Read anuak Odheea 10 Bible Online

Odheea 10 - anuak bible

Odheea 10

¹Jø Icriel atïmö kaamar jaath omøk mo oløth, ni jïte ki nyïëdi mo thööth. 'Ba kany wø tïm jammi moge ni thööth beeye kany wø tïïge ki gïï wø cïp olämme bäätge mo thööth; ni kany wø bëëny ŋöömö marge beeye kany wø cööthge piny ki kïte mo thööth mo wø lam.

²Cwïnyge bëëdö ni tïïya cwøk. 'Ba ennø, gïno duu raay moge jootge joodø. Wuuö Jwøk, gïï wø cïp olämme moge bäätge tøye tøyø, ni raany kïte moge moa näk ege cwöth piny na gïï lam.

³'Ba ka adïëri møn geno köö, ni «Waani jïwa bäŋ nyeya, kiper Wuuö Jwøk kärwa lwäärö. 'Ba wa këël doo bëëdö ni jïwa da nyeya, ?agïnaŋø noo duu nyeya dëëtwa?»

⁴Geni, ge cäänö ki luup mo oballe jaak, ni tutge ki luup, ni kööŋge bäätge ki kööŋ mo bäŋ tiere; kiper manøgønø, bëët bäŋ adïëri marge wø tuula wøk kaamar luum mo ree da cïm mo tuy yi pwödhö mo opuurö.

⁵Jø Cameria lwäyö kiper gïno tägi dëër gïna no otïïö na nyirøøa mar Bëëth-Awëën. Ka adïëri møn, jiye kïmmö kipere, ni ö dïlämme mo kït gïï wø lam ni gööge ko oduuru bääte kiper mano lwør ajiem mare baŋge noo kïthi paac mør.

⁶Gïnögø ki dëëre jø Aciria aay ki gø ni käärge käärö na muuy jï nyenyge na dwøŋ. Ni ö jø tuuŋ Ipariem, ni beege jø Icriel, ni putge nipäät, ni put wïthge lääö ki køør kït gïnögø ni wø lamge.

⁷Cameria ki nyeya mare ŋula wøk, ni putge tïmö kaamar duul jaath mo thäärö bäät pïï.

⁸Kwör lam moa en bäät thuuri mo Awën, na näk bee kwör wø tïï jø Icrielli yïthge ki raay, di raanynyø. Koodhi ko otwel tuy yïthge ni uumge gïï wø cïp olämme moge bäätge. Køøre nø, ge köö jï kïte, ni «Rïëpu wa!» Ni köge jï thuuri, ni «Buŋŋu wa!»

⁹Wuuö Jwøk aköö, ni «Jø Icriel, ki mana täge yi Giba, ge bëëdö ni ge temma raay, ni putge cääth nyïmge ki tïïc manøgø. ?Aŋø, bäŋ leny mo okëëlö ki jøøa tem raay yi Giba na bëëde?

¹⁰Kanyo manynya gø jaak, ge jääla jäälö; wïth juurre cooŋa cooŋø ki man tïïge ki gïn mo raac dëëtge, ni jääla ge kiper raay moge na thööth.

¹¹Ipariem caala nyirøøa mo opwönynyö mo yie met ki dïn beel. 'Ba ŋute na mïërö okïtha ki gïr puur ni pura ki gø. Ni ö Juuda ni pure, ni Jeekap tøga pøl.

¹²Piithu bëënynyö kiper dëëtu, ni kayu nyïëdi mo mëër mana näk ba jøøl, ni cäŋu pwöth mou puurru na akamme, kiper beeye kare ennø ki man many Wuuö Jwøk, këël kanyo ööe noo tïïc bëënynyö nee pädhe bäätu kaamar køth.

¹³'Ba uuna bëëdö nou piitha gïï mo reyø, ni kayu bäŋ ŋøl luup ma kare, ni cammu nyïëdi mo tööt. Kiper uuna bëëdö nou ŋäätha teek maru keeru, ki jø leny mou na thööth.

¹⁴Kiper manøgønø, okiera mar leny tägö dëët jø pou, ni ö kwör leny mou moa teek ni raanynyi, kaawat mana ö Calmen na raany Bëëth-Arbel ri leny, kanya ö mëëe na nyadhi na aciel ko obwöre moge.

¹⁵Wui, ï na Bëthël, teeŋ gïnögø tägö dëërï, kiper raay moï atïmö ni thööth døc. Kanyo tïme na kur øw mar dïcäŋeca, nyeya mar Icriel wïïe puta dïdö na bäre bäre.