Read anuak Odheea 6 Bible Online

Odheea 6 - anuak bible

Odheea 6

¹«Ööu, nøø døø baŋ Wuuö Jwøk, kiper eni, øøna tøye møn na thäŋi, 'ba ø cäŋe ka kønynyø. Eni, dëëtø amooe møn ki ŋwiili, 'ba ŋwiili 'moø cäŋe ka bäyö.

²Eni dëëtø odwøk kare køør nïne ariiø, ni tïŋ ø maal ri dää nïne, nee ø bëëdø ni ø kwøw nyïme.

³Kiper manøgønø, beerra man ŋääø Wuuö Jwøk; beerra man reedhø ri man ŋääø eni. Öö mare caala man wø kwäär øwi, ni ö baŋø kaamar køth, ni caala køth mar dhi køth ni wø jwøc piny.»

⁴Wuuö Jwøk aköö, «?Wui, jø tuuŋ Ipariem, agïnaŋø noo tïïa ki uuni nø? Wui, jø tuuŋ Juuda, agïnaŋø noo tïïa ki uuni nø? Kiper mëër maru caala pøøl mo amöölla, ni caala thööy ni wø laar rwäänyö.

⁵Kiper manøgønø, uuna nø ŋøra na thäŋi ki køør ajäla mana caana ki dhøk nyïïkuk Jwøk, ni nø nääa uuni ki luubö mana cur dhaa; ni ö ajäla mara ni put nidaaŋ bäätu kaamar agaackøth.

⁶Kiper aani, yia wø met ki mëër mo ba jøøl ni kaala olämi man wø cïp, ni yia wø met ki man ŋäc aani, ni kaala olämi man wø waaŋ bäre.

⁷«'Ba kaawat mana tïïc kanya cwøl na Adam, geni luumma tuuda ki kwäcge akwierge, ni ge bëëdö ni nyeŋge ege døøc mo reegø ki aani, a na Jwøk.

⁸Gelät bee pääny mar jø wø tïïö ki gïï mo reyø, ni dïëre ogääbö ki kwör tiel mo ree dhäämmö ki rem.

⁹Kaawat man wø møør dïtwïëte piny ni ge kurö ki dhaanhø, lwaa dïlämme atïmö na dïnäk jiy øtjöör Cekam; ka adïëri møn, gena tïïö ki gïï mo reyø døc.

¹⁰Aani, gïn mo raac døc mo ec thäŋŋö ki gø ajooda dï jø Icriel. Jø Ipariem gena tïmö ni ge tïïya käp kaace, ni ö jø Icrielli ni putge nipäät.

¹¹'Ba u na jø Juuda thuwø, da dïcäŋ mo mar ajäla mo yaa cïp piny kiperu. Køør manøgønø, aano ööi ni dwøga gum dëël mar jiya kare.»