Read anuak Kwään Jiy 28 Bible Online

Kwään Jiy 28 - anuak bible

Kwään Jiy 28

¹Køøre Wuuö Jwøk jø Icriel aköömme ki køør dwøl mana caane jï Modhe, ni kööe,

²ni «Gwøgu rou ki man cïpu olämme jïra ki kwöra näk owäŋŋö, ni beeye caammi mo wø cïp jïra no olämme mo wø waaŋ ki maac, na ŋwäänyge met.»

³Ni cäŋ köö, no «Olämme mo wø waaŋ moo cïpu jïra, a na Wuuö Jwøk, beege nyïïdïëk ariiø ma rööm ma nyööi mo cwiicge oceele ni bäŋ gïn mo ogwäyö dëëtge. Olämme moøgø dou cïbö cooth ki yïth cääŋŋe bëët, ni man nø waaŋŋa eni bäre.

⁴'Ba nyidiel aciel dou cïbö ka amöölla, ni cïpu maya kany wø tïme na abøøya;

⁵ni cïpu muuy mar beel thuwø ma møø mo pøøth ma rumi aciel mo lwørra røk rumme apaar moa en yi rumi mana cwøl ni iipa,[18] mo ojääbö ki maaw ma rumme ariiø mo lwørra røk rumme abära moa en yi rumi mana cwøl ni in.[19]

⁶Moøgø beege olämme moo cïpu cooth ki yïth cääŋŋe bëët no olämme mo wø waaŋ, kaawat mana caani jïïu tier Kïn Caynay, ni beege olämme mo wø waaŋ na ŋwäänyge met, ni waaŋŋa jïra, a na Wuuö Jwøk.

⁷'Ba muuy mar køøŋø dou tïïö na rumme ariiø mo lwørra røk rumme abära moa en yi rumi mana cwøl ni in kiper nyidiel aciel man nø, ni kønynyï køøŋŋøgø piny kar lam mana en kur keere jïra, a na Wuuö Jwøk.

⁸Køøre nyidiel maya wär cïpu kany wø päth cäŋŋi, ni cïpu muuy mar møk beel ki muuy mar køøŋø kaawat mana tïïyu ka amöölla, ni beeye olämi man wø waaŋ na ŋwäänynye met jïra, a na Wuuö Jwøk.

⁹«'Ba ki cäŋ jwömö nyïïdïëk ariiø ma rööm ma nyööi mo cwiicge oceele ni bäŋ gïn mo ogwäyö rege wär cïpu no olämme, ki møø mo pøøth ma rumme ariiø ki røk rumme apaar moa en yi rumi mana cwøl ni iipa, mo ojääbö ki maaw, na muuy mar beel, ki muuy thuwø mar køøŋø.

¹⁰Manøgø beeye olämi man wø waaŋ bäre mano cïp kiper cäŋ jwömö, ni meedu gø bäät olämme mo wø waaŋ cooth ki yïth cääŋŋe bëët ni wø cïp na aciel ki muuce mo kwøŋ.

¹¹«'Ba kany wø päär dwääyi cooth, u doo cïpö ko olämi man wø waaŋ bäre jïra, a na Wuuö Jwøk, ni beege rwädhe ariiø mo therø, ki nywø røømmø aciel, ki nyïïdïëk abïriiø ma rööm ma nyööi mo cwiicge oceele mo bäŋ gïn mo ogwäyö dëëtge.

¹²Ni cïpu ki møø mo pøøth thuwø ma rumme adäk ki røk rumme apaar moa en yi rumi mana cwøl ni iipa, mo ojääbö ki maaw, na muuy mar beel kiper rwaath aciel man nø; ni cïpu ki møø mo pøøth ma rumme ariiø ki røk rumme apaar, mo ojääbö ki maaw na muuy mar beel kiper nywø røømmø;

¹³ni cïpu ki møø mo pøøth ma rumi aciel ki røk rumme apaar, mo ojääbö ki maaw na muuy mar beel kiper nyirøømmø aciel man nø. Moøgø beege olämme mo wø waaŋ na ŋwäänyge met, ni waaŋŋa jïra, a na Wuuö Jwøk.

¹⁴'Ba muuy mar køøŋø dou tïïö na rumme aŋween ki røk rumme abära moa en yi rumi mana cwøl ni in kiper rwaath aciel man nø, ki rumme adäk ki røk rumme abära kiper nywø røømmø, ki rumme ariiø ki røk rumme abära kiper nyirøømmø aciel man nø. Manøgø beeye olämi man wø waaŋ kany wø päär dwääyi man nø ki yi cwiir bäre.

¹⁵Køøre nø, nywø ateea aciel thuwø dou cïbö no olämi mar wëën raay jïra, a na Wuuö Jwøk, ni meedu gø bäät olämme mo wø waaŋ cooth ki yïth cääŋŋe bëët ni wø cïp na aciel ki muuce mo kwøŋ.

¹⁶«'Ba kany wø tïm nïr dwääy mana dïkwøŋ na apaar kurŋween, dïcäŋöce beeye ajwöm Cäŋa Pööth Thøøe Yie, ni beeye cäŋ man wø wøørru jïra, a na Wuuö Jwøk.

¹⁷Kanyo tïme na nïne apaar kurbïïc mar dwäänögø, wär wø tïme ni da ajwöma; ni ki mano täge dïcäŋögø, muunni mo rege bäŋ thømmø dou camø ki nïne abïriiø.

¹⁸Ki yi cäŋ mana dïkwøŋ wär tïme ni da acooŋa mo ena kur keere; dïcäŋ manøgø bäre u bäŋ doo tïïö ki tïïc mo teek.

¹⁹'Ba wäru cïpu ko olämi mo di waaŋø, ni beeye olämi man wø waaŋ jïra, a na Wuuö Jwøk, ni beege rwädhe ariiø mo therø, ki nywø røømmø aciel, ki nyïïdïëk abïriiø ma rööm ma nyööi mo cwiicge oceele mo bäŋ gïn mo ogwäyö dëëtge.

²⁰'Ba muuy mar beel thuwø, ni beeye møø mo pøøth mo ojääbö ki maaw, wär cïpu ki lääy moøgø na aciel, ni møø mano cïpu beege rumme adäk ki røk rumme apaar moa en yi rumi mana cwøl ni iipa kiper rwaath aciel man nø, ki rumme ariiø kiper nywø røømmø,

²¹ki rumi aciel kiper nyidiel aciel man nø røk moa na abïriiø.

²²Køøre nø, nywø ateea aciel thuwø dou cïbö no olämi mar wëën raay, nee tïme no okïdi kiperu.

²³Moøgø dou cïbö ni meedu geni bäät olämme mo wø waaŋ ni wø cïpu ka amöölla cooth ki yïth cääŋŋe bëët.

²⁴Wäru cïpu thuwø ko olämme mo teeŋ moøgø ki yïth cääŋŋe bëët kiper nïne abïriiø, ni beeye cam mo di waaŋø mo ŋwäänynye met jïra, a na Wuuö Jwøk. Moøgø doo cïbö ni meedu geni bäät olämme mo wø waaŋ cooth ki yïth cääŋŋe bëët ni wø cïp na aciel ki muuce mo kwøŋ.

²⁵Køøre ri bïriet nïne u doo jïtö ka acooŋa mo ena kur keere, nou ba doo tïïö ki tïïc mo teek dïcäŋögø.

²⁶«'Ba dïcäŋo tïïyu Ajwöma Man Wø Wøør Køør Juu Abïriiø, kany wø cïpu yie ki muuy mar beel mar caammi moa nyärö jïra, a na Wuuö Jwøk, u doo jïtö ka acooŋa mo ena kur keere, nou ba doo tïïö ki tïïc mo teek.

²⁷'Ba wäru cïpu ko olämi man wø waaŋ bäre na gïn mo ŋwäänynye met jïra, a na Wuuö Jwøk, ni beege rwädhe ariiø mo therø, ki nywø røømmø aciel, ki nyïïdïëk abïriiø ma rööm ma nyööi mo cwiicge oceele.

²⁸'Ba muuy mar beel, ni beeye møø mo pøøth mo ojääbö ki maaw, wär cïpu ki lääy moøgø na aciel, ni møø mano cïpu beege rumme adäk ki røk rumme apaar moa en yi rumi mana cwøl ni iipa kiper rwaath aciel man nø, ki rumme ariiø kiper nywø røømmø,

²⁹ki rumi aciel kiper nyidiel aciel man nø røk moa na abïriiø.

³⁰Køøre nø, nywø ateea aciel thuwø dou cïbö, nee tïme no okïdi kiperu.

³¹Moøgø wär cïpu na aciel ki muuy mar køøŋø, ni meedu geni bäät olämme mo wø waaŋ cooth ki yïth cääŋŋe bëët ni wø cïp na aciel ki muuce mo beel. Lääy moøgø wär näk bäŋ gïn mo ogwäyö dëëtge.