Read anuak Kwään Jiy 6 Bible Online

Kwään Jiy 6 - anuak bible

Kwään Jiy 6

¹'Ba Wuuö Jwøk acäŋ cäänö ki Modhe, ni kööe,

²ni «Caanï jï jø Icriel: Ni näk dïcwøø wala dhaagø kööŋ ki man cïp ree kur keere jï Wuuö Jwøk na ŋat Nadhir,[8]

³ree dee mänö ki køøŋ nyïïomøki, ki teeŋ kwøŋ møøk, ni eni ba doo mädhö ki pï nyïïomøki, ni ba nhudhe ki nyïï gø wala nyama nyïï gø moa näk otal.

⁴Ki yïth nïne bëët mo wø beede ni ree ee cïp kur keere na ŋat Nadhir, eni ba doo cämö ki gïn mo käla ri jaadhøgø, ki mana täge ri nyïëdi këël bøøge moe.

⁵«Ki yïth nïne bëët moa kööŋe kiperge na cïp ree kur keere na ŋat Nadhir, wïïe bäŋa doo lielø. Këël kany wø thum nïne yie moa näk ree ee cïp kur keere jï Wuuö Jwøk, eni doo bëëdö ni ena kur keere, ni piith jïëc wïïe ni bäyö.

⁶«Ki yïth nïne bëët mo wø beede ni ree ee cïp kur keere jï Wuuö Jwøk, eni ba doo nyänhnha kany mo cään ki dhaanhø mo othøw.

⁷Këël thøwa wänni wala menni wala coki mana näk dïcwøø wala mana näk dhaagø, dëëre ba dee raanynyø ki man gut gø, kiper kööŋ mana cïp ree kur keere ki gøøni jï Wuuö Jwøk poot ena bääte.

⁸Ki yïth nïne bëët mo wø beede ni ena ŋat Nadhir, eni ena kur keere jï Wuuö Jwøk.

⁹«'Ba ni näk da dhaanhø mo thøw buute ni cwöba ree, ni jït ree ki läbö, ni tïm jïëc wïïe ni ba waany këët, dïcäŋo døøc ree mo waany yie ri bïriet nïne, wïïe wär liel.

¹⁰Noo tïme na bäc nïne, eni doo kännö ka atuuy ariiø wala nyïï akuyi ariiø jï dïlämi dho oduŋkaany røømmø.

¹¹Ni ö dïlämi ni cïp atuuk wala akuuru aciel no olämi mar raay, ni cïp maya no olämi man wø waaŋ bäre, ni døøc ŋatøgø mo waany kiper mana bääye na gut dhaanhø mo othøw. Ni ö ŋatøgø ni cäŋ jïëc wïïe tïïyö ni ena kur keere dïcäŋöce.

¹²Ni cäŋ ree cïp kur keere jï Wuuö Jwøk, ni bëëde ki nïne møøk ni ena ŋat Nadhir, ni känne ki nywø røømmø mo cwiine aciel nee cïp no olämi na kar bääyö mare. 'Ba nïne moa dïkwøŋ otïmö ni bäŋ karge këët, kiper na jït dëëre ki läbö.

¹³«'Ba ciik kiper ŋat wø cïp ree na ŋat Nadhir, kanyo thum nïne moa cïp ree kur keere jï Wuuö Jwøk ki geni, beeye en; eni doo käla dho oduŋkaany røømmø.

¹⁴Ni ö eni ni cïp olämi mare mano waaŋ bäre jï Wuuö Jwøk, ni beeye nyidiel ma røømmø ma nywøk mo cwiine aciel mo bäŋ gïn mo ogwäyö dëëre, ko olämi man wø duunni ki mëër, ni beeye nyidiel ma røømmø ma maath mo cwiine aciel mo bäŋ gïn mo ogwäyö dëëre,

¹⁵ki gupa mo yie da muunni mo rege bäŋ thømmø, na näk muunni mo odeelø no opamø mo tïïc ka møø mo pøøth mo ojääbö ki maaw, ki muunni mo rege bäŋ thømmø mo odeelø no opamø ni reep mo bäätge okïthö ki maaw, ni cïpe thuwø ki muuce mo muunni ki mo kwøŋ mo wø cïp na aciel ko olämme.

¹⁶«Ni ö dïlämi ni cïp ge nyïm Wuuö Jwøk, ni tïïc olämi mar raay ko olämi man wø waaŋ na kare bäre kiper ŋatøgø.

¹⁷Ni cïp nywø røømmø jï Wuuö Jwøk no olämi man wø duunni ki mëër, ki gupa mana näk yie da muunni mo rege bäŋ thømmø; ni ö dïlämi thuwø ni cïp muuy mar møø ki muuy mar køøŋø man wø cïp na aciel ko olämi.

¹⁸«Ni ö ŋat Nadhir ni liel jïëc wïïe na näk ee cïp kur keere, ni liele buut dho oduŋkaany røømmø. Ni käl jïëc wïïe na en kur keere ni kïth gø yi maac, ni waaŋi na aciel ko olämi man wø duunni ki mëër.

¹⁹«Ni ö dïlämi ni lwør bat nywø røømmø mana näk othaalø, ni kän wøk ki møø aciel mo kär coodø ki thømmø ki yi gupa, ki møga reep na näk kär coodø ki thømmø, ni cïp gïïögø ceŋ ŋat Nadhir na näk jïëye na en kur keere ee nø gwäär wøk;

²⁰ni ö dïlämi ni tuuŋ geni yi jamø na muuy man wø tuuŋŋi nyïm Wuuö Jwøk. Gïïögø, ki gøŋŋø mano tuuŋŋi yi jamø, ki ääm mano cïp, beege moa cïp kur keerge na kur dïlämi. Køøre nø, ŋat Nadhir manøgø løny jïre ki man mäthe ki køøŋ nyïïomøki.

²¹«Manøgø beeye ciik kiper ŋat Nadhir mano kööŋ ni eni cïpö ko olämme jï Wuuö Jwøk ki køør mano cïp ree kur keere na ŋat Nadhir. 'Ba ni näk eni kööŋ ki man cïpe ko olämme møøk, mo kaala moa caan ciiki, dee puta cïp na kare ki køør kööŋ mare.»

²²Køøre Wuuö Jwøk acäänö ki Modhe, ni kööe,

²³ni «Caanï jï Aran ki wääte: Ni jöö mano wäro gwïëthu jø Icriel ki gø beeye en; u doo köö jïge,

²⁴« ‹Wuuö Jwøk uuno gwïëdhe ni gwøk uuni;

²⁵Wuuö Jwøk täärnyïme owëëk rieny bäätu, ni nyooth met ec mare jïïu;

²⁶Wuuö Jwøk jïïu oraŋi ni täärnyïme leer, ni cïp bëët-mëër jïïu.›

²⁷«Køøre nyeŋŋa okïthge bäät jø Icriel na enøgønø, ni gwïëdha jø Icriel.»