Read anuak Amøc 3 Bible Online

Amøc 3 - anuak bible

Amøc 3

¹Uuni na jø Icriel, wïnynyu luummi en na caan Wuuö Jwøki dëëtu, na caane dëët jø dhi øt Icriel bäre moa käl wøk ki yïth ŋøøp Ijep. Ena köö,

²ni «Beege uuni keeru na näk yaa jierø røk tuŋi bëët moa en bäät piny; kiper manøgø nø, aano ööi ni cunna uuni ki køør gïïa reyø bëët na tïïyu.»

³?Aŋø, jiy ariiø ocääthge na aciel nidïï, ni näk mo gïr wääth kärge tuudö?

⁴?A ŋuu märö jaak dï paap, ni näk mo bäŋ lääy mo päär baŋ gø? ?Wala ŋuu köök jaak ni ena kar bëëtö mare, ni näk mo bäŋ lääy mo ee maa?

⁵?Aŋø, wenyø mak abïëpi maaø, ni näk mo bäŋ abïëp mo ociiø? ?Wala abïëp napäta jaak, ni näk mo bäŋ gïn mo ogut gø?

⁶?A ni näk tuuŋ okoodhø dï paac kiper leny, dëët jiy bëët ba kwanynyi? ?Aŋø, ni näk gïn mo raac ööa bäät paac, paa Wuuö Jwøk møn na tïïc gø?

⁷Kiper Wuuö Jwøk bäŋ gïn mo tïïe jaak ni gïna näk ee cooŋø ki cwïnye käre caanø jï laaŋe na näk nyïïkuk moe.

⁸'Ba ennø, ŋuu anø määr; ?A ŋata ŋa ni ba lwäyi? Wuuö Jwøk mare anø caane; ?Aŋa no män ree ki man køp luummögø?

⁹Beerra man caannu gø jï jøøa bëëdö kwöra teek na en yi Acdöt ki moa en Ijep, ni kööu, ni «Cooŋŋu dëëtu bäät kït Cameria, ni neennu okiera mana en dïëre, ki gïïa leth na temmi dëët jiy.

¹⁰Jøøgø tïïc gïn mo beer kucge, jøøa näk jap twëër ki gïïa jaaŋge ceŋ jiy ege cooŋ piny yïth uudi moge na teek.» Beeye Wuuö Jwøk ni cäänö enø.

¹¹Kiper manøgø nø, Wuuö Jwøk aköö na ennø, ni «Nyïïmän, ŋöömö maru otiigi dïër, ni raanyge teek maru, ni twierge yïth uudi mou na teek.»

¹²Ni kö Wuuö Jwøki na ennø, ni «Ka teeŋ mano ö dïkwääyi ö käl tiel ariiø ki thääŋ ïth diel wøk ki dhi ŋuu, jø Icriel mo wø bëëdö Cameria oränynyi na enø nø thuwø, jøøa wara bëëdö ni dëëtge ege nyaaŋ piny bäät pëëmme mo opeedhø ka abïïe mo mïërö.»

¹³Wuuö Jwøk eni na wïth jammi bëët acäänö na ennø, ni kööe, ni «Wïnynyu mara, ni caannu gø dëët jic Jeekap.[2]

¹⁴Kiper dïcäŋo ööa ni jääla jø Icriel kiper gïïa bacge, gïï wø waaŋ olämme bäätge moa en Bëthël oraanynya, ni ö tuk gïï wø waaŋ olämme bäätge ni ŋøri ni päthge piny yïth ŋøøm.

¹⁵Ni raanynya uudi moa en paac ki moa en gool bëët, ni ö uudi mo oŋwagø ki lak lïëy ni raanynyi, ni ö uudi moa døøŋŋø ni nyaai piny.» Beeye Wuuö Jwøk ni cäänö enø.