Read anuak Kwään Jiy 5 Bible Online

Kwään Jiy 5 - anuak bible

Kwään Jiy 5

¹Køøre Wuuö Jwøk acäänö ki Modhe, ni kööe,

²ni «Kööm jø Icriel kiper nee jiy moa näk dëëtge da täw buny dëël, ki moa näk dëëtge da gïï mo cwëëyö, ki jiy moa näk dëëtge da läp nee kïthge wøk ŋää twïër.

³Cwøw ki mään bëët mo dëëtge da gïïögø wär kïth wøk ŋää twïër, kiper nee twïër mar lwaa Icriel ba raanyge, na näk kany wø bëëda yie yïthakicge.»

⁴Ni ö jø Icrielli ni tïïcge gïnögø; ni kïthge jøøgø wøk ŋää twïër. Ni tïïcge gïnögø na kare kaawat mana ö Wuuö Jwøki na kööm Modhe.

⁵Køøre Wuuö Jwøk acäänö ki Modhe, ni kööe,

⁶ni «Caanï jï jø Icriel, ni kany wø näk da dïcwøø wala dhaagø mo obääyö dëër dhaanhø mør, ni gaa wøk ri ciik Wuuö Jwøk, kanyo joot bääyö mare,

⁷eni gïna baae dee købø. Ni dwøk gïna näk ee kälö na kare, ni mëët bäät gø,[6] ni mëëk gø ŋata bääye dëër gø.

⁸'Ba ni näk ŋata bääye dëër gø tøør, ni bäŋ tuuŋge mo lwør japøgø, japøgø oci jï Wuuö Jwøk, ni mëëgi dïlämi, ni dwali na aciel ki nywø røømmø mano cïp no okïdi.

⁹«Køøre thuwø, muuce bëët moa näk ena kur keerge ni wø cïp jø Icrielli jï dïlämi, wär tïmge na moe.

¹⁰'Ba japo en kur keerge mo wø cïp ŋati man nø jï dïlämi wär tïmge na mo dïlämmöca.»

¹¹Køøre Wuuö Jwøk Modhe aköömme

¹²nee luup moi caane jï jø Icriel, ni kööe, ni «Kanymør da ŋat mo cïïe ree ee paanyø ni bääye dëër cwøre,

¹³ni bute ki dïcwøø mør ni kuc cwøre, ni raany ree ni kuc, ni bäŋ ŋat mo ojoot gø, ni eni kär maa ki luk.

¹⁴Kanymør cwøre dëëtö ki cwïnye ki køør päl cwïny mare ni cïïe dëëre ee raanynyø; wala da ŋat mo dëëtö ki cwïnye jaak, ki køør päl cwïny mare ki cïïe, 'ba cïïe dëëre käre raanynyø.

¹⁵Ni näk mo teeŋ acaare moøgø otägö, ŋateca cïïe wär käl baŋ dïlämi. Ni känne ki muuy man wø manynyi kipere, ni beeye møk bëëlö ma rumi aciel mo lwørra røk rumme apaar moa en yi rumi mana cwøl ni iipa.[7] Kär nee kunynya bäät gø ki maaw, wala kïtha bäät gø ki gïn wø jïye ŋwääi ni met, kiper beeye muuy mar beel mana cïp na kar päl cwïny, na gïr par wïc, nee luubö mana na adïëri joot.

¹⁶«Køøre dïlämi dhaaŋŋøgø dee kälö ni wëëk gø cuŋŋö nyïm Wuuö Jwøk.

¹⁷Ni ö dïlämi ni lwöte ki pïï moa en kur keere yi dak, ni lwöte ki tør piny yo oduŋkaara na näk kar bëëtö mar Wuuö Jwøk, ni kïth gø yi pïï.

¹⁸'Ba dïlämi dhaaŋŋøgø owëëk cuŋŋö nyïm Wuuö Jwøk, ni pät jïëc gø, ni cïp muuy mar beel cer gø na gïr par wïc, ni beeye muuy mana cïp na kar päl cwïny; ni pïïögø na keec yøø ni wø duunni ka acïëni ena cer dïlämi.

¹⁹Ni ö dïlämi ni wëëk dhaaŋŋøgø kööŋ, ni kööe, ni ‹Ni näk ï kär butö ki dïcwøø mør, ni riï kärï paanyø buut cwørï, ni kärï riï raanynyø keerï niï ena po cwørï, dööŋï wøk ka acïëni mano ööi ki køør pïï moi ni keec ii.

²⁰'Ba ni näk mo riï iï paanyø buut cwørï, ni raanynyï riï niï poot ena paare, ni butï ki dïcwøø mør mo patha cwørï, Wuuö Jwøk ïïno wëëk cien.›

²¹Køøre dïlämi dhaaŋŋøgø owëëk kööŋ nee dëëre lame; ni ö dïlämi ni kööe jïre, ni ‹Ni näk riï iï paanyø buut cwørï, ïïno tïïc Wuuö Jwøki ni ïïno cienø dï jø pou, ni ö Wuuö Jwøki ni raany kar nyöödö marï ni wëëk yiï kwöt.

²²Pïï mo wø duunni ka acïëni oci yiï, ni raany kar nyöödö marï ni wëëk yiï kwöt.› «Køøre dhaagø doo köö, ni ‹Enøgønø; aana jïëy.›

²³«Køøre dïlämi jap acïëni moøgø dee gööra yi wëëlö ni peny gø yi pïïa keec.

²⁴Ni wëëk nyijøøgø maath pïïa keec mo wø duunni ka acïëni, ni ö pïïyi ni cige yie ni mooc eni ki rääm mo dwøŋ.

²⁵Ni ö dïlämi ni käl muuy mar beel mana cïp na kar päl cwïny, ni käl gø wøk cer dhaaŋŋøgø, ni tïŋ gø maal ni tuuŋ gø nyïm Wuuö Jwøk, ni käl muuy manøgø buut gïn wø cïp olämme bääte.

²⁶Ni lwöte ki yi cere ri muuy mar beegøgø na gïr par wïc, ni waaŋ gø bäät gïn wø cïp olämme bääte; køøre, dhaagø dee wëëga maath pïïögø.

²⁷Kanyo nø wëëk nyijøøgø maath pïï, ni näk nyijøøgø dëëre ee raanynyø ni bääye dëër cwøre møn, pïï mo wø duunni ka acïëni oci yie ni duunne ki rääm mo dwøŋ dëëre, ni ö yie ni kwöde ni räny kar nyöödö mare; ni tïm dhaaŋŋøgø no ocienø dï jø poge.

²⁸'Ba ni näk dhaaŋŋøgø gïnögø käre tïïö ni dëëre käre raanynyø, eno bëëdö ni bäŋ ajäla bääte, ni jïte ko obwöre.

²⁹«Manøgø beeye ciik kiper luum adïëda man wø tägi ki køør päl cwïny, kany wø ö dhaage ni paany ree ni raany dëëre keere ni eni ena paare,

³⁰wala kany wø ö dïcwøø wø jït cwïnye ki gïr adïëda ki køør päl cwïny mare ki cïïe. Køøre cïïe okäl nyïm Wuuö Jwøk, ni ö dïlämi ni tïïc gïïa caan ciiki manøgø bäre dëër dhaaŋŋøgø.

³¹Ni ö dïcwøønnøgø ni dööŋe wøk yïth raayøgø, 'ba ni näk dhaaŋŋøgø obääyö, raaye oen wïïe.»