Read anuak Kwään Jiy 11 Bible Online

Kwään Jiy 11 - anuak bible

Kwään Jiy 11

¹Kar kaagø jiy atïmö ni ge dwaallø kiper teek bëëtö. 'Ba na wïnynyi ya Wuuö Jwøki, ena wëër; ni ö maaci mar Wuuö Jwøk ni liele dïge, ni waaŋ løøk mør deŋ twïër.

²Ni ö jiyi ni jwöŋge dëër Modhe; 'ba Modhe alämö jï Wuuö Jwøk, ni ö maaci ni thøøe.

³Køøre nyeŋ kaace aput cak na Tabëëra, kiper mana ö maa Wuuö Jwøki na liele dïge kaace.

⁴'Ba wïth juurre ma teeŋi moa en dï jø Icriel, cwïnyge atïmö ni päl kiper cam; ni ö jø Icrielli thuwø ni cäŋge jwøk, ni köge, «?Aŋa noo cïpi jïwa ki rïŋö mo camwa?

⁵Waani, wïthwa aparwa ki rec moa wara camwa Ijep ni ba ŋeew, ki bathiki, ki bacalli, ki bacal thum.

⁶'Ba ennø, teek marwa anø aay, ni bäŋ gïn mør mo raŋwa; 'ba beeye cami na meena[9] keere en.»

⁷'Ba meena caala nyeŋ köödhi mo therø, ni kïte caala kït buudi.

⁸'Ba jiy wø cøø ni kwaanyge gø; køøre guurge guurö ki kïdi, wala wälge wälö ki pany; ni thaalge gø ki dak, ni tïïcge gø na dääpe. 'Ba mete caala met dääpe mo odeelø ki maaw.

⁹Kar kaace, kanya wara täk thööy ki wäär dï twïër, meena wø ööa piny na aciel ki gø.

¹⁰Kar kaace Modhe dööt jiy awïnynye ni ge jwöŋö yïth atude moge, ni ŋati man nø cuŋŋö dho oduŋkaara mare. Ni ö Wuuö Jwøki ni wëëre døc. 'Ba Modhe yie atïmö ni raac, ni goote thuwø.

¹¹Køøre Modhe aköö jï Wuuö Jwøk, na «?Aŋø na tïïyï gïn mo raac dëër laŋŋï en? ?Na agïnaŋø ni yaa baa ni leeŋï jøøi bëët bääta ni caala tëër mo peek en?

¹²?Aŋø, jøøi bëët ii yaa käärö ki yia ni nywøla ge? ?Aperŋø nø ni kööï jïra en, ni käära geni ki kööra, kaawat man wø ö dïpïdi wø käär nyilaal mo dhøøth, ni kïtha geni yi ŋöömma buugï jï wëëkge?

¹³?A känna kaa ki rïŋö mo mëëga jøøi bëët ii? Kiper ge jwöŋö dëëra ni köge, ni ‹Mooc wa ki rïŋö mo camwa.›

¹⁴'Ba ennø, ba løny jïra ki man käära jøøi bëët a keera, kiper geni ge caala tëër mo peek bääta.

¹⁵'Ba ni näk gïnögø poot tïïyï tïïö dëëra, beerra man putï a 'näk. 'Ba ni näk mo yiï met ki aani, put aani 'näk møn, nee can mano tägi dëëra nee ba jooda këët.»

¹⁶Køøre Wuuö Jwøk aköö jï Modhe, ni «Cooŋ jiy ma pïërabïriiø jïra røk jø døøk Icriel moa ŋäyï, ni beege jø døøŋŋø moa näk dïbwöthe moge. Käl geni buut oduŋkaany røømmø, ni wëëgï geni cuŋŋö ki ïïni na aciel kaace.

¹⁷Køøre aano ö piny ni cääna ki ïïni kaace, ni lwöta ri Jwïëc Jwøk na en bäätï ni kïtha gø bäätge; ni ö geni ni käärge jiy na aciel ki ïïni, ni ba käära ïïni keerï këët.

¹⁸«Køøre wär caanï jï jø Icriel bëët, ni ‹Døøyu dëëtu mo waany kiper diøø, nou cämu ki rïŋö. Kiper uuna jwöŋö ni wïnynyi ya Wuuö Jwøki, kanya kööu, na «?Aŋa noo mooc wa ki rïŋö mo camwa? Kiper kanya bëëtwa Ijep bëëtö marwa beer.» 'Ba ennø, Wuuö Jwøk ocïpi jïïu ki rïŋö nee cammu;

¹⁹nou ba cämö ki dïcäŋ aciel, wala nïne ariiø, wala nïne abïïc, wala nïne apaar, wala nïne ma pïërariiø keerge.

²⁰'Ba u cämö ki dwääy bäre, gøøc mano tuny wøk ki ummu ni tïm cwïnynyu ni cøl ki gø, kiper na kwierru Wuuö Jwøk na en dïïu, ni jwöŋu dëëre ni kööu, na «?Aperŋø na öwa wøk ki Ijep?» › »

²¹'Ba Modhe aköö, ni «Jiy moi ni ena dïge ii beege jiy ma kume ma dïpe abïciel ma cwøw tøŋ; 'ba ïïna köö, ni ‹Aano cïpi ki rïŋö nee camge ki dwääy bäre.›

²²?Aŋø, lwaa pïïth dïëk ki lwaa pïïth dhäk di ŋaalø jïge ni rømge bëët? ?Wala lwaa rëëö bäre mana en yi naama dwøŋ doo cooŋa kanya ciel jïge ni rømge bëët?»

²³'Ba aløk Wuuö Jwøki jï Modhe, na «?Aŋø, a na Wuuö Jwøk, bada atïmö ni ba bäär na bëëde cøøn enø? Ojootï kawaane nø ki man näk luubö mara thura kare na adïëri kiperï wala ba thur kare.»

²⁴Køøre Modhe adøny wøk ni caan luup mo Wuuö Jwøk jï jø Icriel; ni cooŋ jiy ma pïërabïriiø røk jø døøŋŋø moge, ni wëëk geni cuŋŋö lak oduŋkaara bäre.

²⁵Ni ö Wuuö Jwøki ni put ö piny ni ena yi pöölö, ni cääne ki Modhe, ni lwöte ri Jwïëc Jwøk na en bäät Modhe, ni kïth gø bäät jø døøk Icriel moa näk pïërabïriiø. 'Ba kanya ö Jwïëc Jwøki bäätge, dwør Jwøk aputge køp. 'Ba køp dwør Jwøk kärge nwøø këët.

²⁶'Ba kar kaace, da jiy ariiø mo odööŋ twïër; na aciel nyeŋŋe Eldat, ni maya nyeŋŋe Mödat. 'Ba ge ena dëët jøøa näk nyeŋge ogöörö, ni ge kär ci buut oduŋkaara. Ni ö Jwïëc Jwøki ni pïïe bäätge, ni putge dwør Jwøk køp dï twïër.

²⁷'Ba nyen mør mo poot na wøp areŋ baŋ Modhe ni kööe, ni «Eldat ki Mödat ni køp dwør Jwøk yi twïër ice.»

²⁸Køøre Jøcua o Nun, na näk ŋat wø bëëdö ni kønya Modhe ki tïïc ki mana käl thïnhö, aköö, na «Wui Kwäärö Modhe, män geni.»

²⁹'Ba aløk Modhe jïre, na «?Aŋø ni tïme ni këëö ïïni na kara en? Kiper doo beer ki man ö jic Wuuö Jwøki bëët ni tïmge na nyïïkuk Jwøk, ni ö Wuuö Jwøki ni kïth jwïëye bäätge.»

³⁰Køøre Modhe ki jø døøk Icriel adøø twïër.

³¹'Ba na tïme na kaagø, jamø akwönnö ki baŋ Wuuö Jwøk, ni kööl ajwëëyi ki lak naama dwøŋ, ni wëëk geni määdö lak twïër, ni karge cään ki ŋøøm, na aŋuunge ki mana täkge lak twïër okëët kany mo bäye caala wääth man wø caath dhaanhe ki waŋcäŋ aciel bäre, ni bäc løø twïër maya caala gø thuwø.

³²Ni ö jiyi ni thöörge waŋcäŋöca ki wäänöca ki waŋcäŋ maya ni ge maaŋŋa ajwëëyi. Ni ŋat mo maga mo nøk jïtö ki kömerri apaar.[10] Ni määcge geni deŋ twïër bäre.

³³'Ba kanya poode ni rïŋ poot tiet lakge, ni poot kärge thöörö, wëëc Wuuö Jwøk aö bäät jiy; ni ö Wuuö Jwøki ni käl täw mo leth døc bäät jiy.

³⁴Køøre nyeŋ kaace acwøl ni Kibïröth-Ataba, na näk tiere beeye Bwöc-Päl-Cwïny, kiper beeye kanya koony jiy yie moa cwïnyge päl kiper cam.

³⁵Ni ö jiyi ni tïŋge ki Kibïröth-Ataba, ni cige Adhëëröth ni bëëtge yie.