Read anuak Kwään Jiy 18 Bible Online

Kwään Jiy 18 - anuak bible

Kwään Jiy 18

¹Køøre Wuuö Jwøk acäänö ka Aran, ni kööe, na «Ajäl gïï mo patha karge mo wø tägi yo oduŋkaany røømmø ki ri tïï japa en kur keerge oen bäätï ki wäätï ki dhi øt wäru bäre. Këël ï na Aran, ajäl gïï mo patha karge mo wø tägi bëët ki ri tïï dïlämme oen bäätï ki wäätï u keeru.

²'Ba ïïni thuwø, käl jø tuuŋ kwaru, ni beege jø tuuŋ Libay ni poot na tuuŋ wäru, nee dwätge ki ïïni, nee ï tïnyge kany wäro näk ïïni ki wäätï u tïnynya oduŋkaany wø nyooth luumma tuut Jwøki ki jiy.

³Geni, ïïno tïnyge, ni gwøkge tïïe mo oduŋkaara bëët; 'ba ge ba doo maara nyänh buut japa en kur keerge wala gïn wø cïp olämme bääte, kiper nee geni ki uuni bëët nou ba thøwu.

⁴Ni ge doo dwätö ki ïïni, ni tïnyge oduŋkaany røømmø, kiper tïïe mo wø many oduŋkaara bëët; 'ba doo bäŋ ŋat mør jaak mo nyänh buutu.

⁵«Ni ö uuni ni gwøgu tïï japa en kur keerge ki tïï gïn wø cïp olämme bääte, nee bäŋe gïn mo raac mo cäŋ pïï bäät jø Icriel ki køør wëër mara.

⁶Neenï, beeye aani na jier uut wäru ni beege jø tuuŋ Libay, ni lwøra geni yïthakic jø Icriel na muuy mana cïp jïïu, na näk mo ocïbö jïra, a na Wuuö Jwøk, nee tïï oduŋkaany røømmø nee tïïcge.

⁷Ni ö ïïni ki wäätï ni tïïyu tïï dïlämme na näk tïïc maru, këël gïï wø manynyi kiper gïn wø cïp olämme bääte, ki tïï kanya en kur keere na pere leth na näk ogëëŋö ka abïï. Tïïe moøgø bëët otïïyu. Tïï dïlämme acïba jïïu na muuy; 'ba noo näk da dhaanhø mør jaak mo nyänhnha buut oduŋkaara, wala manynya tïïc mana en yie nee tïïe, wär eni 'näk.»

⁸Køøre Wuuö Jwøk acäänö ka Aran, ni kööe, ni «Ennø, aani tïï muuce mo wø cïp jïra bëët, ni wø tuuŋŋi yi jamø, acïba cerï, ni beege japa en kur keerge ni wø cïp jø Icrielli. Gïïögø acïba jïrï ki wäätï na kuru, nee tïmge na mou na bäre bäre.

⁹Ki røk gïïa en kur keerge na perge leth bëët mo wø cïp jø Icrielli kar lam, thäŋi mo wø ba waaŋ otïmö na moï, ni beege muuce mo beel bëët, ko olämme mo raay bëët, ko olämme bëët mo wø cïp kiper bääyö. Gïïögø bëët ni wø cïpge jïra otïmö ni ena kur keerge ni perge leth na moï ki wäätï.

¹⁰Gïïögø diï camø na gïï mo ocïp kur keerge ni perge leth. Ni ö wäätï bëët ni cämge thuwø. 'Ba gïïögø otïmö na gïï mo ena kur keerge jïrï.

¹¹«Jammi møga mo wø cïp jø Icrielli kar lam, ni beege jëëthe mo wø tuuŋŋi nyïma, a na Wuuö Jwøk, poot na moï thuwø, ni ge yaa cïbö jïrï ki wäätï ki nyïïï na mou na bäre bäre. 'Ba jøøa näk dëëtge waany paarï bëët, løny jïge ki man cämge rege.

¹²«Kwøk omøki ki mädhi mo beyø døc mo käla ri nyïïjer wø kwøŋ ciek, ki thwöth beel moa näk liil mo wø cïpge jïra, a na Wuuö Jwøk, yaa cïbö jïrï.

¹³Nyïïjenni bëët mo wø kwøŋ ciek yi ŋöömge, mo wø cïpge jïra, a na Wuuö Jwøk, otïmö na moï. 'Ba jøøa näk dëëtge waany paarï bëët løny jïge ki man cämge rege.

¹⁴«Gïïo cïp jïra bëët, no owëëk aani na bäre bäre ki køør kööŋ, nee bëëtge ni ena kur keerge na 'moa dï jø Icriel, otïmö na moï.

¹⁵Kaai bëët mo jiy ki mo lääc paac mo wø cïp jïra, a na Wuuö Jwøk, otïmö na moï. 'Ba kaai mo jiy ki mo lääc paac mo wø ba cam diï wïïla wøk.

¹⁶Kany wø tïm dwäde mo kaai mo jiy no oceele, ge diï wïïla wøk ki gät wïïdö ma gwel abïïc moa cwøl ni cekel, no opäärö ki rumi mar kar lam na en kur keere.

¹⁷«'Ba kaa mar dhieŋ wala kaa mar røømmø wala kaa mar ateea ba diï wïïla wøk, kiper ge ena kur keerge na 'moa. Remø marge diï kera bäät gïn wø cïp olämme bääte, ni waaŋï dwäälö marge no olämi, nee tïme na gïn mo ŋwäänynye met jïra, a na Wuuö Jwøk.

¹⁸'Ba rïŋö otïmö na marï, kaawat man wø bëët äämmi na marï, ki rïŋ gøŋŋø man wø tuuŋŋi nyïma, a na Wuuö Jwøk.

¹⁹Gïï wø en kur keerge moøgø bëët mo wø cïp jø Icrielli kar lam jïra, a na Wuuö Jwøk, yaa cïbö jïrï ki wäätï ki nyïïï na mou na bäre bäre. Man beeye luubö mana tuut na bäre bäre, ni tuut ki ïïni ki nyïïkwaayï nyïma, a na Wuuö Jwøk.»

²⁰Ni cäŋ Wuuö Jwøki köö jï Aran, ni «Ï ba jïti ki ŋøøm mo maara dööŋŋe jï nyïïkwaayï, ni bäŋ kany mo maar tïmö na kurï ri ŋööm jø Icriel. 'Ba yïthakic jø Icriel, beeye aani na kurï no odööŋ jïrï na kar ŋöömö.

²¹«'Ba gïna cïba jï jø tuuŋ Libay nee bëëde na marge beeye paac wïth jammi bëët mo jø Icriel. Moøgø acïba jïge ki køør tïïc marge man wø tïïcge yo oduŋkaany røømmø.

²²Ki mano täge ennø, jø Icriel møga ba doo nyänhnha buut oduŋkaany røømmø, kiper nee ge ba thøwge ki køør bääyö marge.

²³'Ba beeye jø tuuŋ Libay keerge noo tïny oduŋkaany røømmø, ni ö ajäl gïï mo patha karge mo wø tägi yie ni tïme ni ena bäätge. Manøgø obëëdö na ciik këël yïth beenhnhe mou bëët. 'Ba bäŋ ŋøøm mo cïp jïge yïthakic jø Icriel mo maara dööŋŋe jï nyïïkwaacge;

²⁴kiper paac wïth jammi mo jø Icriel mo wø cïpge na muuce jïra, a na Wuuö Jwøk, yaa mëëk jø tuuŋ Libay na moge. Ni beeye na caana gø ni bäŋ ŋøøm mo cïp jïge yïthakic jø Icriel mo maara dööŋŋe jï nyïïkwaacge.»

²⁵Køøre Wuuö Jwøk acäänö ki Modhe, ni kööe,

²⁶ni «Cäŋ cäänö ki jø tuuŋ Libay ni kööï, ni ‹Kany wø lwørru paac wïth jammi moa cïba jïïu na mou baŋ jø Icriel, u doo cïpö ki paac wïth japøgø na muuy jïra, a na Wuuö Jwøk.

²⁷'Ba muuy manøgø okwaan jïïu kaawat muuy mar beel mo wø dïn, wala muuy mar køøŋ nyïïomøki.

²⁸Kaawat manøgøøni, uuni thuwø u doo cïpö ki muuy jïra, a na Wuuö Jwøk, ki røk paac wïth jammi mou moa jootu baŋ jø Icriel, ni cïpu muuy manøgø na mara enø jï Aran na näk Kwääy Lam Mana Dwøŋ.

²⁹Ki røk jammi mo wø jootu baŋ jø Icriel, moa näk liil na en kur keerge dou cïbö jïra na kura, a na Wuuö Jwøk.›

³⁰«Ni kööï jï jø tuuŋ Libay, ni ‹Kanyo nø cïpu moa näk liil jïra, mo wø dööŋ obëëdö na mou kaawat man wø dööŋ beelli ki kwøk nyïïomøki jï ŋat puur.

³¹'Ba otïmö ni løny jïïu ki jø pou ki man cammu gïïögø kany wø manynyu jaak, kiper beeye gïno jootu ki køør tïïc maru yo oduŋkaany røømmø.

³²'Ba kany wø cammu ge, ni näk moa näk liil na en kur keerge you cïbö jïra, bäŋ ajäla mo pïï bäätu. 'Ba jammi moa en kur keerge mo wø cïp jø Icrielli jïïu ba dou raanynyø, kiper nou ba thøwu.› »