Read anuak Jool 1 Bible Online

Jool 1 - anuak bible

Jool 1

¹Man beeye dwør Wuuö Jwøk mana ö bäät Jool o Pethuël.

²Wui, u ni jø døøŋŋø ii, wïnynyu gïn! Cegu ïthu u bëët, u ni wø bëëdö yi ŋöömmi en! ?Aŋø, teeŋ gïn mo caala man en akwøŋ tägö cøøn yïth nïne mou, wala yïth nïra beet kwäyu?

³Beerra man lammu gø jï obwöre mou, ni ö obwöre mou ni lamge gø jï obwöre moge, ni ö obwöre moge ni lamge gø jï beenhnhe mo oööi.

⁴'Ni caammi 'moø moa bøth dhi bäänyö mana päl, acam bäänyö man wø ŋudö. Ni ö moa bøth dhi bäänyö man wø ŋudö, ni cami ya bäänyö man wø døø piny, ni ö moa bøth dhi bäänyö man wø døø piny, ni thööri bäänyö man wø räänyö.

⁵U na jø meerø ii, päyu ni jwöŋu; gööu ko oduuru u bëët, u na dïmäth kwøŋ, kiper køøŋŋa ŋweeth aniŋul dhøgu.

⁶Kiper bäänyö aöö mo caala wï jur mo teek, mo kwäänge ba thum, mo lakge caala lak ŋuu, mo lwönne moge caala lwönne mo maath ŋuu, ni raanyge ŋöömö marø.

⁷Jer omøki 'moø ko olämmi 'moø araanyge, ni pööge apøge wøk, ni leeŋge ge piny, ni dööŋ bäädi moge ni tar.

⁸Uuni, jwöŋu kaamar nyakøø mo keeca ee røø dëëre, mo jwøga cwøre mo poot na muda.

⁹Muuce mo beel, ki muuce mo kwøŋ bäŋgø mo kïtha yi Øt Wuuö Jwøk këët, ni dïlämme ni wø tïny Wuuö Jwøk, ge bëëdö ni ge kïmmö.

¹⁰Pwöth aränynyö, ni bëët ŋöömö ni jwöŋö. Beel aränynyö, ni ö jer omøki ni talge, ni ö jer wø nyïïge wel na maaw ni bäpge.

¹¹Wui jø puur, wïthu lääge. Wui jø wø piith omøki, gööu ko oduuru, ni kïmmu kiper beel mou, ni beege cïndë ki gäbci,[1] kiper caammi mo pwöth aränynyö.

¹²Omøki atal, ni ö olämmi ni bäpge. Adïkwäle, ki twöe, ki jenni møøk mo perge leth, ni beege jer pwöth bëët, atal. Ka adïëri møn, mïn ec mar jiy akääŋö.

¹³Wui, u na dïlämme, røøu keece dëëtu na abïïe, ni kïmmu; wui, u ni tïïc maru beeye cïp olämme bäät gïn wø cïp olämme bääte, gööu ko oduuru; wui, u ni wø tïny Jwøk mara, ööu ni thöörru wäär bäre ni keece ena dëëtu; kiper muuce mo beel, ki muuce mo kwøŋ bäŋgø mo kïtha yi Øt Jwøk maru këët.

¹⁴Uuni, gööyu piny ki cäŋ mo you cïp kur keere mo jiy ba cämö yie, ni cwötu ka acooŋa mo ena kur keere, ni cooŋŋu jø døøŋŋø yi Øt Wuuö Jwøk, Jwøk maru, ki jø wø bëëdö yi paac bëët, ni gööu ko oduuru dëër Wuuö Jwøk.

¹⁵'Ba otïmö ni raac kiper cäŋ mano ööi, kiper cäŋ mar Wuuö Jwøk kare acäännö. Cäŋögø öö na cäŋ aranya, ni käla baŋ Jwøa en teeki jïre.

¹⁶?Aŋø, cam kär raanynyø nyïmmø ni nëënö jïïø, ni ö met eci ki kanynyø ni tïmge ni bäŋgø yi Øt Jwøk marø?

¹⁷Köödhi atal piny yïth ŋøøm; uudi mo wø cooŋ beel yïthge bëëdö no oränynyö; ni ö odïïi ni bëëtge no oniruuth, kiper beel atal.

¹⁸A teeŋ cooyø mo nyïëdi na cooc lääyi ki gø! ni bëët dhäki ni thääyö jaak, kiper mana tïme ni bäŋ kwör kwaath jïge, këël dïëk thuwø acännö.

¹⁹Wui Wuuö Jwøk, a jwöŋö dëërï, kiper lïëth piny mo caala maac, kwör kwaath athööre dï paap, ni waaŋ jenni bëët moa en dï pwöla.

²⁰Këël lääc paap, ge bëëdö ni ge jwöŋö dëërï, kiper pïï moa en nyeŋ näm atal, ni ö lïëth pinynyi mo caala maac ni waaŋ dï paap kwör kwaath.