Read anuak Odheea 7 Bible Online

Odheea 7 - anuak bible

Odheea 7

¹«'Ba kany wø manynya gø nee jø Icriel kønya, ni beege jø tuuŋ Ipariem, ki pääny marge ma Cameria, raay moge ki tïïe moge moa reyø puta nëënne. Kiper ge bëëdö ka bëët tööt, ni kuuwe uudi tøcge tøyø, ni dïtwïëte bëëdö nyeŋ jïëthe ni ge twëëdö.

²'Ba ba caarge ki cwïnyge ki man näk mo japa reyø na tïïcge bëët wïïa para parø ki ge. Ge bëëdö ni geno ciel raayi moge dïër; ni raay moge ena nyïma naa raŋŋa geni.

³Yi nyeya tïïcge tïïö ni met ki japa reyø moge, ni tïïcge yïth kwääri ni met ki tööt marge.

⁴'Ba gena jø luuy ge bëët, mo cwïnyge lïëth kaamar buur maa dääpe man wø äp ŋat wø budö, ni wø wec ni wärri jaak këël kanyo kïth dääpe yie.

⁵'Ba kanya tïme na cäŋ ajwöma mar nyeya marø, kwääri gena meer ki køøŋø døc ni bøølge, ni ö eni ni makge ceŋge na aciel ki jø abuua.

⁶Kiper cwïnyge lëënhnhö kaamar këënnö, kany wø manyge tïïö ki gïn mo raac; gootø marge bëëdö ni duuŋ ki wäär bäre, 'ba noo tïme na amöölla puta liel kaamar maac.

⁷Ge bëët, ge bëëdö ni cwïnyge lïëth kaamar këënnö; dïbwöthe moge athöörge ki 'näk, ni ö nyeye moge bëët ni bëëtge ni geno päänhnhö no othøw. Bäŋgø dëëtge mo ocwøl aani.

⁸«Jø tuuŋ Ipariem dëëtge ajääpge ki wïth juurre, ni putge tïmö kaamar møø mo deel ka løøk aciel ni kär løø.

⁹Teek marge alwør jøøa pathi ni bäŋ gïn mo ŋäcge, këël mana tuc wïthge ki lwaar ni poot kucge.

¹⁰'Ba këël na bëët jø Icrielli na atöör marge okännö ka ajäla bäätge, ge kär jïëy ki man duuge baŋa, a na Wuuö Jwøk, Jwøk marge; naa kärge manynyø, këël na täk japøge bëët.

¹¹'Ba jø tuuŋ Ipariem gena tïmö kaamar akuuru ma acaara mare thiinh, mo ba cädö na wøp. Geni jø Ijep cwølge cwølø ennø, ni ge cäŋa døø baŋ jø Aciria.

¹²'Ba kanyo aacge yie man, ajääp mara peera peerø bäätge, ni tuuda ge piny kaamar wec maal; ge jääla jäälö ki køør japa reyø na tïïcge.

¹³Otïmö ni leth jïge, kiper mana paanyge rege buuta! Ränynyö oen bäätge kiper mana gëëmge ki aani! Gena manynya ki man piema geni, 'ba gena tïmö ni ge cara tööt kipera.

¹⁴Ge ba jwöŋi dëëra ki jwøk mo käla yïth cwïnyge kany wø gööge ko oduuru kwör niine moge. Kany wø lämge kiper caammi ki kwøk nyïïomøki, dëëtge ŋarge ŋarø, ni wecge aani.

¹⁵'Ba bee aani na pwöny geni, na mooc geni ki teek bäädi, 'ba ge poot tudö ki luup mo reyø kipera.

¹⁶Gena kweer ki man duuge baŋa, a na Jwøa dwøŋ, ni tïm bëëtö marge no okööm kaamar atheerø mo ree täpö. 'Ba dïbwöthe moge geno 'näk ko opëëllö, kiper cäänö marge man wø cäänge ni ge koorrø. 'Ba gïnögø oput duunnö ka abuua bäätge dï ŋööm Ijep.»