Read anuak Amøc 9 Bible Online

Amøc 9 - anuak bible

Amøc 9

¹Kwäärö Wuuö Jwøk ajooda ni cuŋŋö buut gïn wø cïp olämme bääte, ni kööe, ni «Gøøc were mo øt lam këël mano tïm dëër øtø ni jäŋŋi, ni tøc were ni päthge wïth jiy; køøre jiy moo dööŋ nääa nääö ri leny, ni bäŋe ŋat mo reŋi rege, ni bäŋ dhaanhø aciel mo bøth dëëtge.

²Këël ge doo dønynya yi kar bëët jwïëc jøøa no othøw, geno käla wøk kaace ki cera; këël ge doo cøøa maal, geno duua piny ki kunöce.

³Këël røkge dige kana wï Kïn Karmël, ge manynya manynyø ni käla ge wøk ki kaace; këël røkge dige kanø ki aani yi naama dwøŋ kany mo päŋ døc, thwöl mana en tiet pïï köömma köömmö ni kaac geni kaace.

⁴Këël ge doo maa ki tøŋ ni kïth geni paac mør, geno wëëga näk ki tøŋ kunöce. Ni raŋŋa jïge ki waŋ mo raac ni patha waŋ mo beer.»

⁵Wuuö Jwøk, eni na wïth jammi bëët, piny di gudö ni put tïmö ni jäŋŋi, ni ö jø wø bëëdö yie bëët ni kïmge; Ni tïm pinynyi bäre ni kwöda maal ni døøa piny, kaamar naam Ijep ni wø päŋ ni døøe.

⁶Wuuö Jwøk paare ee geerø maal, ni tïïc maal na rëëbi bäät piny. Bee eni ni wø cwöl pïï wøk ki yi naama dwøŋ, ni wëëk gø pädhö bäät ŋøøm; eni na tïïc gïïögø bëët, beeye Wuuö Jwøk ki dëëre.

⁷Man beeye mana caan Wuuö Jwøki, ena köö, na «?Aŋø, u na jø Icriel, u ba caal jø Ithiöpia ki baŋa? U na jø Icriel, uuna käla wøk ki yi Ijep; këël jø Pilitin thuwø akäla wøk ki yi Kaptör, ni käla jø Aram wøk ki yi paana cwøl ni Kir.

⁸'Ba ennø, a na Wuuö Jwøk, nyeŋŋa ena bäät paac man wø tïïc raay, ni raanynya gø na bäre bäre bäät piny. 'Ba nyïïkwaac Jeekap ba raanynya bëët.» Beeye Wuuö Jwøk ni cäänö enø.

⁹«'Ba ennø, aano cïpi ki dwøl, ni jiera jø Icriel moa en dï juurre kaawat man wø pieth beel ki luul, ni bäŋ waŋ aciel mo päth piny.

¹⁰Jøøa näk jø raay bëët dëët jiya, othøw ri leny, jø wø köö, ni ‹Gïn mo raac ba pïï dëëtwa.›

¹¹«Da dïcäŋ mo öö mo wï po Deebit mana no opädhö tïŋa maal, ni dwøga kwöra näk oränynyö karge, ni cäŋa gïïa näk oränynyö geerrø, ni dwøga gø kare kaawat mana bëëde dïkwøŋ.

¹²Køøre nø, jøw moa dööŋ dëët jø Ëdöm, ki juurre bëët moa no ocwøl ri nyeŋŋa, otïmö ni ena ceŋ jø Icriel.» Beeye Wuuö Jwøk ni cäänö enø, ni bee eni noo tïïc gø.

¹³Wuuö Jwøk aköö, ni «Da cääŋŋe mo öö, mo beel ciek ni thööth, ni jiy poot kää ni kar puur manynya man täge, ni jiy cäŋa tägö ki pïïdhö ni nywøp kwøk nyïïomøki poot kär thum. Ni tïm nyïïjenni ni thööth, ni pïïge tøøna piny ki bäät kïte, ni löönynya piny ki bäät thuuri.

¹⁴Jiya ma jø Icriel moa näk omaa ri leny oduua poge, ni cäŋge wïth mïëri moa no oränynyö geerrø, ni bëëtge yïthge; ni piithge jer omøki, ni maathge kwøk gø; ni tïïge ka ajïniine ni camge nyïïjer gø.

¹⁵Tiet jiya okëëlla piny yïth ŋøøm moge, ni bäŋ ŋat mo daak ge këët yïth ŋøøm moge moa cïba jïge.» Gïnögø caana Wuuö Jwøki Jwøk maru.