Read anuak Kwään Jiy 8 Bible Online

Kwään Jiy 8 - anuak bible

Kwään Jiy 8

¹Køøre Wuuö Jwøk acäänö ki Modhe ni kööe,

²ni «Caanï jï Aran, ni ‹Kany wäro cïbï lambae moa na abïriiø karge, däär maac marge doo meenya nyïm gïn wø bëët lambae bääte.› »

³Ni ö Aranni ni tïïc gø. Eni lambae acïp karge, nee nyïm gïn wø bëët lambae bääte meenyge kaawat mana ö Wuuö Jwøki na kööm Modhe.

⁴Tïïc mana tïïc gïn wø bëët lambae bääte ki gø beeye en; dëëre bäre thääth ka warkey, ni tägi ka tiere piny këël wïth tuge maal. Gïn wø bëët lambae bääte manøgø atïïc na kare ni caala gïna nyooth Wuuö Jwøki jï Modhe.

⁵'Ba Wuuö Jwøk acäŋ cäänö ki Modhe, ni kööe,

⁶ni «Lwør jø tuuŋ Libay dï jø Icriel ni døøyï geni mo waany.

⁷Kanyo døøyï geni mo waany, gïno tïïyï dëëtge beeye en; pïï mo wø døøc dhaanhø mo waany yïth raay wär jør dëëtge, ni wëëgï geni liel jïëc dëëtge ni penyge abïïe moge, nee rege døøcge mo waany.

⁸Køøre ge lwötö ki rwaath ki muuy mar beel na näk møga pøøth mo ojääbö ki maaw, ni lwötï thuwø ki rwaath mør no olämi mar raay.

⁹Ni kälï jø tuuŋ Libay nyïm oduŋkaany røømmø, ni cooŋï lwaa Icriel bäre kanya ciel.

¹⁰Kanyo kälï jø tuuŋ Libay nyïma, a na Wuuö Jwøk, jø Icriel ceŋge dege cïba bäät jø tuuŋ Libay,

¹¹ni ö Aranni ni cïp jø tuuŋ Libay jïra, a na Wuuö Jwøk, ni caala muuy man wø tuuŋŋi yi jamø mo ööi ki baŋ jø Icriel, kiper nee tïïc mara, a na Wuuö Jwøk, tïïcge.

¹²«Køøre jø tuuŋ Libay ceŋge dege cïba wïth rwäthögø, ni cïpï aciel no olämi mar raay, ni cïpï maya no olämi man wø waaŋ jïra, a na Wuuö Jwøk, nee tïme no okïdi kiper jø tuuŋ Libay.

¹³Køøre jø tuuŋ Libay wär wëëk cuŋŋö nyïm Aran ki wääte, ni cïpï geni jïra, a na Wuuö Jwøk, ni caala muuy man wø tuuŋŋi yi jamø.

¹⁴Manøgø beeye jöö mana diï jø tuuŋ Libay ki jø Icriel møga pääŋŋö ki gø, ni tïm jø tuuŋ Libay na 'moa.

¹⁵«Køøre nø, noo nø døøyï jø tuuŋ Libay mo waany, ni cïpï geni ni caala muuy man wø tuuŋŋi yi jamø, løny ki man cige yi tïïc mar oduŋkaany røømmø.

¹⁶Kiper beeye geni na cïp jïra na bäre dï jø Icriel, a na Wuuö Jwøk. Gena käla na 'moa na kar kaai mo jø Icriel bëët.

¹⁷Kiper kaai bëët mo jø Icriel moa näk cwøw ki kaai bëët mo lääc paac moge beege 'moa. Dïcäŋa nääa kaai bëët mo Ijep, kaai mo jø Icriel acïba kur keerge na 'moa;

¹⁸ni beeye ni lwøra jø tuuŋ Libay en na kar kaai bëët mo jø Icriel.

¹⁹Røk jø Icriel, jø tuuŋ Libay acïba na muuy jï Aran ki wääte, nee tïï oduŋkaany røømmø tïïcge kiper jø Icriel, ni tïmge kaamar okïdi, nee bäŋe gïn mo raac mo pïï dëët jø Icriel, mo caala gïna doo tägö kany wø näk mo geno nyänh buut oduŋkaara na näk kar bëëtö mara, a na Wuuö Jwøk.»

²⁰Køøre gïïögø bëët atïïc Modhe ka Aran ki lwaa jø Icriel dëët jø tuuŋ Libay ki køør mana ö Wuuö Jwøki na kööm Modhe.

²¹Ni ö jø tuuŋ Libay ni døøcge rege mo waany ki raay, ni penyge abïïe moge; ni ö Aranni ni cïp geni nyïm Wuuö Jwøk ni caala muuy man wø tuuŋŋi yi jamø, ni tïïe ko okïdi kiperge, nee ge døøc mo waany.

²²Køøre jø tuuŋ Libay aci yi tïï oduŋkaany røømmø ni ge ena cer Aran ki wääte. 'Ba ki køør mana ö Wuuö Jwøki na kööm Modhe, gïïögø atïïcge dëët jø tuuŋ Libay na karge.

²³Ni kö Wuuö Jwøki jï Modhe,

²⁴«Man beeye ciik kiper jø tuuŋ Libay; cwøw mo cwiicge tägi ka pïërariiø kurbïïc këël mo kaala pïërariiø kurbïïc doo cøøa yi tïïc mar oduŋkaany røømmø;

²⁵'ba kany wø päŋ cwiiri moge na pïërabïïc, ge doo ööa wøk yi tïïc, ni ge ba doo tïïö ki tïïe mo teek këët.

²⁶'Ba kar kanyøgø, løny jïge ki man kønyge nyïïmëëkge ki man gwøkge oduŋkaany røømmø; 'ba geni ki dëëtge ge ba doo tïïö ki tïïe mo teek. Manøgø beeye jöö mano cïbï tïïc ceŋ jø tuuŋ Libay ki gø.»