Read anuak Kwään Jiy 26 Bible Online

Kwään Jiy 26 - anuak bible

Kwään Jiy 26

¹'Ba na tïme na køør kanya thøw jiyi ka ajäl Jwøk mana pïï bäät jø Icriel, eni na Wuuö Jwøk ena cäänö ki Modhe ki Eliedhar wär Aran na näk Kwääy Lam Mana Dwøŋ, ni kööe,

²ni «Kwaannu lwaa Icriel bäre, moa näk cwiicge pïërariiø këël mo kaala pïërariiø, ki køør dhøk uudi mo kwäcge, ni beege cwøw bëët moa näk løny jïge ki man cige baŋ leny.»

³Ni ö Modhe ki Eliedhar na näk Kwääy Lam Mana Dwøŋ ni cäänge ki lwaa Icriel pwöl Möap na en buut Naam Jördan na dïët ki Jerikö, ni köge,

⁴ni «Kwaannu cwøw bëët moa näk cwiicge tägi ka pïërariiø këël mo kaala pïërariiø, kaawat mana ö Wuuö Jwøki na kööm Modhe.» 'Ba jø Icriel moa ö wøk ki Ijep beege ii.

⁵Dhøk uudi mo wäät Ruben, ni beeye Ruben na näk kany Icriel, beege dhi øt Anök, ki dhi øt Pallu,

⁶ki dhi øt Eedharan, ki dhi øt Karmi.

⁷Moøgø beege dhøk uudi mo wäät Ruben, ni kwäänge beege jiy ma kume ma pïëraŋween kurdäk ki dïpe abïriiø ki pïëradäk.

⁸'Ba nyikwaar Pallu beeye Eliap,

⁹ni wäät Eliap beege Nemuel ki Daathan ka Abiram. 'Ba Daathan ka Abiram beege na no ojier lwaaki, ni beege na pïëmö thuwø ki Modhe ka Aran, ni geno dwätö ki Köra ki jiye kanya pïëmge ki Wuuö Jwøk.

¹⁰'Ba kar kaace ŋøøm apääö ki dïge, ni put geni ki Köra mwøny karge bëët, ni thøw jøøa cääthge ki geni thuwø, ni beeye kanya ö maaci na thöör jøøa näk dïpe ariiø ki pïërabïïc. Ni tïm gïnögø na pwöc mo teek.

¹¹'Ba wäät Köra kär thøw.

¹²'Ba dhøk uudi mo wäät Cimien beege dhi øt Nemuel, ki dhi øt Jamin, ki dhi øt Jaakin,

¹³ki dhi øt Dheera, ki dhi øt Caul.

¹⁴Moøgø beege dhøk uudi mo wäät Cimien, ni kwäänge beege jiy ma kume ma pïërariiø kurriiø ki dïpe ariiø.

¹⁵'Ba dhøk uudi mo wäät Gaat beege dhi øt Dhipön, ki dhi øt Agi, ki dhi øt Cuni,

¹⁶ki dhi øt Odheni, ki dhi øt Ëri,

¹⁷ki dhi øt Arödi, ki dhi øt Arëli.

¹⁸Moøgø beege dhøk uudi mo wäät Gaat, ni kwäänge beege jiy ma kume ma pïëraŋween ki dïpe abïïc.

¹⁹'Ba wäät Juuda moa dïkwøŋ na thøø yi ŋööm Keenan beege Er ki Önan.

²⁰'Ba dhøk uudi mo wäät Juuda møga beege dhi øt Ceela, ki dhi øt Peereth, ki dhi øt Dheera.

²¹Ni dhøk uudi mo wäät Peereth beege dhi øt Eedharan, ki dhi øt Amul.

²²Moøgø beege dhøk uudi mo wäät Juuda, ni kwäänge beege jiy ma kume ma pïërabïriiø ka abïciel ki dïpe abïïc.

²³'Ba dhøk uudi mo wäät Icakar beege dhi øt Töla, ki dhi øt Puwa,

²⁴ki dhi øt Jacup, ki dhi øt Cimrön.

²⁵Moøgø beege dhøk uudi mo wäät Icakar, ni kwäänge beege jiy ma kume ma pïërabïciel kurŋween ki dïpe adäk.

²⁶'Ba dhøk uudi mo wäät Dhebulan beege dhi øt Cërët, ki dhi øt Ëlön, ki dhi øt Jaalël.

²⁷Moøgø beege dhøk uudi mo wäät Dhebulan, ni kwäänge beege jiy ma kume ma pïërabïciel ki dïpe abïïc.

²⁸Wäät Jocep beege Maneeca ki Ipariem.

²⁹'Ba dhi øtø mar o Maneeca beeye dhi øt Makir. Ni Makir beeye wää Geläti, ni beeye Gelät na käl dhi øt Geläti ree.

³⁰Ni dhøk uudi mo wäät Gelät beege dhi øt Iedher, ki dhi øt Këlëk,

³¹ki dhi øt Aciriel, ki dhi øt Cekam,

³²ki dhi øt Cemida, ki dhi øt Ëpër.

³³'Ba Dhilöpat wär Ëpër jïre bäŋ obwöre ma cwøw, 'ba obwöre moa en jïre beege mään keerge. Ni nyeŋ nyïï Dhilöpat beege Maala, ki Nöa, ko Okila, ki Milka, ki Tirja.

³⁴'Ba kwään jiy mo dhøk uudi mo wäät Maneeca beege jiy ma kume ma pïërabïïc kurriiø ki dïpe abïriiø.

³⁵'Ba dhøk uudi mo wäät Ipariem beege dhi øt Cuthula, ki dhi øt Bëkër, ki dhi øt Taan.

³⁶Ni dhi øtø mar o Cuthula beeye dhi øt Iran.

³⁷Moøgø beege dhøk uudi mo wäät Ipariem, ni kwäänge beege jiy ma kume ma pïëradäk kurriiø ki dïpe abïïc. 'Ba nyïïkwaac Jocep bëët ki køør dhøk uudi mo wäät Maneeca ki wäät Ipariem beege yøøgø.

³⁸'Ba dhøk uudi mo wäät Benjamen beege dhi øt Bëla, ki dhi øt Acbël, ki dhi øt Akiram,

³⁹ki dhi øt Cupam, ki dhi øt Upim.

⁴⁰Ni dhøk uudi mo wäät Bëla beege dhi øt Art ki dhi øt Neeman.

⁴¹Moøgø beege dhøk uudi mo wäät Benjamen, ni kwäänge beege jiy ma kume ma pïëraŋween kurbïïc ki dïpe abïciel.

⁴²'Ba dhi øtø mar o Daan beeye dhi øt Cuam. Moøgø beege tuuŋ Daan ki køør dhi øtø marge.

⁴³Dhi øt Cuam bäre ki køør kwäänö marge beege jiy ma kume ma pïërabïciel kurŋween ki dïpe aŋween.

⁴⁴'Ba dhøk uudi mo wäät Acer beege dhi øt Yimna, ki dhi øt Yecuwi, ki dhi øt Beria.

⁴⁵Ni dhøk uudi mo wäät Beria beege dhi øt Eber ki dhi øt Melkiël.

⁴⁶'Ba nyeŋ nya Acer beeye Cëëra.

⁴⁷Moøgø beege dhøk uudi mo wäät Acer, ni kwäänge beege jiy ma kume ma pïërabïïc kurdäk ki dïpe aŋween.

⁴⁸'Ba dhøk uudi mo wäät Naptali beege dhi øt Jaadhël, ki dhi øt Guni,

⁴⁹ki dhi øt Jedher, ki dhi øt Cilëm.

⁵⁰Moøgø beege dhøk uudi mo wäät Naptali, ni kwäänge beege jiy ma kume ma pïëraŋween kurbïïc ki dïpe aŋween.

⁵¹'Ba jø Icriel moa kwaan bëët beege jiy ma kume ma dïpe abïciel ka aciel, ki dïpe abïriiø ki pïëradäk.

⁵²Køøre Wuuö Jwøk acäänö ki Modhe, ni kööe,

⁵³ni «Ŋøøm opääŋŋï jï jøøi ki køør kwäänge na ŋøøpo dööŋ jïge.

⁵⁴Ŋøøm wär meetï jï tuuŋ mana päl, ni cïpï ki mo thiinh jï tuuŋ mana thiinh. Tuuŋ man nø doo mooø ki ŋøøm ki køør kwäänge, nee bëëde na marge.

⁵⁵'Ba ŋøøm doo pääŋŋö ki køør ŋïïce mo wø tïïc ki ri kwääk ki baw, ni tuuŋ man nø doo jïtö ki køør nyeŋ kwarge.

⁵⁶Ŋöömmo dööŋ jï jø Icriel doo pääŋŋö yïthakic tuŋi moa døøŋŋø ki moa therø ki køør ŋïïce moøgø.»

⁵⁷'Ba kwään jø tuuŋ Libay ki køør dhøk uudi moge beege dhi øt Gërcön, ki dhi øt Kät, ki dhi øt Mërari.

⁵⁸Ni dhøk uudi mo nyïïkwaac Libay beege dhi øt Löbeni, ki dhi øt Keeprön, ki dhi øt Maali, ki dhi øt Muci, ki dhi øt Köra. 'Ba Kät beeye kwar Amram.

⁵⁹Ni nyeŋ cï Amram beeye Jökabit, ni beeye nyi jø Libay, mana lwaarø ki gø Ijep. Ni ö eni ni nyoote ka Amram ko obwöre adäk, ni beege Aran, ki Modhe, ki cöökge ma Mariyam na näk dhaagø.

⁶⁰Ni ö Aranni ni nywøl Nadap, ka Abiyu, ki Eliedhar, ki Itamer.

⁶¹'Ba Nadap ka Abiyu athøw kanya cïpge maac nyïm Wuuö Jwøk ki jöö mo patha kare.

⁶²'Ba kwään nyïïkwaac Libay moa näk cwøw bëët moa näk jïge da dwäde oceele këël mo kaala dwäde oceele beege jiy ma kume ma pïërariiø kurdäk. 'Ba ge kär kwaan ri jø Icriel møga, kiper na bäŋe ŋøøm mo ocïbö na ŋøøm mo dööŋ jïge dï jø Icriel.

⁶³'Ba moøgø beege jiy moa kwaan Modhe ki Eliedhar na näk Kwääy Lam Mana Dwøŋ, ni beeye kanya kwaan jø Icriel moa näk cwøw pwöl Möap na en buut Naam Jördan na näk dïët ki Jerikö.

⁶⁴'Ba yïthakic jøøgø, bäŋ dïcwøø aciel mo odööŋ ni kwøw røk jøøa kwaan Modhe ka Aran na näk Kwääy Lam Mana Dwøŋ, kanya kwøŋge jø Icriel moa näk cwøw kwaan dï paap Caynay.

⁶⁵Kiper onø caan Wuuö Jwøki jïge ni ge doo thøw dï paap. Bäŋ dïcwøø aciel mo odööŋ rege ni kwøw; 'ba beeye Kalëp o Jöpöni, ki Jøcua o Nun keerge na dööŋ.