Read anuak Kwään Jiy 30 Bible Online

Kwään Jiy 30 - anuak bible

Kwään Jiy 30

¹Køøre Modhe aköö jï wïth tuŋi mo jø Icriel, ni «Mana caan Wuuö Jwøki beeye en:

²Kany wø näk mo dïcwøø kööŋ ki man cïpe ki gïrpiny jï Wuuö Jwøk, wala lama ree ki gïrpiny, luup moe ba dee wiiø ki man kïth bäät tïïc, 'ba gïnöce dee kïtha bäät tïïc kaawat mana ö wøk ki dhee.

³«'Ba kany wø näk mo dhaagø ma nyakøø mo poot ena po wänni kööŋ ki man cïpe ki gïrpiny jï Wuuö Jwøk, wala lama ree ki gïrpiny,

⁴ni näk mo wïny wänni wïnynyö ni lïŋe jaak, gïïa kööŋe kiperge bëët wala moa lam ree ki geni ena bääte.

⁵'Ba ni näk mo män wänni mänö dïcäŋo wïny gø, kööŋ mare wala gïna lam ree ki gø tïmö ni ba en bääte këët. Køøre Wuuö Jwøk nyakøønnøgø owëënne, kiper na mäni ya wänni.

⁶«'Ba ni näk nyakøønnøgø di nywømø ni gïïa kööŋe kiperge, wala gïïa lam ree ki geni ni wïïe käre caarø, poot ena bääte,

⁷ni näk mo wïny cwøre wïnynyö ni lïŋe jaak dïcäŋo wïny gø, gïïa kööŋe kiperge wala gïïa lam ree ki ge ena bääte.

⁸'Ba ni näk mo män cwøre mänö dïcäŋo wïny gø, eni raanynya kööŋ mar cïïe, wala gïna lam ree ki gø ni wïïe käre caarø, ni tïme ni ba en bäät cïïe këët. Køøre Wuuö Jwøk dhaaŋŋøgø di wëënnö.

⁹«'Ba cï thøø wala dhaagø mo obøth, ni näk mo eni kööŋ wala lama ree ki gïrpiny, gïïa kööŋe kiperge wala gïïa lam ree ki geni bëët ena bääte.

¹⁰«'Ba ni näk dhaagø mo onywømø kööŋ wala lama ree ki gïrpiny,

¹¹ni näk mo wïny cwøre wïnynyö ni lïŋe jaak, gïïa kööŋe kiperge wala gïïa lam ree ki geni bëët ena bääte.

¹²'Ba ni näk mo gïïögø okwier cwøre dïcäŋo wïny gø, kööŋ mare wala gïïa lam ree ki geni tïmö ni ba en bääte këët. Køøre eno wëën Wuuö Jwøki, kiper na ö cwøre na kwier gïïögø.

¹³Cø dhaagø jïre da teek ki man jïëc kööŋ wala lam røk, wala ki man kwier kööŋ wala lam røk mana tïïc cïïe.

¹⁴'Ba ni näk mo dïcwøø lïŋö jaak ki nïne møøk, eni døøya kööŋ mo cïïe wala gïïa lam ree ki geni bëët mo teek. Eni døøya geni mo teek bäät dhaagø mare kiper na lïŋe jaak dïcäŋa wïny gø.

¹⁵'Ba ni näk mo ee wïnynyö ni kwier geni ki køør nïne møøk, ajäla mana doo en bäät cïïe tïmö ni ena bääte.»

¹⁶Moøgø beege ciik kiper kööŋ ki lam røk moa caan Wuuö Jwøki ki dhi Modhe kiper bëët dhaanhø ki cïïe, wala bëët nyakøø ki wänni kanyo poode po wänni.