Read anuak Amøc 6 Bible Online

Amøc 6 - anuak bible

Amøc 6

¹Otïmö ni raac jïïu, u ni bëëdö ki bëëtö mo jööt jaak yi Dhayan, ki uuni ni cädö ni karu beer yi Cameria, uuni na kwöru døøŋŋø yi paana kare dwøŋ na näk Icriel, u ni wø cääth jø pou baŋu kiper køny.

²Cou ni pööthu Kalnë ni raŋŋu gø; køøre nø, wäru cou Amath paana dwøŋ, ni putu løøc piny yi Gëth po jø Pilitin. ?Aŋø, kadha geni ki jøøi ni en kany ii? ?Wala thöötha ŋøøm moge ki mou?

³U wø köö ni dïcäŋa raac kare poot bäär, 'ba dïcäŋa raac nyïïu nyïïö, ni wëëgu pou päth ceŋ jiy mo tïïya gïï mo reyø dëët jiy.

⁴Otïmö ni raac jïïu, uuni ni wø buut bäät pëëmme mo oŋwagø ki lak lïëy, nou ŋeella dëëtu kwör niine mou; uuni ni wø cämö ki nyïïdïëk ki nyïïrøøe moa näk olør.

⁵Uuni ni wø cäŋ dëëtu ki dudi kaamar Deebit, ni wärru geni ki thøme.

⁶Uuni ni wø maath kwøk nyïïomøki ka arööt mo døøŋŋø, ni wïïrru dëëtu ki mädhi mo ŋwäänyge met, 'ba u ba kïmmi kiper ränynyö mar jø Icriel.

⁷Kiper manøgø nø, uuno tïmö na jø okwøŋ käl røk jø omak ki tøŋ, ni ö ajwöm mou ki ŋeel røk kwör niine mou ni tïmge ni bäŋgø.

⁸Wuuö Jwøk, eni na wïth jammi bëët, akööŋ dëëre keere ni kööe, na «A män ka atöör mar jic Jeekap, ni yia raac ki uudi moge na teek; kiper manøgø nø, pääny marge ki gïïa en yie bëët ocïba ceŋ nyïïmän moge.»

⁹Kar kaace, ni näk da jiy apaar mo odööŋ yi øtø aciel, ge puta thøø.

¹⁰Køøre, kanyo ö tuuŋ jøøgø no kälge dëët jiy wøk kiper nee koonyge, ŋata en yi øtø tääŋtiel opëënyge ni köge, ni «?Da dhaanhø moo dööŋ buutï këët nø?» Noo kö ŋatøgø, ni «Bäŋgø,» køøre jøøa pëëö puta köö, ni «Lïŋï nø, kiper nyeŋ Wuuö Jwøk bäŋa døø cwølø.»

¹¹Adïëri møn, Wuuö Jwøk mare di caanø, ni ö uudi moa døøŋŋø ni nyaa ge piny, ni raany uudi moa therø.

¹²?Aŋø, okwëënyi rïïŋö ki bäät kïte? ?Wala da ŋat mo puura naam ki dhäk? 'Ba uuni ŋøl ma adïëri awiillu, ni tïïyu gø ni raac kaamar cïm, ni døøyu gïïa beyø mo reyø.

¹³Uuna tïmö nou töödö kiper mana magu pääny Lödebaar, nou cäänö thuwø, ni «Kaarnam amakwa ki teek marwa.»

¹⁴'Ba Wuuö Jwøk, eni na wïth jammi bëët, aköö, ni «Uuni na jø Icriel en, jø leny mo tier paac mør owëëga ööny maal bäätu, ni tïïge dëëtu ki gïï mo leth dï pou bäre, ni tägi ka Amath këël mano këët waŋ Araaba.»