Read anuak Kwään Jiy 15 Bible Online

Kwään Jiy 15 - anuak bible

Kwään Jiy 15

¹Køøre Wuuö Jwøk acäänö ki Modhe, ni kööe,

²ni «Caanï jï jø Icriel, ni ‹Kanyo pïïyu yi ŋöömma cïba jïïu na kanyo bëëdu yie,

³u doo cïpö ko olämme mo wø waaŋ bäre jïra, a na Wuuö Jwøk, ni beege olämme mo käla røk pïïth dhäk wala dïëk. Olämme moøgø beege mo wø waaŋ bäre wala mo waaŋŋa thääŋŋe, ni cïp kaper kööŋ mana kööŋö ki gø, wala cïp ka køør met ec, wala cïp kiper ajwöm mou moa näk nïne moge ocïp piny, nee tïme na gïn mo ŋwäänynye met jïra, a na Wuuö Jwøk.

⁴'Ba a na Wuuö Jwøk, gïno tïïyu jïra bee en, ŋat wø känni ko olämi, wär cïpe jïra ki muuy mar beel, ni beeye møø mo pøøth ma rumi aciel mo lwørra røk rumme apaar moa en yi rumi mana cwøl ni iipa,[14] mo ojääbö ki maaw ma rumme ariiø mo lwørra røk rumme abära moa en yi rumi mana cwøl ni in.[15]

⁵Ni jiiŋ muuy thuwø mar køøŋ nyïïomøki ma rumme ariiø mo lwørra røk rumme abära moa en yi rumi mana cwøl ni in. Moøgø beege gïïo jiiŋŋe kiper nyidiel man wø cïp no olämi man wø waaŋ bäre.

⁶« ‹'Ba ni näk olämi beeye nywø røømmø, muuy mar beel wär jiiŋŋe, ni beeye møø mo pøøth ma rumme ariiø mo lwørra røk rumme apaar moa en yi rumi mana cwøl ni iipa, mo ojääbö ki maaw ma rumme adäk mo lwørra røk rumme abära moa en yi rumi mana cwøl ni in;

⁷ni cïp muuy thuwø mar køøŋ nyïïomøki ma rumme adäk mo lwørra røk rumme abära moa en yi rumi mana cwøl ni in, nee tïme na gïn mo ŋwäänynye met jïra, a na Wuuö Jwøk.

⁸« ‹'Ba kany wø jiiŋ rwaath jïra, a na Wuuö Jwøk, no olämi man wø waaŋ bäre, wala olämi man wø thääŋŋe waaŋ kiper kööŋ, wala olämi man wø thääŋŋe waaŋ ni wø duunni ki mëër,

⁹ŋatøce wär cïpe ki muuy mar beel, ni cïbe ka rwaath na aciel, ni beeye møø mo pøøth ma rumme adäk mo lwørra røk rumme apaar moa en yi rumi mana cwøl ni iipa, mo ojääbö ki maaw ma rumme aŋween mo lwørra røk rumme abära moa en yi rumi mana cwøl ni in;

¹⁰ni cïp muuy thuwø mar køøŋ nyïïomøki ma rumme aŋween mo lwørra røk rumme abära moa en yi rumi mana cwøl ni in, ni beeye muuy man wø waaŋ ki maac, nee tïme na gïn mo ŋwäänynye met jïra, a na Wuuö Jwøk.

¹¹« ‹Moøgø beege gïïo tïïc kiper rwaath wala nywø røømmø wala nyi røømmø wala nya ateea mano cïp no olämi.

¹²Kanyo jiiŋŋu olämme moøgø, rumi mar beel wär tïïyu ni röömi ki kwään lääc paac moo cïpu.

¹³« ‹Jøøa näk wäät thwöth paac bëët kany wäro cïpge olämme mo wø waaŋ, nee tïmge na gïï mo ŋwäänyge met jï Wuuö Jwøk, gïïögø otïïcge ki øtjöö ma enøgønø.

¹⁴'Ba ni näk da jur mo bëëdö dïïu, kany wø cïpe ko olämi man wø waaŋ mo ŋwäänynye met jï Wuuö Jwøk, wär tïïe kaawat man wø tïïyu.

¹⁵'Ba u na lwaa Icriel, otïmö ni da ciik aciel kiperu ki juurre mo wø bëëdö dïïu, ni beeye ciik mo bëëdö cooth këël yïth beenhnhe mou moo ööi. Uuni ki juurre moø ni bëëdö dïïu yøø, u poot ni uuna aciel bëët ki nyïm Wuuö Jwøk.

¹⁶'Ba ennø, otïmö ni da ciik aciel ki jöö aciel man wø ŋøl luubö ki gø kiperu këël jur mo bëëdö dïïu.› »

¹⁷Køøre Wuuö Jwøk acäŋ cäänö ki Modhe, ni kööe,

¹⁸ni «Caanï jï jø Icriel, ni kööï, ni ‹Kanyo pïïyu yi ŋöömmo kïtha u yie,

¹⁹ni bellu cam mana no ociek yi ŋöömmögø, wäru cïpu ki muuce jïra, a na Wuuö Jwøk.

²⁰Ki røk caammi mo wø tïïc ni beel poot nyärö, wäru cïpu ki dääpe oceele na muuce røk beel mo wø kwøŋ dïn.

²¹Ki røk caammi mo wø tïïyu røk beel moa nyärö cooth, wäru cïpu ki muuce jïra, a na Wuuö Jwøk; ni bëët gïnögø ni di tïïö këël ki yïth beenhnhe mou bëët moo ööi.

²²« ‹'Ba uuni kanymør ciik moa caana jï Modhe tïmö ni ba tïïyu, ni bayu ge ni ba kammu,

²³ni beege gïïa caana jïïu bëët ki dhi Modhe, ni tägi ki kanya cïba ciik dïkwøŋ, këël ki yïth beenhnhe mou.

²⁴Ni näk mo lwaa Icriel bäre obääyö ni ba kamge, lwaak bäre wär cïpe ki rwaath aciel no olämi man wø waaŋ mo ŋwäänynye met jïra, a na Wuuö Jwøk. Muuy mar beel ki muuy mar køøŋ nyïïomøki dige cïbö thuwø ki rwaath na aciel ki køør ciik; ni cïpge nywø ateea aciel no olämi mar raay.

²⁵Ni ö dïlämi ni cïp lääyögø no okïdi kiper lwaa Icriel bäre. Køøre geno wëënni, kiper mana bääcge ni ba kamge, ni cïpge ko olämi man wø waaŋ jïra, a na Wuuö Jwøk, ko olämi mar raay kiper gïna baacge.

²⁶Køøre lwaa Icriel bäre ki juurre moa bëëdö dïge owëënni, kiper beeye gïna baac jiyi bëët ni ba kamge.

²⁷« ‹'Ba ni näk dhaanhø aciel keere obääyö ni ba kame, wär cïpe ki maath ateea mo cwiine aciel no olämi mar raay.

²⁸Ni ö dïlämi ni cïp gø no okïdi nyïma, a na Wuuö Jwøk, kiper ŋatøgø na bääyö ni ba kame enø, ni wëënni ki køør okïdi manøgø.

²⁹'Ba ciik otïmö na aciel bäre kiper ŋat wø bääyi ni ba kame, këël doo naa ena thwønh Icriel wala jur mo bëëdö dïge.

³⁰« ‹'Ba ŋat wø bääyi ni di kamø, këël doo naa ena thwønh paac wala jur, eni janynya aani, a na Wuuö Jwøk. Ŋatøgø wär tïme ni tøør yïthakic jø poge.

³¹Eni doo tïmö ni tøør yïthakic jø poge møn, kiper luubö mara ataae, ni kaal ciik 'moa; 'ba gïna baae odøø dëëre.› »

³²Kanya bëët jø Icrielli ni ge ena dï paap, gena jïtö ki dhaanhø mo möödö ki jenni ki cäŋ jwömö.

³³Køøre jøøa joot gø ni möödö ki jenni, ena kälge baŋ Modhe ka Aran ki lwaak bäre.

³⁴Ni kïthge gø kar tööc, kiper gïno tïïc ki teeŋ ŋatøgø poot kär nyoodhø na kare.

³⁵Køøre Wuuö Jwøk aköö jï Modhe, ni «Ŋatøgø doo nääö møn. Eni doo këër lwaaki bäre ki kïte wøk ŋää twïër.»

³⁶Køøre lwaak bäre ŋatøgø akïthge wøk ŋää twïër ni këërge gø ki kïte këël mana thøøe, kaawat mana ö Wuuö Jwøki na kööm Modhe.

³⁷Køøre Wuuö Jwøk acäŋ cäänö ki Modhe, ni kööe,

³⁸«Cäänï ki jø Icriel, ni köömmï geni kiper nee tïïge ko okuri mo tïïc ka waare, ni twöge geni ceŋ abïïe moge ki waare mo kïtge caala kït abïcøle.

³⁹'Ba okuri moøgø otïmö na gïï par wïc kiper ciik 'moa, a na Wuuö Jwøk; ni kany wø neennu geni, wïthu oparru ki ciik 'moa ni jïëyu geni, kiper nou ba gaau wøk køør jap wø neetu, ki gïï wø manynyu ki cwïnynyu jaak, kaawat man wø tïïc kääbi.

⁴⁰Køøre wïthu oparru ki man tïïyu ciik 'moa bëët, ni bëëdu nou ena kur keeru ni uuna 'moa, a na Jwøu.

⁴¹Beeye aani na Wuuö Jwøk na näk Jwøu, na käl uuni wøk ki yi ŋööm Ijep, kiper naa puta bëëtö ni aana Jwøu. Beeye aani na Wuuö Jwøk na näk Jwøu.»