Read anuak Kwään Jiy 35 Bible Online

Kwään Jiy 35 - anuak bible

Kwään Jiy 35

¹'Ba kanya en jø Icrielli pwöl Möap buut Naam Jördan, løøa dïët ki Jerikö, Wuuö Jwøk acäänö ki Modhe, ni kööe,

²ni «Kööm jø Icriel nee cïpge ki päänye jï jø tuuŋ Libay nee bëëtge yïthge røk päänye moo cïp jï jø Icriel na kurge; ni moocge jø tuuŋ Libay thuwø ki kwör kwaath buut päänye moøgø.

³Køøre päänye moøgø doo tïmö na moge, nee bëëtge yïthge, ni kwör kwaath thuwø doo tïmö na kwör kwaath jïge kiper dhäk ki dïëk ki lääc paac møga moge bëët.

⁴«'Ba kwöro cïpu na kwör kwaath jï jø tuuŋ Libay lak päänye, doo tägö ki røk kiiri ni cøøa wøk ŋäth päänye, ni bär mar kar kwaath man nø doo tïmö na rumme ma gööye ma kuma aciel.

⁵'Ba uuni ŋää kiir wøk dou rømø, ni jï løø kur tuul-cäŋ wär näk rumme ma gööye ma kume ariiø, ni jï løø tier-piny ki pääny wär näk rumme ma gööye ma kume ariiø, ni løø pääny jï løø kur pänh-cäŋ wär näk rumme ma gööye ma kume ariiø, ni jï løø wï-piny ki pääny wär näk rumme ma gööye ma kume ariiø; 'ba pääny doo ena dïër. Moøgø doo tïmö na kwör kwaath kiper lääc paac moge.

⁶«'Ba päänye abïciel røk päänye moo cïpu jï jø tuuŋ Libay otïmö na päänye mo gwøk røk, kiper nee ŋat mo onägö ki dhaanhø nee reŋ ya aciel røk päänye moøgø. Køøre wäru cïpu thuwø ki päänye møøk ma pïëraŋween kurriiø mo ba en røk päänye moøgø.

⁷'Ba kwään päänye bëët moo cïpu jï jø tuuŋ Libay doo tïmö na pïëraŋween ka abära, ni cïpu na aciel bëët ki kwör kwaath moa en lakge.

⁸'Ba ki røk päänye moo ci jï jø Icriel, wäru kädu ki päänye mo thööth ri tuuŋ mana dwøŋ, ni kädu ki mo nøk ri tuuŋ mana thiinh, ni cïpu ge jï jø tuuŋ Libay. Tuuŋ man nø doo cïpö røk päänye moe jï jø tuuŋ Libay ki køør kwään päänye moa en jïre.»

⁹Køøre Wuuö Jwøk jø Icriel acäänne ki køør dwøl mana caane jï Modhe, ni kööe,

¹⁰ni «Kanyo ŋøllu Naam Jördan, ni cou yi ŋööm Keenan,

¹¹wäru jëëtu ki päänye nee bëëtge na kwör gwøk røk mou, kiper nee da ŋat mo nägö ki dhaanhø ni ba kame, nee reŋ ya aciel dïge.

¹²'Ba päänye moøgø obëëdö na kwör gwøk røk jï jø wø ŋweec kwör, kiper nee dhaanhø mo ree da kwör nee ba thøøe kanyo poode ni eni kär ci kar ŋøl luup nyïm jø acooŋa.

¹³'Ba päänye moo cïpu na abïciel yøø otïmö na päänye mo gwøk røk.

¹⁴Wär näk päänye adäk cïpu løø Naam Jördan løøi, ni cïpu adäk møøk yi ŋööm Keenan, nee tïmge na päänye mo gwøk røk.

¹⁵Päänye moøgø na abïciel yøø, otïmö na kwör gwøk røk jïïu, u na jø Icriel, ki juurre mo wø bëëdö dïïu, kiper nee ŋat mo nägö ki dhaanhø ni ba kame nee reŋ ya aciel dïge.

¹⁶«'Ba ni näk dhaanhø wati di gøø ki nywïënyö, ni ö ŋata gøøc ni thøøe, ŋata gööyö enø beeye dïnääy, ni dïnääy manøgø doo nääö.

¹⁷Wala ni näk dhaanhø cere da kïdi mo løny ki man 'näk dhaanhø ki gø, ni këël wati ki gø, ni ö ŋata këël ni thøøe, ŋata këëtö enø beeye dïnääy, ni dïnääy manøgø doo nääö.

¹⁸Wala ni näk cer dhaanhø da jaath mo løny ki man 'näk dhaanhø ki gø, ni gøøc wati ki gø, ni ö ŋata gøøc ni thøøe, ŋata gööyö enø beeye dïnääy, ni dïnääy manøgø doo nääö.

¹⁹Ŋat wø cool kwör ki dëëre, dïnääy manøgø dee nääö; ni kany wø røømme yie ki gø jaak, dee nääö.

²⁰Ni näk dhaanhø wati di cöörö ki køør män mana en cwïnye, wala thööra gøøni ki gïrpiny ni eno møør piny, ni thøw ŋatøce,

²¹wala ni näk mo dhaanhø män ki wati, ni gøøc gø ni cere ee miiø, ni thøw ŋatøce, ŋata gööyö enø doo nääö, kiper ena dïnääy. Ŋat wø cool kwör, dïnääy manøgø dee nääö kany wø røømge ki gø jaak.

²²«'Ba ni näk dhaanhø wati di cöörö ni bäŋ män cwïnye, wala thööra gø ki gïrpiny ni kär møør piny,

²³wala leeŋa kïdi bäät gø ni kuue, ni beeye kïdi mo dhaanhø thøw ki gø, ni thøw ŋatøgø; 'ba eni ba män ki gø, ni ba many man mooc dëër gø ki ŋwellø,

²⁴jø acooŋa luum ŋatøgø ki ŋat wø cool kwör dege ŋølø ki køør ciik moøgø.

²⁵Ni gwøkge ŋata näk ree da kwör cer ŋat wø cool kwör, ni dwøkge gø pääny mar gwøk røk kanya reŋ yie. Køøre eni doo bëëdö kaace këël mano thøw Kwääy Lam Mana Dwøŋ, ŋata näk ojørø ki maara en kur keere.

²⁶«'Ba ni näk ŋata näk ree da kwör cäädhö wøk ni kaal keew mar pääny gwøk røk mana näk eno reŋ yie,

²⁷ni jooti ya ŋat wø cool kwör wøk, ni näk mo ŋat wø cool kwör ŋata näk ree da kwör ee nääö, eni bäŋ bääyö bääte.

²⁸Kiper ŋata näk ree da kwör doo bëëdö yi pääny mar gwøk røk këël mano thøw Kwääy Lam Mana Dwøŋ. 'Ba beeye køør thøw Kwääy Lam Mana Dwøŋ keere noo døø ŋatøgø yi ŋöömma bëëde yie.

²⁹«'Ba moøgø bëët obëëdö na ciik kiperu kwöro bëëdu yïthge këël yïth beenhnhe mou moo ööi bëët.

³⁰«Ŋat mo onägö ki dhaanhø, thøø doo ŋøla bääte ki køør luup moo caan jøøa näk nutö kar kaace. 'Ba kär dee dhaanhø mo 'näk ki køør luup moo caan dhaanhø acielli.

³¹«Kär nou jïëy ki man lwørru jap wïïr kwör baŋ ŋat ma dïnääy mo thøø onø ŋøl bääte; ka adïëri møn, eni doo nääö.

³²«Kär nou jïëy ki man lwørru jap wïïr kwör baŋ ŋata no oreŋ yi pääny gwøk røk, kiper nee døø yi ŋöömma bëëde yie ni Kwääy Lam Mana Dwøŋ poot kär thøw.

³³«'Ba ciik moøgø dou gwøø nee ŋöömö mano bëëdu yie nee ba ränynye. Kiper køny remø piny, ŋöömö di raanynyø; ni bäŋ gïn mo wëënna bääyö yi ŋöömö mo remø okøny piny yie, ni näk mo paa rem ŋata køny rem dhaanhø piny keere.

³⁴Kär nou raanynya ŋöömö mano bëëdu yie, ni beeye kanyo bëëda yie thuwø; kiper a na Wuuö Jwøk a wø bëëdö dï jø Icriel.»