Read anuak Odheea 1 Bible Online

Odheea 1 - anuak bible

Odheea 1

¹'Ba man beeye dwør Wuuö Jwøk mana ö bäät Odheea o Bëëri yïth nïra bëët Udhaya, ki Jötham, ki Eeyeth, ki Edhekaya ni gena nyeye mo Juuda, ni Jeröbäm o Jeyöac ena nyeya mar Icriel.

²'Ba kanya ö Wuuö Jwøki na täge ki cäänö ki ri Odheea, ena köö jï gø, ni «Ciï ni määnynyï riï ki dhaagø ma kääbi ni jïtï ko obwöre mo nywøl ka køør bëët käp, kiper jiy atïmö ni ge bëëdö ka bëët käp mo raac døc yi ŋöömö man, ni wecge aani, a na Wuuö Jwøk.»

³Kanyøgø nø, Odheea acøø ni nywøm Gömër nyi Dibalëm, ni ö Gömërri ni jït yie ki dhaanhø ki gø, ni lwaare ki gø na dïcwøø.

⁴Køøre Wuuö Jwøk aköö jï Odheea, ni «Cak nyeŋŋe ni Jedhriel,[1] kiper ki kany mo cään dhi øt Jiyu raanynya raanynyø kiper remø mana køny piny päänya cwøl ni Jedhriel,[2] ni ööa ni tïïa buc nyec mar dhi øt Icriel nee cuŋŋe.

⁵'Ba noo tïme na dïcäŋeca, atheerø mar Icriel toora toorø yi goor Jedhriel.»

⁶Køøre Gömër yie acäŋ jïtö ki dhaanhø ni lwaare ki gø na nyakøø. Køøre Wuuö Jwøk aköö jï Odheea, ni «Cak nyeŋŋe ni Lö-ruama,[3] kiper aani bäŋ bäth ec mo nyoodha nyoodhø jï dhi øt Icriel këët, ni ge ba wëënna këët.

⁷'Ba aani, yia obäädha ki dhi øt Juuda, ni piema geni ki køør teek mara, a na Wuuö Jwøk, Jwøk marge, ni pïëm mara mano piema ge ki gø paa ka atheerø, wala ko opëëllö, wala leny, wala ko okwëënyi, wala ki jø wø këëdi ki bäät okwëënyi.»

⁸'Ba kanya ö Gömërri na ŋøl Lö-ruama ki caak, yie acäŋ jïtö ki dhaanhø mør ni lwaare ki gø na dïcwøø.

⁹Ni kö Wuuö Jwøki, ni «Cak nyeŋŋe ni Lö-ammi,[4] kiper u paa jiya, naa paa Jwøk maru.»

¹⁰'Ba kwään jø Icriel poot tïmö ni caala akwöny deŋ naama dwøŋ ni wø ba løny ki røm wala ki kwaan; ni købi ki geni, ni «Uuna wäät Jwøa kwøw;» yi paac mana wara købi jïge yie, no «U patha jiya.»

¹¹'Ba nyïïkwaac Juuda ki nyïïkwaac Icriel rege odwalge na aciel, ni kwänyge dëëtge ki dïbwödhi aciel ma marge; ni putge ö maal ki yi ŋöömö mana path. 'Ba dïcäŋögø otïmö ni beeye cäŋ mo dwøŋ kiper pääny mana cwøl ni Jedhriel.