Read anuak Kwään Jiy 17 Bible Online

Kwään Jiy 17 - anuak bible

Kwään Jiy 17

¹Køøre Wuuö Jwøk acäänö ki Modhe, ni kööe,

²ni «Cäänï ki jø Icriel, ni lwötï ka athøre apaar kurriiø baŋ dïbwöthe mo dhøk uut tuŋi moge, ni dïbwödhi man nø cïpa athøra aciel kiper dhi øt tuuŋ mare. Ni göörï nyeŋ ŋati man nø ra athøra mare;

³ni göörï nyeŋ Aran ra athøny jø tuuŋ Libay. Kiper doo da athøra aciel jï dïbwödhi man nø kiper dhøk uut tuŋi moge.

⁴Ni kïthï athøre moøgøøni yo oduŋkaany røømmø nyïm acanduk man wø nyooth luumma tuut Jwøki ki jiy, ni beeye kany wø røømma yie ki ïïni.

⁵'Ba athøra mar ŋato jiera, oløth. Ki køør gïnögø nø, ŋurö man wø ŋur jø Icrielli ki nyeŋŋu, ni beeye man wø këët raa thuwø, ojwøa.»

⁶Køøre Modhe acäänö ki jø Icriel, ni ö dïbwöthe moge bëët ni cïpge ka athøre apaar kurriiø, ni dïbwödhi man nø cïpa athøra aciel na kar dhi øt tuuŋ mare, na athøra mar Aran thuwø ena dïge.

⁷Ni ö Modhe ni kïth athøre nyïm Wuuö Jwøk yo oduŋkaany wø nyooth luumma tuut Jwøki ki jiy.

⁸'Ba na tïme na aruunnø man, Modhe adøny yo oduŋkaany wø nyooth luumma tuut Jwøki ki jiy, ni joot athøny Aran na näk mar jø tuuŋ Libay no oløth, no othiew, no ojïtö ki nyïëdi mo ociek.

⁹Køøre Modhe athøre bëët akäl wøk ki nyïm Wuuö Jwøk ni peeth ge nyïm jø Icriel bëët. 'Ba jøøgø athøre aneenge, ni ö ŋati man nø ni lwør athønynye.

¹⁰Køøre Wuuö Jwøk aköö jï Modhe, ni «Dwøk athøny Aran nyïm acanduk man wø nyooth luumma tuut Jwøki ki jiy, nee bëëde na nyuudhi jï jø wø gëëmö, kiper nee ŋurö marge man wø ŋurge ki nyeŋŋa nee joogï, nee ge ba thøwge.»

¹¹'Ba gïïögø bëët atïïc Modhe na karge, kaawat mana ö Wuuö Jwøki na kööm eni.

¹²Køøre jø Icriel acäänö ki Modhe, ni köge, ni «Neenï, waana thøw, waana ränynyö, ni putwa ränynyö karwa bëët.

¹³Kiper ŋat wø nyänh buut oduŋkaany Wuuö Jwøk jaak, thøw. ?Aŋø, wa puta thumö ki thøø bëët møn ennø?»