Read anuak Kwään Jiy 22 Bible Online

Kwään Jiy 22 - anuak bible

Kwään Jiy 22

¹Køøre jø Icriel atïŋŋö, ni tïïge ki twïër pwöl Möap, løø naam Jördan løøga, na näk dïët ki Jerikö.

²'Ba Balak o Cëëpör gïna tïïc jø Icrielli dëët jø Amör awïnynye.

³Ni ö jø Möapi ni putge bëëtö ni ge lwär døc ki jø Icriel, kiper na thööthge; ni thäŋ yïthge døc thuwø ki jø Icriel.

⁴Ni kö jø Möapi jï jø døøk Midien, ni «Lwaai en, gïïo en lak paac bëët kany thöörge thöörö, kaawat man wø ö dhäki wø thöörge luum man wø en kar kwaath.» Køøre Balak o Cëëpör, na näk nyeny Möap kar kaace,

⁵ajääk baŋ Beelam o Beeyör ki jiy paana bëëde yie na näk poge Patura, na näk kare cään ki naam Upareeti. Køøre jøøgø ajääŋ Balaki nee Beelam cwølge, ni kö Balaki, ni «Neenï, da jiy mo ö wøk ki Ijep, ni pääŋge dï piny bäre; 'ba ennø, geno pïï kany mo cään ki waani.

⁶Kiper manøgø nø, laar öö ni cienï jøøi jïra, kiper mana näk teek marge opöödhö ki teek mara. 'Ba ni näk mo ge iï cienø, kanymør maara lønyø jïra ki man bööta geni ni riema ge wøk. Kiper ŋääa ni ŋat wø gwïëthï, ogwïëth; ni ŋat wø cienï, ocien.»

⁷'Ba jø døøk Möap ki jø døøk Midien gena tïŋŋö, ni ge käädö ki jammi mo cïp na gät tïïc mar acïëni; ni pïïcge baŋ Beelam, ni caange dwør Balak jïre.

⁸Køøre Beelam aköö jïge, ni «Butu kany dïwääni. 'Ba aani, dwørøgø oløøa jïïu ki køør mano caan Wuuö Jwøki jïra.» Ni ö dïbwöthe mo Möap ni bëëtge ki Beelam dïwäänögø.

⁹Køøre Jwøk aö bäät Beelam, ni kööe, na «?A jøøe ni en buutï yøø?»

¹⁰Ni kö Beelammi jï Jwøk, ni «Balak o Cëëpör, nyeny jø Möap, ajääŋ baŋa ki dwøl, ni kööe,

¹¹ni ‹Da jiy mo ö wøk ki Ijep, mo dï piny bäre ege pääŋö. 'Ba ennø, laar öö ni cienï geni jïra; kiper ni näk mo ge iï cienø, kanymør maara lønyø jïra ki man këëda ki geni ni riema ge wøk.› »

¹²'Ba Jwøk aköö jï Beelam, ni «Kärï aay ki geni, ni kär niï ciena jøøgø, kiper gena jiy mo ogwïëdhö.»

¹³'Ba na tïme na amöölla, Beelam aö maal, ni ci baŋ dïbwöthe mo Balak, ni kööe, ni «Døøu yi ŋöömmu, kiper Wuuö Jwøk akweer ki man aa ki uuni.»

¹⁴Ni ö dïbwöthe mo Möap ni öge maal ni døøge baŋ Balak, ni köge, ni «Beelam akweer ki man ööe ki waani.»

¹⁵Køøre Balak dïbwöthe møøk mo thööth moa kwörge døøŋŋø mo kaala moa dïkwøŋ, acäŋ jääŋŋö.

¹⁶Ni öge baŋ Beelam ni köge jïre, ni «Balak o Cëëpör aköö, ni ‹Kär dee gïn män ïïni ki man ööï baŋa.

¹⁷Kiper kwär marï odøøya mo dwøŋ, ni gïno caanï jïra jaak tïïa tïïö. Ööï ni cienï jøøi ii jïra.› »

¹⁸'Ba aløk Beelammi jï jic Balak, ni kööe, ni «Këël Balak doo cïpa øde bäre mo päŋ ki warkey ki gwel-bïrö jïra cøøn, bäŋ gïn mo thiinh wala mo dwøŋ mo daa tïïö, ni kaala ciik Wuuö Jwøk na näk Jwøk mara.

¹⁹'Ba ennø, beerra man butu kany dï wäär man thuwø, nee gïno cäŋ Wuuö Jwøki caannø jïra nee jooda.»

²⁰'Ba Jwøk aö bäät Beelam ki wäär, ni kööe, «Ni näk jøøgø ööa kuna cwølge ïïni, ö maal ni aayï ki geni. 'Ba wär näk miï tïïya dwøro caana jïrï keere.»

²¹'Ba na tïme na amöölla, Beelam apäny maal ni jiiŋ arëën mare, ni aae na aciel ki dïbwöthe mo Möap.

²²'Ba Jwøk agootø døc kiper mana aae. Ni ö nyïïatwiel maalli mar Wuuö Jwøk ni cuŋŋe dï øtjöö kiper nee eni mäne. 'Ba Beelam cäädhi ka bäät arëën mare, ni jø tïïc moe na näk ariiø cäädhi ka eni na aciel.

²³'Ba kanya ö arëënni na joot nyïïatwiel maal mar Wuuö Jwøk ni cuŋŋa dï øtjöö no opëëlle ena cere, arëën aput gaa wøk ki øtjöö ni ci yi pwödhö; 'ba Beelam arëën agøøe kiper nee dwøk øtjöö.

²⁴Køøre nyïïatwiel maal mar Wuuö Jwøk acäŋ cuŋŋö dï øtjöö kany mo diiny mo cøra yïthakic ajïniine, ni deŋŋe løøi ki løøi da kiir.

²⁵'Ba kanya ö arëënni na joot nyïïatwiel maal mar Wuuö Jwøk, ree adii ri kiir, ni mii tier Beelam ri kiir. Ni ö Beelammi ni cäŋ arëën gøøyø.

²⁶Køøre nyïïatwiel maal mar Wuuö Jwøk anyiik nyïme, ni cuŋŋe kanya näk diiny døc, mo røk ba løny ki løø bäät cwïïc wala bäät caam.

²⁷'Ba kanya ö arëënni na joot nyïïatwiel maal mar Wuuö Jwøk, ena niruumma ni but piny ni Beelam poot ena bääte. Ni ö Beelammi ni wëëre døc ni gøøy arëën ka athøye.

²⁸Køøre Wuuö Jwøk dha arëën ajabe, ni kö arëënni jï Beelam, na «?Agïnaŋø na tïïa dëërï ki man pöötï aani kwöre moi na adäk ii?»

²⁹Ni kö Beelammi jï arëën, ni «Beeye kiper mana kwäägï bääta. Doo naa cera da opëëllö, ï daa nää ennø.»

³⁰Ni ö arëënni ni kööe jï Beelam, na «?Aŋø, a paa arëën marï mana cäädhï ki bääte cooth, këël dïcäŋ man en? ?Aŋø, aano ŋïyö ki man tïïa teeŋ gïnögø, na tïïa dëërï enø?» Ni kö Beelammi, «Kärï tïïö.»

³¹Køøre Wuuö Jwøk nyeŋ Beelam ajabe, ni ö Beelammi ni joot nyïïatwiel maal mar Wuuö Jwøk ni cuŋŋö dï øtjöö, ni cere do opëëllö. Ni ö Beelammi ni put ree leeŋ piny.

³²Ni kö nyïïatwiel maalli mar Wuuö Jwøk jïre, na «?Aperŋø na pöötï arëën marï kwöre adäk en? Aana ö kany kiper niï mäna, kiper gïno tïïyï enø beeye gïn mo duunnö ki ränynyö nyïma.

³³Aana joot arëënni ni paany ree nyïma kwöre adäk; 'ba dee näk mo ree käre panynyø ki aani, ka adïëri møn, doo na ï yaa nääö en, ni wiia arëën ni kwøw.»

³⁴Køøre Beelam aköö jï nyïïatwiel maal mar Wuuö Jwøk, ni «Aana bääyö, kiper kuua niï cuŋŋa øtjöö niï mäna aani ki wääth. Kiper manøgø nø, ni näk mo ï ba many gø naa pöödha, aano døøk nø.»

³⁵'Ba nyïïatwiel maal mar Wuuö Jwøk aköö jï Beelam, ni «Ci pöödhï ki jøøgø; 'ba wär näk miï caana dwøro caana jïrï keere.» Køøre Beelam aput aay ki dïbwöthe mo Balak.

³⁶'Ba kanya wïnynyi Balaki ni Beelam aöö, ena cøø nee røømme ki gø yi pääny mar jø Möap mana en bäät naam Arnön, na näk waŋ keew.

³⁷Ni kö Balaki jï Beelam, na «?Aŋø, a kär öön baŋï na bëëde kiper niï ööi? ?Aperŋø na kärï laar ö baŋa? ?Aŋø, ki jïrï ni ba maar lønyø jïra ki man wøøra ïïni?»

³⁸Ni kö Beelammi jïre, ni «Aana ö baŋï ennø. ?Aŋø, da teek jïra cøøn ki man caana gïrpiny? 'Ba aani, beeye dwøro cïp Jwøki dhaa keere na daa caanø.»

³⁹Køøre Balak aay ki Beelam ni cige Kiriat-Adhöt.

⁴⁰Ni ö Balaki ni ŋäde ki dhäk ki dïëk ma rööm, ni jääŋ geni baŋ Beelam ki kwääc lwaae moa bëëdö ki eni na aciel.

⁴¹'Ba na tïme na amöölla maya, Balak aöö ni lwør Beelam ni kïth gø bäät thuur mana cwøl ni Bamöth-Baal; ni ö Beelammi ni raŋ jø Icriel moa en deŋ twïër na karge cärö ki kaace.