Read anuak Kwään Jiy 9 Bible Online

Kwään Jiy 9 - anuak bible

Kwään Jiy 9

¹'Ba na tïme na ri riet cwiiri moa ö jø Icrielli wøk ki Ijep, ri dwääy mana dïkwøŋ, Wuuö Jwøk acäänö ki Modhe dï paap Caynay, ni kööe,

²ni «Jø Icriel ajwöm Cäŋa Pööth Thøøe Yie wär wøørge na kare yi kanya näk owäŋŋö.

³Kanyo tïme na ri nïne apaar kurŋween yi dwääni, kanyo tïm pinynyi na wïthïënhö, ajwöma manøgø wär wøørru ki køør ciik moe ki uutjïëthe moe bëët, ni beeye kanya näk owäŋŋö.»

⁴Køøre Modhe acäänö ki jø Icriel nee ajwöm Cäŋa Pööth Thøøe Yie nee wøørge.

⁵Køøre na tïme na ri nïne apaar kurŋween yi dwääy mana dïkwøŋ ni pinynya wïthïënhö, ajwöm Cäŋa Pööth Thøøe Yie awøørge dï paap Caynay. Gïnögø atïïc jø Icrielli na kare ki køør mana ö Wuuö Jwøki na kööm Modhe.

⁶'Ba da jiy mo dëëtge da läp kiper mana gutge dëër dhaanhø mo othøw, ni käre løny jïge ki man wøørge ajwöm Cäŋa Pööth Thøøe Yie dïcäŋeca. 'Ba ki dïcäŋeca gena put ö nyïm Modhe ka Aran.

⁷Ni köge jï Modhe, «?Aŋø, këël na bëëtwa ni dëëtwa da läp kiper mana gutwa dëër dhaanhø mo othøw, aperŋø ni män wa ki man cïpwa olämi mar Wuuö Jwøk ki jø Icriel na aciel yi kanya no owäŋŋö?»

⁸Ni kö Modhe jïge, ni «Cuŋŋu turu, nee Wuuö Jwøk pëënynya ki gïno caane kiperu.»

⁹Køøre Wuuö Jwøk aköö jï Modhe,

¹⁰ni «Caanï jï jø Icriel: Ni ni näk da dhaanhø rou wala røk nyïïkwaayu mo dëëre da läbö ki køør mana gut dëër dhaanhø mo othøw, wala dhaanhø mo ree ojïtö ki wääth kany mo bäär, eni ajwöm Cäŋa Pööth Thøøe Yie poot dee wøørø thuwø jï Wuuö Jwøk.

¹¹Kanyo tïme na ri nïne apaar kurŋween ri riet dwäde, ajwöma manøgø wär wøørge ki wïthïënhö. Nyidiel ocamge ki muunni mo rege bäŋ thømmø, ko omarø mo keec.

¹²Kär dee gø mo wecge mo këëta amöölla, ni bäŋe cöö mo toorge ri gø. Ajwöm Cäŋa Pööth Thøøe Yie wär wøørge ki køør ciik moe bëët.

¹³'Ba dhaanhø mo dëëre waany mo ba en kany mo bäär, noo kweere jaak ki man wøør ajwöm Cäŋa Pööth Thøøe Yie, eni wär tïme ni tøør yïthakic tuuŋge, kiper na käre olämi mar Wuuö Jwøk cïbö yi kanya no owäŋŋö. 'Ba ŋatøgø bääyö mare oen wïïe.

¹⁴«Ni näk da jur dïïu mo manynya man wøør ajwöm cäŋ Cäŋa Pööth Thøøe Yie jï Wuuö Jwøk, wär wøøre ki køør ciik moe ki uutjïëthe moe bëët. Kiper beeye ciik aciel jïïu kiper jur ki dhaanhø ma o thwønh paayø.»

¹⁵Dïcäŋa ö oduŋkaany wø nyooth luumma tuut Jwøki ki jiy na guri piny, pöölö aöö ni uum gø. 'Ba kanya tïme na wïthïënhö, pöölö atïmö ni nëëni kaamar maac bäät oduŋkaara, këël mana këët amöölla.

¹⁶Ni put bëëdö na enøgønø cooth, ni ö pööllögø ni uum oduŋkaara ki dïcäŋ, ni bëëde ni liel thuwø ki wäär kaamar maac.

¹⁷'Ba kany wø ö pöölö wø tïŋi maal bäät oduŋkaara, kar kaagø jø Icriel wø tïŋŋö; 'ba kany wø ö pöölö wø duu piny yie, jø Icriel thuwø puta tïïö ki twïër kaace.

¹⁸Ki køør dwør Wuuö Jwøk jø Icriel wø tïŋŋö, ni tïïge ki twëëre thuwø ki køør dwøre. 'Ba kany wø poot pöölö ni ena bäät oduŋkaara, ge wø bëëdö yi twïër.

¹⁹Këël mano ruu pöölö bäät oduŋkaara ki nïne mo thööth, jø Icriel dwør Wuuö Jwøk wø gwøkge gwøø, ni ge ba tïŋŋi.

²⁰Ni näk pöölö bëëdö bäät oduŋkaara ki nïne mo nøk, ge wø bëëdö yi twïër ki køør dwør Wuuö Jwøk. Køøre ki køør dwør Wuuö Jwøk ge wø tïŋŋö.

²¹Ki kwör møøk pöölö cuŋŋö ka abøøya ni put bëëtö këël amöölla; 'ba kany wø ö pöölö wø ö maal ka amöölla, ge wø tïŋŋö. Këël pöölö ö maal ki waŋcäŋ wala dï wäär, ge wø tïŋŋö.

²²Ni näk pöölö bëëdö bäät oduŋkaara ki nïne ariiø, wala dwääy aciel, wala beeta kany mo yie bäär, jø Icriel wø bëëdö thuwø yi twïër marge, ni ge ba tïŋŋi; 'ba kany wø ö maal, ge wø tïŋŋö.

²³Ki køør dwør Wuuö Jwøk ge wø tïïö ki twëëre, ni tïŋge thuwø ki køør dwør Wuuö Jwøk. Geni dwør Wuuö Jwøk agwøkge kaawat mana ö Wuuö Jwøki na kööm geni ki ri Modhe.