Read anuak Kwään Jiy 31 Bible Online

Kwään Jiy 31 - anuak bible

Kwään Jiy 31

¹Køøre Wuuö Jwøk acäänö ki Modhe, ni kööe,

²ni «Cool kwör jø Icriel dëët jø Midien;[20] 'ba noo tïme na køøre nø, ïïno thøw, ni läpï køør jø pou.»

³Køøre Modhe acäänö ki jø Icriel, ni kööe, ni «Jiiŋŋu jiy kiper leny, nee maarge cøø ni këëtge ki jø Midien, ni coolge kwör Wuuö Jwøk dëët jø Midien.

⁴'Ba u doo jäägö ki jiy ma kuma aciel baŋ leny ki ri tuuŋ man nø røk tuŋi mo jø Icriel.»

⁵Køøre jiy ma kume apaar kurriiø moa no ojiiŋŋø kiper leny, acïp, ni beeye kuma aciel ri tuuŋ man nø na cïp røk tuŋi mo jø Icriel bëët.

⁶Ni ö Modhe ni jääŋ geni baŋ leny, ni beeye kuma aciel ri tuuŋ man nø, ni jääŋ Piniac wär Eliedhar na näk Kwääy Lam Mana Dwøŋ, ni ci baŋ leny ki geni na aciel, ni japa en kur keerge ki tuŋi mo wø kooth na ŋïï kiper leny di käärö.

⁷Køøre gena këëdö ki jø Midien, ni 'näkge cwøw bëët, kaawat mana ö Wuuö Jwøki na kööm Modhe.

⁸'Ba nyeye mo Midien moa näk abïïc anäkge ki jøøgø na aciel, ni nyeŋ nyeye moøgø beege Ëwi, ki Rekem, ki Cuur, ki Ur, ki Riba; ni 'näkge Beelam o Beeyör thuwø ko opëëllö.

⁹Ni ö jø Icrielli ni makge määr jø Midien ki nyïïge bëët moa therø, ni twierge dhäk ki dïëk ki jammi moge bëët.

¹⁰Ni waaŋge päänye moge kwöra bëëtge yïthge, ki twëëre moge bëët,

¹¹ni kälge japa twierge, ki jiy ki lääc paac bëët moa makge ki tøŋ.

¹²Køøre japa twierge, ki jiy ki lääc paac bëët moa makge, akälge baŋ Modhe ki Eliedhar na näk Kwääy Lam Mana Dwøŋ ki lwaa Icriel bäre, na en twïër yi pwöl Möap buut Naam Jördan na näk dïët ki Jerikö.

¹³Køøre Modhe ki Eliedhar na näk Kwääy Lam Mana Dwøŋ, ki dïbwöthe bëët mo lwaa Icriel, aci wøk nee ge røømge ŋää twïër.

¹⁴'Ba kanya ö Modhe na joot geni, ena wëër døc ki kwääc lwaae moa näk dïbwöthe mo ŋati man nø käära jiy ma kuma, ki moa näk ŋati man nø käära jiy ma dïpa, ni beege moa duuö ki baŋ leny bëët.

¹⁵Ni kö Modhe jïge, na «?Aŋø, mään awiiyu bëët ni kwøw?

¹⁶Neennu, moi beege mään moa caath køør pwöc Beelam, na wëëk jø Icriel bääyö dëër Wuuö Jwøk, ki køør luubö mana tägö Pëëgör, kanya put ajäl thøø mar Wuuö Jwøk ö bäät jiye.

¹⁷'Ba ennø, 'nägu obwöc cwøw bëët moa therø, ni 'nägu mään bëët thuwø moa näk dëët cwøw ŋäcge.

¹⁸'Ba obwöc mään bëët moa näk dëët cwøw poot kucge, wär weyu ni kwøwge jïïu.

¹⁹«Køøre uuni bëët, u no onääö ki jiy, ki u na guun dëët jiy mo othøw, wäru bëëdu wøk ŋää twïër ki nïne abïriiø; ni døøyu dëëtu mo waany, u ki jøøa magu ri leny, ki ri dää nïne ki ri bïriet nïne.

²⁰'Ba abïïe bëët, ki jammi bëët moa näk tïïc ka pëët lääy, ki jammi bëët moa näk tïïc ka jïëc ateea, ki jammi bëët moa näk tïïc ka jaath, dou døøya mo waany.»

²¹Køøre Eliedhar na näk Kwääy Lam Mana Dwøŋ aköö jï jø leny moa aa baŋ leny, ni «Man beeye ciik mana caan Wuuö Jwøki ki dhi Modhe, ena köö,

²²ni ‹Jammi bëët mo wø dhal maac dou kïth yi maac ni døøyu ge mo waany, kaamar warkey, ki gwel-bïrö, ki nywïënyö ma jwïël, ki nywïënyö jaak, ka athääri, ki nywïënyö ma arecaac. 'Ba gïïögø thuwø doo døøya mo waany ki pï wø døøc jammi mo waany. 'Ba gïïa näk løny ki man waaŋi maaci doo kïtha yi pïï.

²³

²⁴Køøre abïïe mou dou penyø ki ri bïriet nïne, ni tïmu nou waany. Køør manøgønø, uuno ö twïër.› »

²⁵Køøre Wuuö Jwøk acäänö ki Modhe ni kööe,

²⁶ni «Ïïni ki Eliedhar na näk Kwääy Lam Mana Dwøŋ ki wïth dhøk uudi mo lwaa Icriel, gïïa mak ri leny bëët wär kwaannu, ni beege jiy ki lääc paac bëët.

²⁷Ni pääŋŋu geni yïthakic jøøa aa baŋ leny ki lwaa Icriel bäre.

²⁸Ni jwägu jiy moa aa baŋ leny nee japøgø tïmge na 'moa, a na Wuuö Jwøk. U doo lwötö røk jøøa mak, ki røk dhäk ka arëëni ki dïëk, ni lwørru na aciel aciel røk dïpe abïïc moi nø, nee tïmge na 'moa.

²⁹Lwørru japøgø ri thääŋö mana näk kur jøøa aa baŋ leny, ni cïpu gø jï Eliedhar na näk Kwääy Lam Mana Dwøŋ na muuy jïra, a na Wuuö Jwøk.

³⁰'Ba ki ri thääŋö mana näk kur jø Icriel møga, u doo lwötö røk jøøa mak, ki røk dhäk ka arëëni ki dïëk ki lääc paac bëët, ni lwørru na aciel aciel røk pïërabïïc moi nø, ni mëëgu geni jø tuuŋ Libay, jøøa näk tïï oduŋkaany Wuuö Jwøk ena ceŋge.»

³¹Ni ö Modhe ki Eliedhar na näk Kwääy Lam Mana Dwøŋ ni tïïcge gø kaawat mana ö Wuuö Jwøki na kööm Modhe.

³²'Ba ki røk lääc paac ki jiy bëët moa mak jøøa aa baŋ leny, moa dööŋ na pïï twïër beege dïëk ma kume ma dïpe abïciel ki pïërabïriiø kurbïïc,

³³ki dhäk ma kume ma pïërabïriiø kurriiø,

³⁴ka arëëni ma kume ma pïërabïciel kurciel,

³⁵ki jiy ma kume ma pïëradäk kurriiø, ni beege obwöc mään moa näk dëët cwøw kucge.

³⁶'Ba thäk japøgø moa mëëk jøøa aa baŋ leny na kurge beege dïëk ma kume ma dïpe adäk ki pïëradäk ka abïriiø ki dïpe abïïc;

³⁷ni dïëk moa jwäk na mo Wuuö Jwøk beege dïpe abïciel ki pïërabïriiø kurbïïc.

³⁸Kwään dhäk bëët moa mëëk jøøa aa baŋ leny beege kume ma pïëradäk ka abïciel; ni ki røk moøgø pïërabïriiø kurriiø amëëk Wuuö Jwøk na mo ajwäk.

³⁹Kwään arëëni moa mëëk jøøa aa baŋ leny beege kume ma pïëradäk ki dïpe abïïc; ni ki røk moøgø pïërabïciel kurciel amëëk Wuuö Jwøk na mo ajwäk.

⁴⁰Kwään obwöc mään moa mëëk jøøa aa baŋ leny beege kume apaar ka abïciel; ni ki røk moøgø pïëradäk kurriiø amëëk Wuuö Jwøk na mo ajwäk.

⁴¹Køøre Modhe jiy ki lääc paac bëët moa jwäk na muuy jï Wuuö Jwøk, amëëk Eliedhar na näk Kwääy Lam Mana Dwøŋ, kaawat mana ö Wuuö Jwøki na kööm Modhe.

⁴²'Ba thääŋö mana näk kur jø Icriel, na cïp Modhe kur keere ki ri thääŋö mar jøøa aa baŋ leny,

⁴³na mëëk lwaa Icriel, beege dïëk ma kume ma dïpe adäk ki pïëradäk ka abïriiø ki dïpe abïïc,

⁴⁴ki dhäk ma kume ma pïëradäk ka abïciel,

⁴⁵ka arëëni ma kume ma pïëradäk ki dïpe abïïc,

⁴⁶ko obwöc mään ma kume apaar ka abïciel.

⁴⁷'Ba ki ri thääŋö mana mëëk jø Icriel na kurge, Modhe alwötö ka aciel aciel ri pïërabïïc, ni beege jiy ki lääc paac bëët, ni mëëk ge jø tuuŋ Libay, jøøa näk tïï oduŋkaany Wuuö Jwøk ena ceŋge, kaawat mana ö Wuuö Jwøki na kööm Modhe.

⁴⁸Køøre kwääc lwaae moa näk dïbwöthe mo ŋati man nø käära jiy ma kuma, ki moa näk ŋati man nø käära jiy ma dïpa, aö baŋ Modhe,

⁴⁹ni köge jïgø, ni «Waani, wa na jiyï, jiy bëët moa en ceŋwa moa aa baŋ leny akwaanwa, ni bäŋ dhaanhø mo tøør dëëtwa.

⁵⁰'Ba ennø, waana kännö ki muuy jï Wuuö Jwøk ki røk japa joot ŋati man nø dëëtwa, ni beege jammi moa näk tïïc ka warkey, ni beege oguudi mo bäädi ki mo ceŋ, ki gwet lweedi ki mo ïdhi, ki mo cwägi, nee tïme na gïn mo wëënna bääyö marwa nyïm Wuuö Jwøk.»

⁵¹Køøre Modhe ki Eliedhar na näk Kwääy Lam Mana Dwøŋ japa näk tïïc ka warkey bëët alwørge ceŋge.

⁵²'Ba warkey bäre mana cïpge na muuy jï Wuuö Jwøk beeye kar gwel ma kume apaar ka abïciel ki dïpe abïriiø ki pïërabïïc mar rumi mana cwøl ni cekel; ni japøgø käla baŋ dïbwöthe mo leny moa näk käära jiy ma kume ki ma dïpe.

⁵³'Ba kar kaaca, jøw moa ci baŋ leny bëët, ŋati man nø onø kädö ki jammi kiper dëëre røk jammi moa twierge.

⁵⁴Ni ö Modhe ki Eliedhar na näk Kwääy Lam Mana Dwøŋ ni lwørge warkey ceŋ dïbwöthe mo leny moa näk käära jiy ma kume ki ma dïpe, ni kïthge gø yo oduŋkaany røømmø, nee bëëde na gïr par wïc jï jø Icriel nyïm Wuuö Jwøk.