Read anuak Mikiya 1 Bible Online

Mikiya 1 - anuak bible

Mikiya 1

¹Man beeye dwør Wuuö Jwøk mana ö bäät Mikiya nyï Mörëcëth yïth nïra beet Jöthammi, ki Eeyeth, ki Edhekaya ni gena nyec Juuda, ni beeye luubö mana joode kiper Cameria ki Jerucalem.

²Ena köö, ni «Wui, u na jiy bëët, wïnynyu gïn; wui, piny ki gïïa en yie bëët, cegu ïthu; Kwäärö Wuuö Jwøk mare caane caanø dëëtu ni eni ena kar bëëtö mare na en kur keere.

³Kiper ka adïëri møn, Wuuö Jwøk öö ki kar bëëtö mare, ni eni ööa piny ni nyør kwöra bäyö bäät piny.

⁴Ni ö kïte kwöra nyøre ni leenyge kaawat man wø leeny gage ki maac, ni løøcge piny ki yïth agäm-kïte kaawat man wø løøc pïïyi piny ki kany mo ree ee lääŋö.

⁵Gïïögø bëët tägö kiper bääyö mar nyïïkwaac Jeekap, ni täkge kiper raay moa tïïcge, ge na jø Icriel. ?Aŋø, bääyö mar nyïïkwaac Jeekap ba täga Cameria? ?A kwör lam moa en bäät thuuri po jø Juuda, ba täga Jerucalem?

⁶«Kiper manøgønø, aani, Cameria oraanynya ni neeruuth, ni tïme na pwödhö kany piith omøki yie. Ni leeŋa kïte moe piny ya agäm-kïdi, ni ëëla tiet uudi moe wøk.

⁷Gïï wø lam yie bëët di tøyø na thäŋi, ni ö gïïa joot bëët ki køør tïï käp yi øt jwøe ni waaŋi ki maac, ni ö gïïa no otieŋø yie bëët ni wø lam ni raanynya geni, kiper gïïögø tïïc ka jap wø joot ki ri käp, ni gïïögø beege ni wø cäŋ wïth juurre tïïö ki jap käp ki ge.»

⁸'Ba kiper gïïögø, a na Mikiya, a jwöŋö ni gööa ko oduuru, ni bëëda naa cäädhi ki thäny tieta, ni dëëra bäŋ abïï, ni jwöŋa kaamar othöö, ni jwöŋa kaamar tula.

⁹Kiper ränynyö mar Cameria caala atwøda mo ba caŋŋi, ni ränynyö manøgø kare onø cäännö ki man pïïe Juuda, këël dhi kiir mar jiya mar Jerucalem.

¹⁰Uuni, kanyo täk ränynyö maru, kär nou caana gø yi Gëth jï nyïïmän, ni kär nou jwöŋu. U na jø Bëëth-Lëapara, dëëtu oŋeellu ki yi tør.

¹¹U ni wø bëëdö Capir, uuno mak ki tøŋ ni käl uuni nou cäädhi ka dëëtu ni bëët wïthu ni laay. Ni u ni wø bëëdö Dhaanan, u ba bøth. Jø Bëëth-Idhel geno bëëdö ni ge kïmmö, ni ba jïtu ki køny baŋge.

¹²Jø wø bëëdö Maröth geno bëëdö ni cwïnyge pärö kanyo bëëtge ni ge koora gïn mo beer. Kiper gïn mo leth anø öö ki baŋ Wuuö Jwøk, ni nø tïm kare ni cään ki dhi kiir Jerucalem.

¹³U ni wø bëëdö Lakic, twöu jïëth leny dëët okwëënyi ni reŋu! U na jø Lakic, bee u na täk raay dïkwøŋ jï jø Dhayan[1] kiper gïïa bac jø Icrielli ajoot baŋu.

¹⁴'Ba u na jø Juuda, jø Mörëcëth-Gëth omääthu, ni kööu, ni «Turu nø.» Jø pääny Akdhip geno tïmö na jø cwøk jï nyec Icriel.

¹⁵Maya thuwø, u jø Marëca, aani, a känna baŋu ki jiy mo maya pou, ni ö dïbwöthe moa døøŋŋø mo jø Icriel ni kange rege yi øt kïdi mana en ya Adulam.

¹⁶U na jø Juuda, gwääru wïthu wøk ni dööŋge no otal, kiper obwöre mou na mëërru ki geni okäl. Uuni gwääru wïthu wøk bäre ni dööŋge kaamar wïth acudhi, kiper obwöre mou di maaø baŋu ki tøŋ ni aacge.