Read anuak Kwään Jiy 16 Bible Online

Kwään Jiy 16 - anuak bible

Kwään Jiy 16

¹'Ba dïcäŋ aciel Köra, na näk wär Icaar na käl dhi øt Kät na näk o Libay, atudö ki jiy adäk mo käla ri nyïïkwaac Ruben, ni beege Daathan ka Abiram na näk wäät Eliap, ko Ön na näk o Paalet.

²Jøøgø ki wäät Icriel ma dïpe ariiø ki pïërabïïc rege athïïŋge dëër Modhe, ni gena jiy mo ojierø na kwääc lwaae, ni nyeŋge owïnyö.

³'Ba geni rege acooŋge kiper Modhe ka Aran ni köge jïge, «Wui, maru ka akadhø nø; kiper jø lwaak bëët beege jiy mo ena kur keerge ni gena mo Wuuö Jwøk, ni ö Wuuö Jwøki ni en dïge. ?Aperŋø nø ni tïïyu rou nou døøŋŋø bäät lwaa Wuuö Jwøk?»

⁴'Ba kanya ö Modhe na wïny gïnögø, ree agøø piny.

⁵Køøre ena cäänö ki Köra ki jøøa cäädhe ki geni, ni kööe, ni «Diøø ka amöölla Wuuö Jwøk ŋata näk ee jierø na mare na näk ee cïp kur keere onyoodhe, ni tïïc gø nee nyänh buute. Eni ŋato jiere otïïe nee nyänh buute.

⁶'Ba ïïni na Köra en ki jøøa cäädhu ki geni, tïïyu gïn; lwørru athääk jwëëlli mo mäc,

⁷ni kïthu yïthge ki mäc ki gïn wø jïye ŋwääi ni met, ni cïbu ge nyïm Wuuö Jwøk diøø. Køøre ŋato jier Wuuö Jwøki obëëdö ni ena kur keere na mare. Uuni, u na nyïïkwaac Libay, maru akadhø nø.»

⁸Køøre Modhe aköö jï Köra, ni «Wïnynyu gïn, uuni na wäät Libay.

⁹?Aŋø, ki jïïu atïmö ni beeye gïn mo thiinh jaak ki mana ö Wuuö Jwøki, Jwø Icriel, na jier uuni dï lwaa Icriel, ni käl uuni buute, kiper nee oduŋkaanynye tïnynyu? ?Aŋø, atïmö ni beeye gïn mo thiinh thuwø ki jïïu, ki mana ö Wuuö Jwøki na thïïŋ uuni nyïm lwaak kiper nee ge tïnynyu?

¹⁰Eni uuna käl buute ki nyïïmëëgu bëët moa näk nyïïkwaac Libay. ?Aŋø, u manynya gø thuwø nee tïï dïlämme en ceŋŋu?

¹¹'Ba gïna tïïyu en, uuni ki jøøa cäädhu ki geni, beeye thïïŋ røk dëër Wuuö Jwøk. ?Aŋø, Aran aŋa, ni ŋuru ki nyeŋŋe en?»

¹²Køøre Modhe ajääk baŋ Daathan ka Abiram na näk wäät Eliap nee cwøl. 'Ba gena köö, ni «Wa ba ööi.

¹³?Aŋø, ki jïrï ni beeye gïn mo thiinh ki mana kälï wa wøk ki yi ŋöömma näk caak ki maar kïc päl yie nee wa nää dï paap kany? ?Ï poot manynya man tïïyï dëërï na kwäärö bäätwa thuwø?

¹⁴Maya thuwø, wa kärï kïth yi ŋöömma näk caak ki maar kïc päl yie; këël pwöth beel ka ajïniine bäŋgø mo iï cïbö jïwa na mowa. ?Aŋø, ï manynya man tïïyï jiy na cööye? Jïwa bäyö, wa ba ööi.»

¹⁵'Ba Modhe awëër døc. Køøre ena köö jï Wuuö Jwøk, ni «Kär niï jïëy ki muuy marge. Bäŋ gïn mo yaa lwørø baŋge, këël arëën aciel, ni bäŋ gïn mo leth mo yaa tïïö dëëtge.»

¹⁶'Ba Modhe aköö jï Köra, ni «Ïïni ki jøøa cäädhu ki geni, wäru nutu nyïm Wuuö Jwøk diøø, ni beeye ïïni ki geni, këël Aran thuwø.

¹⁷Ni ö ŋati man nø dëëtu ni lwør athaanh maac mare ni kïth yi gø ki gïn wø jïye ŋwääi ni met, ni ö ŋati man nø ni käl athaanh maac mare nyïm Wuuö Jwøk, ni beege athääe moa näk dïpe ariiø ki pïërabïïc. 'Ba ïïni, ï na Köra, ka Aran, athääe mo mäc mou wär kälu thuwø.»

¹⁸Køøre ŋati man nø athaanh maac mare alwøre, ni kïth yi gø ki maac, ni kïth gïn wø jïye ŋwääi ni met bääte thuwø, ni öge ni cuŋge ki Modhe ka Aran na aciel dho oduŋkaany røømmø.

¹⁹'Ba kanya ö Köra na cooŋ lwaak bäre, ni thïïŋge rege kiper Modhe ka Aran dho oduŋkaany røømmø, ajiem Wuuö Jwøk aput nëënne jï lwaak bäre.

²⁰Køøre Wuuö Jwøk aköö jï Modhe ka Aran,

²¹ni «Paanynyu rou buut lwaaøgø, kiper nee ge thööra ennø.»

²²'Ba Modhe ka Aran rege agøøge piny, ni köge, ni «Wui Jwøk, ïïni na Jwø jwïëy mo jiy bëët, ?aŋø, ni näk mo bääya dhaanhø aciel, ï doo wëër ki lwaak bäre?»

²³Ni kö Wuuö Jwøki jï Modhe,

²⁴ni «Caanï jï lwaak, ni kööï, ni ‹Paanynyu rou buut kwör bëëte mo Köra ki Daathan ka Abiram.› »

²⁵Køøre Modhe aö maal ni ci baŋ Daathan ka Abiram, ni ö jø døøk Icriel ni läpge køøre.

²⁶Ni cääne ki lwaak, ni kööe, ni «Paanynyu rou buut oduŋkaare mo jøøi ni reyø ii, ni bäŋe gïn gutu ma marge, kiper nee u ba rwöp ajäla mano pïï bäätge ki køør raay moge.»

²⁷Kar kanyøgø nø, lwaak rege aputge paany buut kwör bëëte mo Köra ki Daathan ka Abiram. Ni ö Daathanni ka Abiram ni öge wøk ki määrge ki wäätge ko obwöre moge moa therø, ni cuŋge dhøk oduŋkaare moge.

²⁸Ni kö Modhe, ni «Ki ri gïn en, oŋäyu ni beeye Wuuö Jwøk na jääŋ aani kiper gïïögø bëët nee tïïa, ni ba tïïa ka wïïa keera.

²⁹Ni näk jøøi thøw kaawat man wø thøw jiyi møga, ni gïïo tägi dëëtge poot caala mo wø tägi dëët jiy møga thuwø, tïmö ni paa Wuuö Jwøk këët na jääŋ aani.

³⁰'Ba ni näk mo Wuuö Jwøk tïïö ki gïn mo nyään, ni ö jøøi ni thøwge ki jöö man, ni ŋøøm pääŋŋa rege ni mwøny geni ki jammi moa näk moge bëët, ni cige kanya näk kar bëët jwïëc jøøa no othøw na cwøl ni Ciöl ni ge poot kwøw, køøre oŋäyu nø ni jøøi ii Wuuö Jwøk ege taaø møn.»

³¹'Ba kanya lønye ki caan luupögø bëët, piny acööt ki kanya cuŋ jøøgø yie,

³²ni ö ŋøømmi ni pääe ki dïge, ni mwøny geni ki jø mïëri moge, ki jic Köra bëët, ki jammi moge bëët.

³³Ni ö geni ki japa en jïge bëët ni cige kanya näk kar bëët jwïëc jøøa no othøw na cwøl ni Ciöl ni ge poot kwøw; ni ö ŋøømmi ni cïëkge rege bäätge, ni putge thøø, ni rwäänyge na bäre bäre dï lwaak.

³⁴Ni ö jø Icrielli bëët moa en buutge ni bwøkge ko oduuru mana gøøcge, ni köge, ni «Reeŋø kiper nee ø ba mwøny ŋøømmi thuwø.»

³⁵Ni put maaci öö ki baŋ Wuuö Jwøk thuwø, ni thöör jøøa näk dïpe ariiø ki pïërabïïc moa cïpö ki gïna näk jïye ŋwääi ni met.

³⁶Køøre Wuuö Jwøk acäänö ki Modhe, ni kööe,

³⁷ni «Caanï jï Eliedhar wär Aran na näk Kwääy Lam Mana Dwøŋ na athääe mo mäc kwäny wøk ki dï jiy moa waaŋ maaci, ni køny cuk wøk ni keeth ge, kiper athääe moøgø gena gïï mo ena kur keerge na mo Jwøk.

³⁸Athääe moøgø atïmö ni ena kur keerge kanya cïp ge nyïm Wuuö Jwøk. Kiper manøgønø, athääe mo jøøgø na thøw ki køør raay moge yøø, wär thääth ni reep, nee tïme na rëëbi mar gïn wø cïp olämme bääte. 'Ba rëëbi manøgø otïmö na nyuudhi jï jø Icriel.»

³⁹Køøre athääk jwëëlli moa cïp jiyi moa waaŋ maaci alwør Eliedharri na näk dïlämi, ni thääth ge na rëëbi mar gïn wø cïp olämme bääte,

⁴⁰nee tïme na gïr par wïc jï jø Icriel, kiper nee bäŋe dhaanhø mør jaak, mo paa nyikwaar Aran, mo maara nyänh kany mo cään ki man waaŋ gïn wø jïye ŋwääi ni met nyïm Wuuö Jwøk, nee ba tïme kaamar Köra ki jiye. Gïïögø atïïc Eliedharri kaawat mana ö Wuuö Jwøki na kööm eni ki ri Modhe.

⁴¹'Ba na tïme na aruunnø man, lwaa Icriel bäre aŋurö ki nyeŋ Modhe ka Aran, ni köge, «Uuni, jic Wuuö Jwøk anägu.»

⁴²'Ba kanya ö lwaaki na cooŋge rege kiper Modhe ka Aran, geni bëët nyïmge aløøge baŋ oduŋkaany røømmø, ni jootge pöölö no oduŋkaara ee uumö, ni ö ajiem Wuuö Jwøki ni nëëne.

⁴³Køøre Modhe ka Aran gena ö nyïm oduŋkaany røømmø,

⁴⁴ni kö Wuuö Jwøki jï Modhe,

⁴⁵ni «Paanynyu rou dï lwaai, kiper nee ge thööra ennø.» Ni ö Modhe ka Aran ni gøøge rege piny.

⁴⁶Ni kö Modhe jï Aran, ni «Lwør athaanh maac marï, ni kïthï yie ki maac mo käla bäät gïn wø cïp olämme bääte, ni kïthï bääte ki gïn wø jïye ŋwääi ni met, ni laarï gø kïth baŋ lwaak, ni wëëgï bääyö marge wëënnö. Kiper wëër mar Wuuö Jwøk oløny ni ena bäät jiy, na ajäla mare onø tägö.»

⁴⁷Køøre Aran athaanh maac mare alwøre, kaawat mana caan Modhe jïre, ni reŋ dï lwaak, ni joot ajäl Jwøk no onø tägö dëët jiy. Ni kïth gïn wø jïye ŋwääi ni met ya athaanh maac, ni wëëk bääyö marge wëënnö.

⁴⁸Ni cuŋŋe yïthakic jøøa no othøw ki jøøa kwøw, ni ö thøøe mana tägö ki køør ajäl Jwøk ni cuŋŋe.

⁴⁹'Ba kwään jiy moa thøw ki køør ajäl Jwøk beege kume apaar kurŋween ki dïpe abïriiø, ni jøøa kwøŋ thøø ri Köra tøør rege.

⁵⁰Køøre, kanya cuŋ thøwøgø, Aran adøø baŋ Modhe dho oduŋkaany røømmø.