Read anuak Amøc 8 Bible Online

Amøc 8 - anuak bible

Amøc 8

¹Man beeye gïna cäŋ Wuuö Jwøki nyoothø jïra ki yi wïïa; aana nyuunhnhe ki gupa mo päŋ ki nyïïjenni mo ociek.

²Ni kööe, ni «?Amøc, agïnaŋø ni nëëni jïrï enø?» Ni kööa, ni «Beeye gupa mo päŋ ki nyïïjenni moo ciek.» Køøre Wuuö Jwøk aköö jïra, «Aŋuun nïr jiya ma jø Icriel apäŋ kaamar nïr nyïïjenni mo ociek. Ennø, ge ba wiia këët.

³«Dïcäŋöce dudi moo wär po nyeya otïmö na mo jwøk thøø. Ni gääp pinynyi bäre ki dëët jøøa no othøw, ni tuut geni wøk ni bäŋ dwøl mo wïnyi.» Beeye Wuuö Jwøk ni cäänö enø.

⁴Wïnynyu gïn, uuni ni wø thiel jøøa can piny, ni dïïrru wïth jøøa näk oööl dï paac bäre,

⁵ni kööu ki cwïnynyu keeru, ni «?Cäŋ ajwöma mar dwääni na päär en opöödhe yi wäne, kiper nee wa døøwa baŋ gath ki beel? ?A cäŋ jwömö opöödhe yi wäne thuwø, kiper nee beel kïthwa kar ŋïëw, nee gïr røm tïïcwa ni thiinh, ni tïïcwa gäte ni teek, ni møtwa jiy ki rumi mo paa kare,

⁶ni dwøkwa omate mo beel pwödhö; nee ŋata näk jïre bäŋ gïrpiny ŋeewa ki gwel, ni ŋeewa ŋata can ki tier warø jaak?»

⁷Wuuö Jwøk ni wø jït jic Jeekapi ka atöör kipere akööŋ dëëre keere, ni kööe, ni «Røk gïïa tïïcge bëët bäŋ gïn mo wïïa wïl ki gø.

⁸Ni beeye tiere no tïm pinynyi ni jäŋŋi, ni ö jøøa en yie bëët ni kïmge. Ni tïm dëër paaci bäre ni kwanynyi, ni tïme kaamar naam Ijep ni wø päŋ ni døøe.»

⁹Man beeye mana caan Wuuö Jwøki, ena köö, ni «Dïcäŋöca cäŋ owëëga pädhö ki dhöör, ni wëëga piny tïmö na muudhö ki dïcäŋ.

¹⁰Nïr ajwöm mou odøøya nïr kïmmö, ni døøya dut met ec mou mo oduuru. Ni wëëga uuni bëët käär abïïk keece ni nyootha kïmmö maru, ni wïthu ogwäär wøk; dïcäŋöce uuno tïïa nou caala dhaanhø mo kïmmö kiper nyilaal mare ma aciel keere, ni tïm aŋuun dïcäŋöce na pänh cwïny jïïu.»

¹¹Man beeye mana caan Wuuö Jwøki, ena köö, «Nïne dagø mo öö, maa jääŋŋö ki käc dï pou, ni käc manøgø paa mar bäŋ cam, wala kiper riew mar bäŋ pïï, 'ba beeye käc mar bäŋ wïny luum Wuuö Jwøk.

¹²Ni tïm jiyi ni thääyö jaak, ni ge tägi ki jï løø kur tuul-cäŋ, ni ge cøøa jï løø kur pänh-cäŋ, ni pööthge wï-piny ki jï løø kur tuul-cäŋ; ni ge läägö ni ge manynya luubö mo käla baŋ Wuuö Jwøk, 'ba bäŋgø mo jootge.

¹³Dïcäŋöce këël nyïïakuue mo mïërö ki cwøw mo wøpe näk riewi nääö.

¹⁴Jø wø kööŋ dëët juu mo Cameria, ni wø köö, ni ‹Ŋëët Jwøa en Daan,› wala ‹Ŋëët Jwøa en Bëërcïïba,› jøøgø pädhö ni ge ba duu maal këët.»