luummï mana caanï dëëtwa ki dëët dïbwöthe mowa, mo wø käär waani, awëëgï thur kare ki man kännï bäätwa ki gïn mo leth mo dwøŋ; kiper ki yi piny bäre poot bäŋ teeŋ gïn mo otïïö mo caala teeŋ gïna tïïc dëër Jerucalem.

¹³Gïï ni leth bëët ii aö bäätwa ki køør mana näk ogöörö yi wëël ciik Modhe; 'ba waani met yiï, ï na Wuuö Jwøk, Jwøk marwa, kärwa manynyø, ni kärwa røkwa løø ki yïth raay mowa, ki man luuwa wïthwa baŋ adïëri marï.

¹⁴Kiper manøgønø, ï na Wuuö Jwøk, ï kär dwiil ki man kälï gïna leth bäätwa, kiper ï na Wuuö Jwøk, Jwøk marwa, marï beer ki yïth jammi bëët mo wø tïïyï; 'ba waani dwørï kärwa wïnynyö.

¹⁵«'Ba ennø, wui ï na Kwäärö Wuuö Jwøk, Jwøk marwa, ï na käl jiyï wøk ki yi ŋööm Ijep ki køør teek badï, ï na tïïc nyeŋŋï nee wïnye kaawat man bëëde dïcäŋi en, waani, waana bääyö, ni tïïcwa gïï mo reyø.

¹⁶Wui Kwäärö Wuuö Jwøk, ki køør tïïe moï bëët na näk mo bëënynyö, ennø beerra man paanyï wëër marï bäät pääny marï ma Jerucalem, ni wø en bäät kïnna en kur keere; kiper Jerucalem ki jiy moï atïmö na gïr ajøøŋ jï jiy bëët moa en deŋwa ki køør gïïa bacwa ki raay mo kwäcwa.

¹⁷«'Ba ennø, ï na Jwøk marwa, beerra man wïnynyï lam mar dhaanhnhï man ki kwac mare. Ki køør nyeŋŋï, ï na Kwäärö Wuuö Jwøk, beerra man wëëgï täärnyïmï rieny bäät kar lam marï na näk oränynyö.

¹⁸Wui ï na Jwøk mara, cek ïthï ni wïnynyï mara! Jap nyeŋŋï ni raŋï ränynyö marwa ki mar pääny man wø cwøl ri nyeŋŋï. Waani ï ba kwacwa kaper ni da gïn mo beer baŋwa; 'ba beeye kiper mëër marï na päl.

¹⁹Wui Kwäärö Wuuö Jwøk, wïny marwa! Wui Kwäärö Wuuö Jwøk, wëën waani! Wui Kwäärö Wuuö Jwøk, cek ïthï ki marwa ni tïïï ki gïrpiny! Wui ï na Jwøk mara, ki køør nyeŋŋï, kärï ruu, kiper pääny marï ki jiy moï cwøla ri nyeŋŋï.»

²⁰'Ba kanya bëëda naa cäänö naa lämö naa køpa raay 'moa ki mo jø powa ma jø Icriel, naa peedha kwac mara nyïm Wuuö Jwøk, Jwøk mara, kiper thuur mar Øt Jwøk na en kur keere,

²¹kanya bëëda naa poot cäänö ki yi lam, Geebriel, ŋata kwøŋa joot yïth lääk dïkwøŋ, amään baŋa døc kar kany wø cïp olämi mar abøøya yie.

²²Ni cïpe ki pwöc jïra ni kööe, ni «Daniel, aana öö ennø kuna mooa ïïni ki leec wïc, nee tiet luup kwanyï.

²³Kanya tägï ki lam ennø, da luubö ma aöö, ni beeye mano caana jïrï en, kiper ïïna mëërö ki gø døc. Kiper manøgønø, caar luubö man ni ŋäyï tier gïna nyooth.

²⁴«Cwiiri abïriiø kwöre ma pïërabïriiø akwaan kiper jø pou ki pääny maru na en kur keere, ki man mwön bääyö yïth cwiiri moøgø, ki man thum raayi, ki man tïïc okïdi kiper gïïa bayi, ki man ö bëënynyö mana näk bëëdö na bäre bäre, ki man thur gïna nyooth kare ki luupa køp nyïïkuk Jwøki, ki man ö kar lam na en kur keere na pere leth ni jøri ki maaw.

²⁵«Kiper manøgønø, beerra man ŋäyï gø ni kwanyï tiere ki man näk mo luubö mana caan ki man dwøk Jerucalem kare ki man cäŋi geerrø, këël kanyo ö ŋata näk wïïe othïïmmö ki maaw, ŋato käär jiy, otïmö na cwiiri abïriiø kwöre abïriiø, ki cwiiri abïriiø kwöre ma pïërabïciel ka ariiø. Jerucalem cäŋ ka geerrø ni da nyeŋ jïëthe ki kwör gwøk røk mo teek. 'Ba kar kaace beeye cäŋ gïï mo leth.

²⁶'Ba kanyo tïme na køør cwiiri abïriiø kwöre ma pïërabïciel ka ariiø, ŋata näk wïïe othïïmmö ki maaw di nääö ni bäŋ gïn mo dööŋ jïre, ni ö jø lenynyi mo kwäärö mør mo ena nyïm ni raanyge pääny ki kar lam na en kur keere. 'Ba aŋuunne öö kaamar jwïëö. Leny obëëdö ni cäätha nyïme jaak këël aŋuunne, ni ränynyö bëëdö no onøŋøl.

²⁷'Ba kwäärö manøgø tudö ki luubö mo teek ma kar cwiiri abïriiø, ni tuude ka jiy mo thööth; 'ba noo tïme na thääŋ cwiiri abïriiø moøgø, eni, jiy di mänö ki man cïpö ko olämme ki muuce mo beel. 'Ba eni na käl ränynyö, gïna näk ec raac ki gø døc ocwöth piny wï Øt Jwøk, këël kanyo tïme na aŋuudi mano kïth ränynyö bääte mana näk oŋølø kipere.»