Read anuak Kwään Jiy 25 Bible Online

Kwään Jiy 25 - anuak bible

Kwään Jiy 25

¹'Ba kanya bëët jø Icrielli Cëthim, jiy atägö ki wääth køør nyïï jø Möap, ni ge temma tïï käp ki geni.

²Kiper kar kaace jø Möap jø Icriel wø cwølge bäät olämme mo juu moge, ni ö jø Icrielli ni cämge, ni wøørge juu mo jø Möap.

³Ni ö jø Icrielli ni løøge rege baŋ Baal-Pëëgör, na näk jwø jø Möap, ni tïm wëëc Wuuö Jwøki ni päl bäät jø Icriel døc.

⁴Ni kö Wuuö Jwøki jï Modhe, ni «Mak dïbwöthe bëët mo jø Icriel, ni 'nägï geni, ni lïërï geni ko okaan cäŋ nyïma, a na Wuuö Jwøk, kiper nee wëër mara paanya bäät jø Icriel.»

⁵Køøre Modhe aköö jï dïŋut luup mo jø Icriel, ni «Ŋati man nø dëëtu, jiye moa näk rege ege løø baŋ Baal-Pëëgör wär nääe.»

⁶'Ba kanya pootge dho oduŋkaany røømmø, ni ge kïmmö, ŋat Icriel aciel aput kännö ki nyi jø Midien ni kïth gø yo oduŋkaara mare, ni nëënö jï Modhe ka acooŋ Icriel bäre.

⁷'Ba kanya jooti ya Piniac wär Eliedhar nyikwaar Aran, ni beeye Aran na näk Kwääy Lam Mana Dwøŋ, ena put ö maal ki dï lwaak ni aae ni lwør tøŋ,

⁸ni läp køør ŋat Icriel maneca yo oduŋkaara, ni put ge cööbö ki tøŋ karge riet. Ni ö ajäl Jwøki ni put aay bäät jø Icriel.

⁹'Ba jiy moa thøw ka ajäl Jwøk beege jiy ma kume ma pïërariiø kurŋween.

¹⁰Køøre Wuuö Jwøk aköö jï Modhe,

¹¹ni «Piniac wär Eliedhar, nyikwaar Aran na näk Kwääy Lam Mana Dwøŋ, wëër mara apaanye bäät jø Icriel, kiper gïna keea, akeee thuwø dï jø Icriel; køøre, aani jø Icriel kära thöörö këët ki køør këëny mara.

¹²Kiper manøgønø, luumma man wø duunni ki mëër atuuda ki eni ennø,

¹³ni tïme na mare ki nyïïkwaaye moo ööi køøre bëët, ni beeye luubö mana tuut nee bëëde ni nut cooth kiper tïï dïlämme; kiper ena këëyö kiper Jwøk mare, ni beeye aani, ni tïïe ki gïn mo wëënna bääyö mar jø Icriel.»

¹⁴'Ba nyeŋ ŋat Icriel mana thøw, na 'näk na aciel ki nyi jø Midien, beeye Dhimri o Caalu, ni beeye dïbwödhi mar dhi øtø aciel røk dhøk uudi mo jø tuuŋ Cimien.

¹⁵Ni nyeŋ nyi jø Midien mana 'näk beeye Köcibi nyi Cuur, ni Cuur beeye dïbwödhi mar dhi øtø aciel røk jø Midien.

¹⁶Køøre Wuuö Jwøk acäänö ki Modhe, ni kööe,

¹⁷ni «Männu ki jø Midien, ni raanynyu geni,

¹⁸kiper gena männö ki uuni ni cøøkge uuni ki ri gïna tägö Pëëgör; ni cøøkge uuni thuwø ki køør nyige ma Köcibi, ni beeye nyi dïbwödhi mar jø Midien, nyaana thøw ni 'näga Piniaci dïcäŋa täk thøø mar ajäl Jwøk kiper gïna tägö Pëëgör.»