Read anuak Kwään Jiy 23 Bible Online

Kwään Jiy 23 - anuak bible

Kwään Jiy 23

¹Køøre Beelam aköö jï Balak, ni «Tïïï jïra ki gïï wø cïp olämme bäätge ma abïriiø kany, ni kälï rwädhe abïriiø ki nyöök rööm abïriiø ni jiiŋŋï geni jïra thuwø.»

²'Ba Balak gïïögø atïïe kaawat mana caani ya Beelammi jïre. Ni ö geni karge riet ni cïpge bäät gïn wø cïp olämi bääte man nø ki rwaath aciel ki nywø røømmø aciel.

³Køøre Beelam aköö jï Balak, ni «Cuŋŋï buut olämme moï moøgø ni waaŋ yøø. 'Ba aana aay; kanymør Wuuö Jwøk öö ni røømme ki aani; 'ba gïno nyoodhe jïra ocaana jïrï.» Køøre Beelam aput aa bäät thuur mo leer.

⁴Ni ö Jwøki ni røømme ki Beelam, ni kö Beelammi jïre, ni «Aana tïïö ki gïï wø cïp olämme bäätge ma abïriiø, ni cïpa bäät man nø ki rwaath aciel ki nywø røømmø aciel.»

⁵Køøre Wuuö Jwøk dwøre acïp dhi Beelam, ni kööe, ni «Døø baŋ Balak, ni caanï dwøra jïre.»

⁶Ni ö Beelammi ni døø baŋ Balak, ni joot eni ki kwääc lwaae mo Möap bëët ni ge cuŋŋa buut olämme moe moa waaŋ.

⁷Ni ö Beelammi ni täge ki man køp dwør Jwøk, ni kööe, ni «Balak aana käle ki ŋööm Aram; eni na nyeny Möap aana käle ki bäät kïte moa en jï løø kur tuul-cäŋ; ni kööe, ‹Ööï, ni cienï nyïïkwaac Jeekap[16] jïra, ni kïthï bäät jø Icriel ka ajäla kipera.›

⁸?Aŋø, ŋat mo kär cien Jwøki ociena gø nidïï? ?Ni ŋat mo kär jääl Wuuö Jwøki omaara gø jääl nidïï?

⁹Ennø, gena neena naa ena bäät kïdi, ni neena geni naa ena bäät thuur. Ka adïëri møn, gena lwaak mo rege kärge kwaan dëët juurre møga, ni bëëdö ge keerge.

¹⁰?Aŋa ni løny jïre ki man kwaan nyïïkwaac Jeekap ni caal tør ii? ?Wala aŋa ni maar lønyø jïre ki man kwaan ŋweer lwaak keere mar jø Icriel? Beerra man thøøa ki thøw jø wø marge beer, ni tïm aŋuun kwøw mara ni caala marge.»

¹¹Køøre Balak aköö jï Beelam, na «?Agïnaŋø ni tïïyï dëëra en? Ïïna cwøla kiper nee nyïïmänna cienï jïra; 'ba ennø, bäŋ gïn mo iï tïïö; ï gwïëtha geni.»

¹²Ni løgi ya Beelammi jïre, na «?Aŋø, wïïa bäŋ daa koorø ki man caana luubö mana cïp Wuuö Jwøki dhaa?»

¹³Køøre Balak acäŋ köö jï Beelam, ni «Ööï, nøø aa kany mør kanyce mo ge nëënö ki yie. 'Ba këël ø doo cøøa kaace, ge ba jootï bëët thuwø. 'Ba moa karge cärö keerge ojootï. Køøre ge wär cienï jïra niï ena kaace.»

¹⁴Ni ö Balaki ni kïth Beelam pwöl Dhöpim, na en wï kïnna cwøl ni Pedhega, ni tïme ki gïï wø cïp olämme bäätge ma abïriiø, ni cïp bäät man nø ki rwaath aciel ki nywø røømmø aciel.

¹⁵Ni kö Beelammi jï Balak, ni «Cuŋŋï kany buut olämme moï moøgø ni waaŋ yøø, naa cøøa naa røømma ki Wuuö Jwøk kaace.»

¹⁶Køøre Wuuö Jwøk arøømmø ki Beelam ni cïp dwøre dhi gø, ni kööe jïgø, ni «Døø baŋ Balak ni caanï dwøra jïre.»

¹⁷Ni ö Beelammi ni ö baŋ Balak, ni joot eni ki kwääc lwaae mo Möap ni ge cuŋŋa buut olämme moe moa waaŋ. Ni kö Balaki jï Beelam, na «?Agïnaŋø na caan Wuuö Jwøki?»

¹⁸Køøre Beelam aput tägö ki man køp dwør Jwøk, ni kööe, ni «Ï na Balak, ö maal, ni wïnynyï gïn. Wïny mara, ï na o Cëëpör.

¹⁹Jwøk ba caal dhaanhø ni wø cäänö ki tööt; ni eni ba caal o dhaanhø ni wø laar acaaye wiil. ?Gïna näk ee caanø, a ba dee gø tïïö nidïï? ?Ni gïn mo ee buuö, a ba dee gø tïïö nee thur kare nidïï?

²⁰Ennø, ciik acïp jïra nee jø Icriel gwïëdha; ni gena nø gwïëth Jwøki, ni ba løny jïra ki man wiila gø këët.

²¹«Bäŋ gïï mo reyø mo ee joodø bäät nyïïkwaac Jeekap, ni bäŋ rääö mo ee joodø bäät jø Icriel. Wuuö Jwøk na näk Jwøge ena buutge, ni ge wø kwöŋŋö ni ge pwøya eni na näk nyenyge.

²²Gena käl Jwøki wøk ki Ijep, ni tïïc geni ni teek kaamar jööbi.

²³Kiper bäŋ jap thïëth mo pïï dëët nyïïkwaac Jeekap, ni bäŋe gïr jwø wø dëëdö mo tägi dëët jø Icriel. 'Ba ennø, gïno caan kiper nyïïkwaac Jeekap na näk jø Icriel, okøp, ni ‹Neennu gïna tïïc Jwøki en.›

²⁴Ka adïëri møn, lwaa Icriel cuŋŋö kaamar maath ŋuu, ni ö maal kaamar cïgïï ŋuu, ni bäŋ doo butö këël mano cam gïna dware, ni maath remø mar gïna nääe.»

²⁵Køøre Balak aköö jï Beelam, ni «Kär ge cienï, ni ba gwïëthï geni këët thuwø.»

²⁶'Ba aløk Beelammi jï Balak, ni kööe, na «?Aŋø, kära caanø jïrï, ni ‹Gïïo caan Wuuö Jwøki beege na daa tïïö›?»

²⁷'Ba Balak aköö jï Beelam, ni «Ööï nø, ïïno cäŋa kïth kany mør kanyce. Kanymør Jwøk jïëy, ni maarï geni cien jïra niï ena kaace.»

²⁸Ni ö Balaki ni kïth Beelam wï kïnna cwøl ni Pëëgör, ni wø nëën ŋöömma raaci ki bääte, ni beeye ŋööm wø bäŋ gïn mo tuy yie.

²⁹Ni kö Beelammi jï Balak, ni «Tïïï ki gïï wø cïp olämme bäätge ma abïriiø jïra kany, ni kälï rwädhe abïriiø ki nyöök rööm abïriiø ni jiiŋŋï geni jïra thuwø.»

³⁰Ni ö Balaki ni tïïc gïïögø kaawat mana caan Beelammi, ni cïp bäät gïn wø cïp olämme bääte man nø ki rwaath aciel ki nywø røømmø aciel.