Read anuak Odheea 4 Bible Online

Odheea 4 - anuak bible

Odheea 4

¹Wui jø Icriel, cegu ïthu ki dwør Wuuö Jwøk, kiper Wuuö Jwøk jïre da løøk ki uuni, u ni bëëdö yi ŋöömö man en, ni luummaca bee en, ena köö, na «Atïmö ni bäŋ jø ŋäädhe, ni bäŋ mëër, ni bäŋ acaara ki man ŋäc Jwøk yi ŋöömö man.

²'Ba atïmö ni nuta acëënne, ki bëët tööt, ki 'näk jiy, ki bëët käw, ki bëët lugi. Jiy atïmö ni ge tïïya okiera, ni bëët remø ni øya piny cooth bäät rem møga.

³Kiper manøgønø, ŋöömö atal ni kïmme, ni ö jiyi moa bëëdö yie bëët ni öölge, ni rwöbe ka lääc paap ki wec maal bëët, ni ö reci moa en yi naama dwøŋ ni putge rwäänyö.

⁴«'Ba kär dee dhaanhø mo kïth bäät watge ki luubö, ni bäŋe ŋat mo jääl watge, kiper jø pou caala jiy mo wø pïëmö ki dïlämme.

⁵U bëëdö nou cwanynya tietu ki dïcäŋ ki wäär, ni ö nyïïkuk Jwøki ni cwanyge tietge ki uuni ciel. Kiper manøgønø, Icriel na caal miiu, raanynya raanynyø.

⁶Jiya araanynyi ki køør bäŋ kwänynyö. 'Ba kiper mana kweerru ki kwänynyö, u na dïlämme, aani thuwø, u kwiera kwierø ki man tïmu ni uuna dïlämme 'moa. Kiper mana wïl wïthu ki ciik 'moa, a na Jwøk maru, aani thuwø wïïa wïl ki nyïïkwaayu.

⁷«'Ba kanya nyaac dïlämme beeye kanya kaathge tïï raay dëëra. Aani, ajiem marge wiila wiilø na lään wïc.

⁸Geni, ge bëëdö ni ge cama rïŋ mo lääy mo wø cïp no olämme mo raay mo jiya, ni yïthge met ki man bëët jiyi ni ge tïïö ki raay.

⁹'Ba gïno tägi bee en, dïlämme jääla jäälö na aciel ki jiy kiper uutjïëthe moge, ni cunna geni ki køør tïïe moge.

¹⁰Geno cämö, 'ba ge ba jäŋ; geno bëëdö ki bëët käp, 'ba ge ba nyaay, kiper wïthge awïl ki Wuuö Jwøk.

¹¹«Tiet luup atïmö ni ba kwanyge kiper käp, ki maath kwøk nyïïomøki moa no oruu ki moa nyärö.

¹²Jiy atïmö ni pëënynya dhi jaath mana no otieŋø na kït gïn wø lam, ni ö athøra ni løk pïëc marge. Gena tïïc jwïëc käpi nee gaage wøk, ni putge bëëtö ni ge tïïya tïï käp, ni tïm karge ni bäär ki Jwøk marge.

¹³Geni, olämme moge wø cïpge cïbö wïth kïte, ni waaŋge olämme moge mo wø waaŋ bäre bäät thuuri ki tiet jenni moa no onigïït piny, kiper yïthge met ki tïïp moge. Kiper manøgønø, nyïïu ge bëëdö ki bëët käp, ni ö määr nyïïu ni bëëtge ni ge tïïya tïï luk.

¹⁴Aani, nyïïu ba jääla kanyo bëëtge ki bëët käp, ni määr nyïïu ba jääla kanyo bëëtge ni ge tïïya tïï luk, kiper cwøw ki dëëtge kiree ge cäädhi na aciel ki kääpe, ni ge cïpö ko olämme ki kääpe mo wø bëëdö ni ge tïïya tïï käp kwör lam. Kiper manøgønø, jiy mo tiet luup ba kwanyge, ge ränynyö.

¹⁵«Wui, ï na Icriel, këël na bëëdï niï tïïya tïï käp, Juuda kär näk cäŋa bääyö. Ni ba cou Gëlgela, wala maru ci maal Bëëth-Awëën, nou kööŋ, ni ‹Ŋëët Jwøa kwøw!›

¹⁶Jø Icriel wïnni kaamar nyirøøa mo wïnni. ?Aŋø, ennø, løny jï Wuuö Jwøk ki man kïth geni kar kwaath kaamar nyidiel mo ena yi pwöl kwaath mo yie laac?

¹⁷Ipariem dëëre anø cïbe ki man lam kït gïï wø lam; Wiiu eni kare!

¹⁸Këël kany wø bëëtge ni meerø oniwaany wïthge, ge poot bëëdö ni ge tïïö ki tïï käp jaak; ni dïbwöthe moge bëëdö ni mëër ki jïëth lään wïc marge.

¹⁹'Ba apwøyaweerø öö ni jwiec geni na bäre, ni ö olämme moge ni tïme ni duua lään wïc jïge.»