Read anuak Odheea 2 Bible Online

Odheea 2 - anuak bible

Odheea 2

¹«Cwøllu nyïïmëëgu moa näk cwøw, ni ‹Jic Jwøk,› ni cwøllu nyïïmëëgu moa näk mään, ni ‹Jøøa nyooth bäth ec jïge.›

²«Köömmu miiu, köömmu eni, kiper eni paa cïïa këët, naa patha cwøre këët thuwø. Beerra man wec gath-dëël mare man wø nëëni täärnyïme, ni daak bëët käp mare yïthakic thure.

³'Ba ni näk mo ba tïïe, eni wëëga wääth ki dëëre, ni put tïmö ni bëëdö ka dëëre ni caala dïcäŋa lwaarø ki gø. Eni tïïa tïïö ni caala paap mo otal, ni tïïa gø ni caala ŋöömö ma tëën, ni puta eni 'näk ki riew.

⁴'Ba aani thuwø bäŋ bäth ec mo nyoodha jï obwöre moe, kiper geno obwöre mo gena nyïï kääbi.

⁵Kiper miige bëëdö ni gatha dëëre, ni eni jayi ka jöö mo määnö. Kiper ena köö, na ‹A cäädhö køør omëërri 'moa, ni wø cïp cam jïra, ki pïï, ka abïï ma cuup, ka abïï ma lïïna, ki maaw, ki gïn maadha.›

⁶'Ba kiper manøgønø, øt jööre cïëga cïëgö ki koodhi; ni geera deŋŋe ki kiir nee øt jööre ba joode këët.

⁷Eno rïïŋi køør omëërri moe ni ba mak ge; ni many omëërri moe ni ba joot ge. Køøre eno kööi, na ‹A døøa baŋ cwøra mana dïkwøŋ, kiper beerra bëëtö mara manece ki man ennø.›

⁸Kiper kuue ki man näk mo bee aani ni wø mooc gø ki beel, ki køøŋø mo met, ki maaw, ni wø cïp gwet-bïrö ki warkey ni thööth jaak jïgø, jap wø kønyge dëëtge ki ge ki man jiiŋge jwøge man wø cwøl ni Baal.

⁹«Kiper manøgønø, beel 'moa wara warø baŋe ni 'käla ge kanyo ciekge, ni wara køøŋŋa na met ni 'käla gø dïcäŋo kee. Aani thuwø abïï cuup mara ka abïï lïïna mara, moa cïba jïre nee dëëre uume ki ge kiper wääth-dëël mare, wara warø baŋe ni 'käla ge.

¹⁰'Ba aani, lään wïc mare wëëga nëënne jï omëërri moe, ni bäŋ ŋat mo piema gø cera.

¹¹Aani thuwø ajwöm moe bëët mo wø wøøre ŋøla ŋølø, ni beege ajwöm moe mo wø wøøre ki yi cwiir, ki wödö mare man wø wøør päär mar dwääy ki gø, ki man wø wøør cääŋŋe mo jwöm, ka ajwöm moe møga bëët moa no ocïp piny nee wø wøør.

¹²Jer omøki moe ki jer olämmi moe raanynya raanynyø, jer wø cääne kiperge, ni ‹Moi beege jammi moa maa ceŋ omëërri 'moa na cïpge jïra.› 'Ba geno tïïa na paap, ni puti ya lääc paapi cam ni thöörge ge.

¹³'Ba eno jääla kiper nïra beede ni lama jwø wø cwøl ni Baal, ni cïpö jïgø ko olämme; nïra beede ni wïïe owïl ki aani ni caatha køør omëërri moe, ni ïthe ee kïthö ki gwet-ïdhi, ni dëëre ee tïïö ni mïërö ki jap mïërö ma teeŋi. Luummögø caana aani, a na Wuuö Jwøk.

¹⁴«Kiper manøgønø, a cøøa kuna cäänna gø ki luup mo met, ni bwødha eni dïtëën ni cäänna gø ni met ec yaa nyoodhø jïre.

¹⁵Kanyøgønø pwöth omøki moe odwøga jïre kaace, ni tïïa goor Akör[5] na dhi øtø mar ŋäädhe. Eno wär ki duut ni caala mana bëëde ni ena nyakøø, ki kanya ö eni na ö wøk ki yi ŋööm Ijep.

¹⁶'Ba dïcäŋöca aano cwøle na ‹Acwørø›, ni ba cwøl a këët ni ‹Kwääya›. Luummögø caana aani, a na Wuuö Jwøk.

¹⁷Aani nyeŋ juuk wø cwøl ni Baal 'käla wøk dhee, nee nyeŋ juu moøge ba cøøri këët.

¹⁸Dïcäŋöca a tudö ki luubö ki lääc paap, ki weny mo maal, ki gïï wø muuli ki yïth ŋøøm. Aani, atheerø, ko opëëllö, ki leny, raanynya raanynyø yi ŋöömö, ni wëëga jiya niine jaak ni bäŋ gïn lääŋge.

¹⁹'Ba ïïni, ï miia miiø jïra na bäre bäre; ka adïëri møn, ï miia miiø jïra ki ra adïëri mara, ki ŋøl ma kare, ki køør mëër mara ni wø ba jøøl, ki bäth ec mara.

²⁰Aani, ï miia miiø jïra ki ra adïëri, ni ö ïïni ni tïmï ni Wuuö Jwøk ŋäyï.

²¹«'Ba dïcäŋöca a na Wuuö Jwøk lam mar jiya ma jø Icriel oløøa. Maal otïïa nee køth jääŋŋe piny,

²²ni ö pinynyi ni wëëk caammi tuuö, ni känne ki nyïëdi yi goor Jedhriel; ni beege beel ki kwøŋ ki mädhi.

²³Jiya ma jø Icriel tietge okëëlla piny ni teek yi ŋöömö. Bäth ec mara onyoodha jï jøøa näk bäth ec kär nyoodhø jïge, ni kööa jï jøøa näk patha jiya, ni ‹Uuna jiy 'moa!› Ni köge jïra, ni ‹Ïïna Jwøk marwa!› »