Read anuak Kwään Jiy 20 Bible Online

Kwään Jiy 20 - anuak bible

Kwään Jiy 20

¹Køøre lwaa Icriel bäre apïï dï paap Dhïn ki dwääy mana dïkwøŋ mar cwiir mana nyään, ni bëëtge Kadëc. 'Ba Mariyam athøw ni koonyi kaace.

²'Ba kaace atïmö ni bäŋ pïï kiper lwaak, ni ö lwaaki ni cooŋge rege ni thïïŋge dëëtge dëër Modhe ka Aran.

³Ni ö lwaa Icrielli ni atïïö ko okiera dëër Modhe, ni köge, na «?Aŋø ni ba thøwa ki nyïïmëëkwa na aciel en kanya thøwge nyïm Wuuö Jwøk?

⁴?Aperŋø na kälu lwaa Wuuö Jwøk dï paabi? ?Beeye kiper nee wa thøwa kany ki lääc paac mowa bëët?

⁵?Na aperŋø na kälu waani wøk Ijep, ni kälu waani kany ni raac en, kany mo paa kar bëëlö, wala nyïïolämmi, wala jer omøki, wala adikwäle, wala da pïï mo maar ka maath?»

⁶Køøre Modhe ka Aran aay buut lwaak ni cige dho oduŋkaany røømmø, ni gøøge rege piny; ni ö ajiem Wuuö Jwøki ni nyooth ree jïge.

⁷Ni kö Wuuö Jwøki jï Modhe,

⁸ni «Lwør athøra, ni cou ki coku ma Aran, ni cooŋï lwaa Icriel bäre. Ni köömmu kïdi ni nëënö jïge, nee pïï ö wøk ki yie. Køøre ï na Modhe, pïï okälï wøk ki yi kïdi kiperge ki jöö manøgø, ni wëëgï geni ki lääc paac moge mäthö ki pïï.»

⁹Ni ö Modhe ni lwør athøra nyïm Wuuö Jwøk kaawat mana ö Wuuö Jwøki na kööm eni.

¹⁰Køøre Modhe ka Aran lwaa Icriel acooŋge nyïm kïdi, ni kö Modhe jïge, «Wïnynyu nø, u na jø ageem. ?Aŋø, känwa wøk ki pïï kiperu ki ri kïdi man?»

¹¹Køøre Modhe cere arwiee, ni gøøc kïdi ka athøra kwöre ariiø, ni put pïïyi mo thööth kwön wøk, ni ö lwaaki ki lääc paac moge ni mäthge.

¹²'Ba Wuuö Jwøk aköö jï Modhe ka Aran, ni «Kiper mana käru aani ŋäädhö, ni ba tïïyu aani naa ena kur keera nyïm jø Icriel, uuni lwaa Icriel man en bäŋa dou kïth yi ŋöömma cïba jïge.»

¹³'Ba pïïögø acwøl ni pï Meriba, kiper beeye kanya ö jø Icrielli ni pïëmge ki Wuuö Jwøk, ni ö eni ni nyooth ree ni ena Jwøk na en kur keere yïthakicge.

¹⁴Kanya bëët jø Icrielli Kadëc, Modhe ajäägö ki jiy baŋ nyeny paana cwøl ni Ëdöm ni kööe, ni «Gïïa leth bëët na pïï bäät coku ma Icriel ŋäyï.

¹⁵Kiper kar kaaca, kwäcwa aci Ijep, ni bëëtwa yi ŋööm Ijep ki kany mo bäär; ni ö jø Ijepi ni tïïge ki gïï mo reyø mo leth dëëtwa ki kwäcwa.

¹⁶'Ba kanya jwöŋwa dëër Wuuö Jwøk, eni döötwa awïnynye, ni jääŋ nyïïatwiel maal mare ni käl waani wøk ki yi ŋööm Ijep. «Ennø, wa ena Kadëc, pääny mana en deŋ keew mar ŋöömmï.

¹⁷'Ba waani, wa kwaya ïïni, nee wa wëëgï pöödhö ki dï ŋöömmï. Waani, wa ba ci yïth pwöth beel, wala ajïniine; ni wa bäŋ doo mäthö ri pï ïïdhi moï. Waano cäädhi ni wa caatha jöör jøw bëët, ni wa ba gaa bäät cwïïc wala bäät caam, gøøc mano kaalwa ŋöömmï.»

¹⁸'Ba nyeny Ëdöm aköö jïge, ni «Käru pöönhnhö ki dï ŋöömwa; 'ba ni näk uuno pöönhnhö, wa ööa baŋu ni këëdö ki uuni.»

¹⁹Ni cäŋ jø Icrielli kö jïre, ni «Wa doo pöödhö ni wa caatha øtjöö keere. 'Ba ni näk waani ki lääc paac mowa, waano mäthö ri pïï mou, gäte ocoolwa. Wëëk waani pöödhö keere jaak, ni bäŋ gïn mør.»

²⁰'Ba ena köö, no «U ba doo pöönhnhö ki dï ŋöömwa.» Ni ö nyeny Ëdömmi wøk ki lwaak ki tøŋ mo teek døc, ni gëëŋge geni.

²¹Ni put nyeny Ëdömmi kweer ki man pööth jø Icrielli ki dï ŋöömme. Køøre jø Icriel rege aløkge ni ŋaatge ŋöömme.

²²Køøre lwaa Icriel bäre atïŋŋö ki Kadëc ni pïïcge tier Kïn Öör.

²³'Ba Wuuö Jwøk acäänö ki Modhe ka Aran tier Kïn Öör na en waŋ keew ki ŋööm Ëdöm, ni kööe,

²⁴na «Aran othøw, ni läp køør jø poge, kiper eni bäŋ doo maara døny yi ŋöömma cïba jï jø Icriel, kiper uuni luubö mara adhallu kar pï Meriba.

²⁵Lwør Aran ki wääde ma Eliedhar, ni kälï geni bäät Kïn Öör,

²⁶ni kälï abïïk Aran wøk dëëre ni røøï geni dëër Eliedhar na näk wääde. Køøre Aran othøw, ni läp køør jø poge.»

²⁷'Ba gïïögø bëët atïïc Modhe kaawat mana ö Wuuö Jwøki na kööm eni, ni cige bäät Kïn Öör, ni ge nëënö jï lwaa Icriel bäre.

²⁸Ni ö Modhe ni käl abïïk Aran wøk ni røø ge dëër Eliedhar na näk wär Aran. Ni ö Aranni ni put thøø kaace wï kïdi. Køøre Modhe ki Eliedhar aö piny ki bäät kïdi.

²⁹'Ba kanya neeni lwaa Icrielli bäre na Aran othøw, gena kïmmö kipere ki nïne ma pïëradäk.