Read anuak Jool 2 Bible Online

Jool 2 - anuak bible

Jool 2

¹Uuni, koothu tuuŋ yi Dhayan, ni koothu ka bäät Kïn Wuuö Jwøk na en kur keere! Jø wø bëëdö yi ŋöömö bëët beerra man tïm dëëtge ni kwanynyi, kiper cäŋ mar Wuuö Jwøk öö; ka adïëri møn, kare aløny ni cään.

²Ni beeye cäŋ mo piny tïmö ni cøl, ni piny dhïïth, na cäŋ mo piny najïïm na lwøc, ni piny cøl døc. Bäänyö mo caala lwaa dhaanhø mo päl mo teek öö, ni dëëtge ege peerø ni caala man wø ö tiet cäŋŋi mo amöölla ni wø nëënge ni rege ege peerø ki bäät kïte, mo bäŋ teeŋe mo okwøŋ tägö mo caala gø, ni bäŋ teeŋe mo cäŋ tägö këët køør gø yïth cwiiri mo beenhnhe mo oööi.

³Maac bwödhö nyïmge ni räänyö, ni maac caatha køørge ni wääŋö. Kanyo poode dïkwøŋ, ŋöömö bëëdö ni caala ajïniina mana en Ëden nyïmge, 'ba kanyo tïme na køørge, ŋöömö ränynyö ni tïme na kaŋ, ni bäŋ gïn mo obøth dhøkge na bäre bäre.

⁴Geni, ge nëëni ni caala okwëënyi ni ge rïïŋi ni caala okwëëc leny,

⁵mo döötge wïnyö ni caala jïëth leny mo wø tut okwëënyi kany wø nigeluŋŋa ki bäät kïte, ni döötge wïnyö ni caala maac mo tinynyi kaamar man wø waaŋ thiek beelli, ni caala jø leny mo teek mo ojiiŋŋø kiper leny.

⁶Jiy cwïnyge obwøk døc nyïmge, ni ö täärnyïmge bëët ni nigeduk.

⁷Geni, ge rïïŋi kaamar jø leny mo teek ni ge ïïdhi kaawat man wø ö dëëci wø iithge kiir. Geni, ge cäädhi ni rege ege bwødhø, ni ge ba gaa wøk ki jöörge.

⁸Geni, dëëtge ba dhïrge; ŋati man nø caatha nyïme ni tiir. Ni kany wø nigerääc piny caala man wø ö jø lenynyi wø nigerääc piny dï jap leny ni tëëŋŋö marge ba gwäyi.

⁹Geni, ge lääta yi pääny, ni reŋge ri kiir, ni dønyge yïth uudi, ni päärge ki dhøk awëërnyeŋŋi kaamar kuuwe.

¹⁰Kanyo poode dïkwøŋ, piny ree di jäŋö nyïmge, ni ö maalli ni tïme ni kwanynyi, ni ö cäŋŋi ki dwääy ni tïmge ni cøl, ni ö ceerri ni ba rienyge këët.

¹¹Wuuö Jwøk dwøre omäri nyïm bäänyö na caal jø leny moe; ka adïëri møn, twïër marge dwøŋ døc, ni ge na jïëc dwør Wuuö Jwøk, ge teek døc. Ka adïëri møn, cäŋ Wuuö Jwøk dwøŋ, ni beeye cäŋ lwär. ?Aŋa ni løny jïre ki man jïëny gø?

¹²'Ba këël kawaane en, Wuuö Jwøk poot köö, ni «Duu baŋa ki cwïnynyu bäre, ni kwierru cam, ni jwöŋu, ni kïmmu.

¹³Tïmu nou cööta cwïnynyu ki kïmmö, ni patha abïïe mou.» Ennø, duu baŋ Wuuö Jwøk, Jwøk maru, kiper eni yie met, ni mëër ki jiy, ni bäŋ wø laar wëër, ni mëër mare ni wø ba jøøl päl, ni cwïnye wø di warø ki gïn mo leth.

¹⁴?Aŋa ni ŋäc gø? Kanymør ree di løø, ni war cwïnye, ni wëëk køøre ki gwïëth, ni jïtu ki beel ki kwøŋ mo løny ki man cïpu ge na muuce jïre, eni na Wuuö Jwøk, Jwøk maru.

¹⁵Uuni, koothu tuuŋ yi Dhayan, ni gööyu piny ki cäŋ mo you cïp kur keere, mo jiy ba cämö yie, ni cwötu ka acooŋa mo ena kur keere,

¹⁶ni cooŋŋu jiy, ni cïbu jø acooŋa kur keerge, nou cooŋa jø døøŋŋø kanya ciel, ko obwöre, ki moa mar na näk poot dhøøth kööthi. Beerra man ö cø dhaagø thiinh ni wec øde, ni ö dhaage thiinhnhi ni wec kar bëëtö mare.

¹⁷Beerra man ö dïlämme ni wø tïny Wuuö Jwøk, ni jwöŋge yïthakic gïn wø cïp olämme bääte ka agööl dhi Øt Jwøk, ni köge, ni «Wui Wuuö Jwøk, cwïnyï pädhe ki gïr jiyï, ni ba tïïyï jiyï na näk thöögï na gïr apääda, na gïr aŋaada dï wïth juurre. ?Aŋø, wïth juurre doo pëëö møn, ni ‹?Jwøk marge en kaa?›?»

¹⁸Køøre Wuuö Jwøk gïr ŋöömö mare tïmö ni päl cwïnye, ni päth cwïnye ki gïr jiye;

¹⁹ni ö Wuuö Jwøki ni løk mare ni kööe jï jiye, ni «Ka adïëri møn, aani, a cïpö jïïu ki beel, ki kwøŋ mo nyärö, ki maaw, mo rømø ki man jäŋŋu ki geni, ni ba tïïa u këët na gïr apääda dï wïth juurre.

²⁰Aani, lwaa bäänyö mana käl jï løø wï-piny enø, riema kany mo bäär ki uuni, ni riema gø yi ŋöömö mo lïëth ma tëën, ni ö moa bwödhö maal ni køøla geni yi Naam Acäbö jï løø kur tuul-cäŋ, ni ö moa en ŋää cään ni køøla geni yi naama dwøŋ na en jï løø kur pänh-cäŋ, ni ö ŋwääö marge na tïk ni keel piny, ni ö kwääö marge ni cääth maal, kiper ka adïëri møn, gena tïïö ki gïn mo teek.»

²¹Wui, u na jø paac, käru lwäär, yïthu mïnge ni kanynyu, kiper Wuuö Jwøk anø tïïö ki gïï mo døøŋŋø.

²²U na lääc paap, käru lwäär, kiper kwör cam mou moa en dï paap, anø lødhø ni marr, ni ö jenni ni nø nywølge ki nyïëdi, no olämmi ko omøki bäädi moge oløny ni ninør ki nyïëdi.

²³Wui, u na jø Dhayan, kanynyu, ni mïn yïthu ki Wuuö Jwøk, Jwøk maru, kiper eni køth mar dhi køth acïbe ki køør beenynye. Eni, køth akøny piny kiperu, ni beeye køth mar dhi køth, ki mar cwiir, kaawat mana bëëde dïkwøŋ.

²⁴Yïth laare tïmö ni päŋ ki beel, ni ö aguli ni bëëtge ni øya piny ki kwøŋ moa nyärö ki mädhi.

²⁵«A na Wuuö Jwøk, kar cwiiri moa raany bäänyö dëëtu coola coolø jïïu, ni beeye moa raany bäänyö mana päl, ki bäänyö man wø ŋudö, ki bäänyö man wø døø piny, ki bäänyö man wø räänyö, ge na thööth na caal jø leny 'moa na jääŋŋa baŋu.

²⁶Køøre, uuni, u cämö ki cam mo päl, ni jäŋŋu, ni pwøyu nyeŋŋa, a na Wuuö Jwøk, Jwøk maru, a noo tïïc gïn mo rëëma ec jïïu. Køøre u na jiya, wïthu ba lääy këët na bäre bäre.

²⁷Kanyøgø putu ka ŋäc naa ena dïïu, u jø Icriel, ni aana Wuuö Jwøk, Jwøk maru, ni bäŋ mør këët, ni u na jiya, wïthu ba lääy këët.

²⁸«'Ba noo tïme na køør gïïögø, aani, Jwïëy 'moa kïtha bäät jiy bëët, ni ö wäätu ki nyïïu ni køpge dwøra, ni ö jäle mou ni läkge ki lääk, ni ö wøpe mou ni neenge jammi mo nyïm mo wø nyooth ki yi wïc.

²⁹Këël jø tïïc moa näk cwøw ki mään, Jwïëy 'moa kïtha bäätge yïth nïreke.

³⁰«Aani, a nyuuthö ki gïï mo rëëma ec maal ki piny, ni beeye remø, ki maac, ki jïrö mo onitul.

³¹Cäŋ ree di wiilø ni cøl, ni ö dwääyi ni tïme na remø, kanyo poode ni cäŋa dwøŋ mara, a na Wuuö Jwøk, cäŋo täk lwärri yie poot kär öö.

³²'Ba gïno tägi, ŋato cøør nyeŋŋa, a na Wuuö Jwøk, di piemø, kiper ki køør mana caana, a na Wuuö Jwøk, da jiy mo bøth ni kwøw bäät Kïn Dhayan, ni beeye Jerucalem, ni moo bøth ni kwøw beege moo cwøla, a na Wuuö Jwøk.