Read anuak Kwään Jiy 21 Bible Online

Kwään Jiy 21 - anuak bible

Kwään Jiy 21

¹Kar kaace da dhaanhø ma nyï Keenan mo nyeny jø Arat, ni eni wø bëëdö kanya cwøl ni Nëgëp. 'Ba kanya wïny gø ni jø Icriel aöö ni cura jöör Atharim, ena ö wøk ni këëde ki geni, ni mak jiy møøk ni käl ge.

²Køøre jø Icriel akööŋ jï Wuuö Jwøk, ni köge, ni «Ni näk mo jø Keenan moi ii cïbï ceŋwa, päänye moge dewa raanynyø na bäre.»

³Ni ö Wuuö Jwøki ni wïny mana caan jø Icrielli, ni cïp jø Keenan moøgø ceŋge, ni raanyge geni na bäre ki päänye moge; ni put nyeŋ kaace cwøl ni Örma.

⁴Køøre jø Icriel atïŋŋö ki tier Kïn Öör, ni ge cøra jöör Naama Kwaar, nee deŋ ŋööm Ëdöm wïrge. Ni ö lwaaki ni cwat yïthge døc øtjöö.

⁵Ni cäänge dëër Wuuö Jwøk, ni cäänge dëër Modhe thuwø, ni köge, na «?Aperŋø na kälu waani wøk ki Ijep nee wa thøwa dï paap en? Kiper bäŋ cam, ni bäŋ pïï, ni waana jøøm ki cami ni raac en.»

⁶'Ba Wuuö Jwøk thwöre mo reyø ajääŋŋe dï jiy, ni kaacge jiy, ni thøw jiyi mo thööth dëët jø Icriel.

⁷Køøre jiy aö baŋ Modhe, ni köge, ni «Waana bääyö kiper mana cäänwa dëër Wuuö Jwøk, ni cäänwa dëërï thuwø. 'Ba ennø, kwac Wuuö Jwøk jïwa, nee thwöre paanye yïthakicwa.» Ni ö Modhe ni put Wuuö Jwøk kwac kiper jiy.

⁸Køøre Wuuö Jwøk aköö jï Modhe, ni «Tïïï ki gïn mo caala thwöl, ni lïërï gø bäät jaath mo ocwöth piny; ni ŋat wäro näk mo okaaø jaak, kany wø neen gø, eno køny.»

⁹Ni ö Modhe ni tïïe ki thwör jwïël ni lïër gø bäät jaath mo ocwöth piny; ni ö jøøa näk okaac thwöre bëët ni jïtge ki køny kanya neenge gø.

¹⁰Køøre jø Icriel atïŋŋö, ni tïïge ki twïër kanya cwøl no Oböth.

¹¹Ni tïŋge ko Oböth ni tïïge ki twïër Iye-Abarim dï paap mana näk dïët ki Möap, na en jï løø kur tuul-cäŋ.

¹²Ni cäŋge tïŋŋö kaace, ni tïïcge twïër marge goor naama cwøl ni Dherëët.

¹³Ni cäŋge tïŋŋö ki Dherëët ni tïïge ki twïër løø naam Arnön løøga na en dï paaba näk ree ee jwaaø ki keew mar jø Amör, kiper naam Arnön beeye keew mar jø Möap mana en yïthakicge ki jø Amör.

¹⁴Ni beeye tiere na caani yi Wëël Lenye Mo Wuuö Jwøk, na køp, ni «Paana cwøl ni Wayïp ena Cuupa, ni da gool mo cwøl ni goor naam Arnön,

¹⁵ni naam Arnön wø løøya yi pääny Ëër, na en deŋ keew mar jø Möap.»

¹⁶'Ba gena put wääth këël kanya cwøl ni Bëër, ni beeye iith mana cään Wuuö Jwøki ki Modhe kipere, na kööe, ni «Cooŋ jiy kanya ciel nee ge mooa ki pïï.»

¹⁷Køøre jø Icriel awär ki duut ni köge, «Wui, ï na iith, wa kwaya ïïni ki duut ki man cwïërï.

¹⁸Ni beeye iidha koony kwääri, ni gööli ya dïbwöthe; ni göölge ka athøre moge, na näk athøc kwär.» Ni ö geni ni cäŋge tïŋŋö dï paap, ni cige kanya cwøl ni Mathena,

¹⁹ni tïŋge Mathena ni cige Naliel, ni tïŋge Naliel ni cige Bamöth.

²⁰Ni cäŋge tïŋŋö Bamöth ni cige yi pwölla en bäät Kïn Pedhega na en yi ŋööm jø Möap, ni wø nëën ŋöömma raaci ki bääte ni beeye ŋööm wø bäŋ gïn mo tuy yie.

²¹Køøre jø Icriel ajääk baŋ Cëëwön nyeny jø Amör, ni köge,

²²ni «Wëëk waani pöönhnhö ki dï ŋöömmï. Waani wa bäŋ doo gaa wøk ki øtjöö ni gaawa yïth pwöth beel wala pwöth omøki, ni wa ba mäthi ri pï ïïdhi moï. Waano cäädhi ki øtjöö mana dwøŋ mana tïïc nyeya, gøøc mano kaalwa ŋöömmï.»

²³'Ba Cëëwön kär jïëy ki man pööth jø Icrielli ki yi ŋöömme. Ni ö Cëëwönni ni cooŋ lwaae, ni ci baŋ jø Icriel dï paap, ni ci kanya cwøl ni Jäc, ni këëde ki jø Icriel.

²⁴Ni ö jø Icrielli ni 'näkge jø Amör, ni macge ŋøøpge, ni tägi ka naam Arnön këël mana këët naam Jabök, na näk keew mar jø Amön, kiper keew mar jø Amön beeye keew mo okoorø ni teek.

²⁵Ni ö jø Icrielli ni macge päänye moøgø bëët na näk mo jø Amör, ni bëëtge yïthge, ni rwöpa Ëcbön ka atude moe moa en buute bëët.

²⁶'Ba Ëcbön beeye pääny mar Cëëwön nyeny jø Amör, ŋata këëdö ki nyeny jø Möap mana dïkwøŋ, ni mac ŋøøp gø bëët këël mana këët naam Arnön.

²⁷Ni beeye na put jø wø cääö ki dudi köö, ni «Ööu Ëcbön, kiper nee geer, nee pääny Cëëwön geer ni teek.

²⁸Kiper maac aöö ki Ëcbön, ni beege dëëci mo Cëëwön. Ni raanyge Ëër na näk pääny jø Möap, ki kwääri moa teek mo wø bëëdö bäät thuuri mo naam Arnön.

²⁹U na jø Möap, otïmö ni raac jïïu. Uuna ränynyö bëët, u ni wø lam jwøa cwøl ni Kemöc. Jwøk maru uuna wëëk ŋwïëy, u na näk wääte, ni wëëk nyïïe mak nyïm tøŋ, ni cïp ge cer nyeny Amör na näk Cëëwön.

³⁰'Ba ennø, gena raanywa, ni tägi ka Ëcbön këël mana pïïe Dibön, ni raanywa geni këël Nöpa na en buut Medeba.»

³¹Køøre jø Icriel abëëdö yi ŋööm jø Amör.

³²Ni ö Modhe ni jääk Jadher nee liew. Ni ö jø Icrielli ni macge mïëc Jadher, ni riemge jø Amör moa bëëdö kaace.

³³Køøre jø Icriel rege aløkge ni cørge øtjöör päänya cwøl ni Baacan, ni ö Ög nyeny Baacan ki jiye ni ö wøk, nee këëde ki jø Icriel päänya cwøl ni Edaray.

³⁴'Ba Wuuö Jwøk aköö jï Modhe, ni «Kärï lwäyö ki eni, kiper eni ki jiy moe, ki ŋöömme bäre, yaa nø cïp cerï. Teeŋ gïna tïïyï dëër Cëëwön nyeny jø Amör, na bëëdö Ëcbön, wär tïïyï dëëre.»

³⁵Ni ö jø Icrielli ni 'näkge Ög ki wääte, ki jiye bëët, gøøc mana tïme ni bäŋ wïïe mo odööŋ ni kwøw, ni putge ŋöömme mac.