Read anuak Kwään Jiy 14 Bible Online

Kwään Jiy 14 - anuak bible

Kwään Jiy 14

¹Køøre lwaak bäre ajwöŋö ni döötge ege tïŋ maal, ni ö jiyi ni gööge ko oduuru wäänöca.

²Ni ö jø Icrielli bëët ni ŋurge ki nyeŋ Modhe ka Aran, ni ö lwaaøgø bäre ni köge jïge, na «?Aŋø ni ba tïme kere wa thøøa Ijep wala dï paabi en?

³?Aperŋø ni ö Wuuö Jwøki ni käl wa yi ŋöömmi en ki man thøøwa dhi tøŋ? Waani, mään mowa ko obwöre mowa di maaø ki tøŋ jaak. ?Aŋø, ba theemma man døøwa Ijep nø?»

⁴Ni cäänge yïthakicge keerge, ni köge, ni «Beerra man jëëtø ki kwääc lwaak, nøø døø Ijep.»

⁵Køøre Modhe ka Aran rege agøøge piny ni nëënö jï acooŋa mar lwaa jø Icriel bäre.

⁶Ni ö Jøcua o Nun ki Kalëp o Jöpöni, na en dëët jøøa liew ŋøøm, ni jeecge abïïe moge ki gootø.

⁷Ni köge jï lwaa jø Icriel bäre, ni «Ŋöömma liewa ni cääthwa dïëre beeye ŋöömö mo beer døc.

⁸Ni näk Wuuö Jwøk mëër ki øøni, ø kïthe yi ŋöömmögø ni caak ki maar kïc päl yie enø, ni mëëk gø øøni.

⁹'Ba kär røgu thïïŋŋu dëër Wuuö Jwøk, ni ba lwäyu ki jø paanøgø, kiper ge böötø böötö ki jöö mo jööt jaak. Kiper gëëŋi marge onø daak, ni Wuuö Jwøk ena buutø; käru lwäyö ki geni.»

¹⁰'Ba lwaak bäre atïmö ni manynya man këërge geni ki kïte. 'Ba kar kaagø ajiem Wuuö Jwøk aput nëënne jï jø Icriel bëët yo oduŋkaany røømmø.

¹¹Ni kö Wuuö Jwøki jï Modhe, «?A ki kany mo nyïëdi nø noo poot jøøi ii naa poot ege taaø? ?A ki kany mo nyïëdi ni pootge naa ba ŋääthge en, këël na bëëde ni ŋïïce mo døøŋŋø yaa tïïö dïge?

¹²'Ba ennø, ge raanynya raanynyø ki täw mo leth, ni døøya ïïni wï paac mo dwøŋ mo teeka eni døc ki geni.»

¹³'Ba aløk Modhe jï Wuuö Jwøk, ni «Jøøi akälï wøk ki dï jø Ijep ki teek marï. 'Ba ni näk da gïn mo tïïyï tïïö dëët jøøi møn, kanyo ö jø Ijepi noo wïnyge gø,

¹⁴køpge købø jï jø bëëdö yi ŋöömmi en. 'Ba ennø, Awuuö Jwøk, onø wïny jø bëëdö yi ŋöömmi en niï ena dï jøøi, ni wïnyge gø thuwø ni riï iï nyoodhø niï nëënö, ï na Wuuö Jwøk, ni pöölö marï na näk ree ee wenyø cuŋŋö bäätge, niï cäädha nyïmge yi pööllögø ki waŋcäŋ, ni cäädhï nyïmge ki wäär thuwø yi pöölla näk ree ee wenyø ni liel kaamar maac.

¹⁵Ni näk jøøi bëët 'nägï nääø kaamar dhaanhø aciel, køøre mïëri moa näk gïrï ege nø wïnynyö, geno köö,

¹⁶ni ‹Kiper na ba lønye jï Wuuö Jwøk ki man kïth jøøi yi ŋöömma kööŋe kipere ni cïbe cïbö jïge, beeye tiere na nää geni dï paap.›

¹⁷«'Ba ennø, a kwaya ïïni, Awuuö Jwøk, nee teek marï na dwøŋ nyoothï kaawat mana caanï, ni kööï,

¹⁸ni ‹A na Wuuö Jwøk a ba laar wëër, ni mëëya ni wø ba jøøl päl, ni ŋat mo obääyö ki ŋat ma adhala wëënna wëënnö. 'Ba ŋat raay poot ba wiia ka ajäla, ni raay moa tïïc wëëe poot coola coolø dëët obwöre moge, këël mano pïïe dää beenhnhe wala ŋweer beenhnhe.›

¹⁹'Ba ennø, a kwaya ïïni nee raay mo jøøi nee wëënnï ki køør mëëyï na dwøŋ ni wø ba jøøl, kaawat mana wëënnï geni ki mana täge ki kanya öge wøk ki Ijep këël kawaane ennø.»

²⁰Køøre Wuuö Jwøk aköö, ni «Gena wëënna ki køør mana caanï.

²¹'Ba ka adïëri møn, kaawat man bëëda naa kwøw en, a na Wuuö Jwøk, ajiem mara bäät piny bäre opääŋe.

²²'Ba jiy moa pääny aani kwöre apaar, ni kärge dwøra wïnynyö, këël na jootge ajiem mara ki ŋïïce 'moa na tïïa Ijep ki dï paap,

²³bäŋ dhaanhø aciel dïge mo neen ŋöömma kööŋa kipere jï wëëkge; ni bäŋ ŋat mo joot gø røk jøøa taak aani.

²⁴'Ba dhaanhnha ma Kalëp okïtha yi ŋöömma ci yie, ni tïme na mar nyïïkwaaye na bäre bäre, kiper mana bëët jwïëye ni ena kur keere, ni caath køøra ki cwïnye bäre.

²⁵'Ba uuni, kiper mana näk jø Amalëk ki jø Keenan ge bëëdö yïth gøli mo ŋöömmögø, diøø røgu wär løgu ni cou dï paap nou cøra jöö mano ci Naama Kwaar.»

²⁶'Ba Wuuö Jwøk acäŋ köö jï Modhe ka Aran,

²⁷«?A këël kany mo nyïëdi noo ö lwaaki man ni raac en noo ŋure ki nyeŋŋa? Aani, ŋurö mar jø Icriel mana ŋurge ki nyeŋŋa ki gø awïnynya.

²⁸'Ba ennø, caanï jïge ni Wuuö Jwøk aköö, ni ‹Kaawat man bëëda naa kwøw en, gïïa caannu na wïnynya tïïa tïïö ni dwøga gø dëëtu.

²⁹Uuno thøw ni dööŋ dëëtu dï paap kany. U na no okwaanø bëët, na näk cwiiri mou tägi ka pïërariiø këël moa näk kaala pïërariiø, ni beege u jøøa ŋurö ki nyeŋŋa,

³⁰bäŋ dhaanhø aciel dëëtu mo ö yi ŋöömma kööŋa kipere nou bëëdu yie; 'ba beeye Kalëp o Jöpöni ki Jøcua o Nun keerge noo ci yie.

³¹'Ba obwöre mou, moa wäŋŋu ni di maaø ki tøŋ, geno kïtha yi ŋöömmögø, ni jootge ŋöömma kwierru.

³²'Ba uuni, uuno thøw ni dööŋ dëëtu dï paap kany.

³³Ni ö obwöre mou ni tïmge na dïkwääc dïëk ki cwiiri ma pïëraŋween dï paap, ni jwørge gïï mo leth kiper mana weyu aani, këël mano thummu ki thøø bëët dï paap.

³⁴Ki køør kwään nïne moa liewu ŋøøm ki geni, nïra näk pïëraŋween, ajäl gïïa bayu jwørru jwørø ki cwiiri ma pïëraŋween, ni tïm cwiirri man nø na kar dïcäŋ aciel, ni jootu gootø mara.

³⁵Ennø, a na Wuuö Jwøk, mara anø caana; 'ba ka adïëri møn, gïnögø tïïa tïïö dëër lwaak man ni raac en na cooŋ dëëtge kanya ciel kipera. Ge thum ni thøøge dï paabi.› »

³⁶Kanyøgønø, jøøa jääŋ Modhe kiper nee ŋöömö liewge gena thøw, ni beege jøøa duuö na tïïc lwaak bäre ni ŋurö ki nyeŋ Modhe kiper na caange waac mo reyø kiper ŋöömö;

³⁷ni thøwge ka ajäla mo leth nyïm Wuuö Jwøk.

³⁸'Ba ki røk jøøa aay na liew ŋöömö, Jøcua o Nun ki Kalëp o Jöpöni adööŋ ni kwøw.

³⁹Køøre Modhe gïïa caan Wuuö Jwøki jïre acaane jï jø Icriel bëët, ni ö jiyi ni kïmge døc.

⁴⁰Ni møølge ka aruunnø ni ge cøø mïëya en bäät kïte, ni köge, ni «Waana bääyö. 'Ba ennø, waana ö nee wa ciwa kanya caan Wuuö Jwøki.»

⁴¹'Ba Modhe aköö jïge, na «?Aperŋø na dhallu dwør Wuuö Jwøk en? Ennø, wääth maru ba thur kare.

⁴²Käru cøø, nou ba bööt nyïïmännu, kiper Wuuö Jwøk tøør dïïu.

⁴³Jø Amalëk ki jø Keenan ena nyïmmu kaace. U pätha ceŋge ni 'näkge uuni, kiper uuna døø ŋäthu ki man caathu køør Wuuö Jwøk. Wuuö Jwøk tøør buutu këët.»

⁴⁴'Ba gena ci bäät kïdi yïth mïëya en bäät kïte ki wïthge jaak, ni Modhe ka acanduk man wø nyooth luumma tuut Wuuö Jwøki ki jiy odööŋ twïër.

⁴⁵Køøre jø Amalëk ki jø Keenan moa bëëdö mïëya en bäät kïte, gena öö ni böötge jø Icriel ni riemge geni këël mana pïïcge Örma.