Read anuak Mikiya 3 Bible Online

Mikiya 3 - anuak bible

Mikiya 3

¹'Ba aana köö, ni «U na dïbwöthe mo nyïïkwaac Jeekap, ki u na kwääri moge, ge na jø Icriel, ennø, wïnynyu gïn. ?Aŋø, paa u na doo ŋäc ŋøl ma adïëri?

²Bee u ni wø män ki gïna beer ni mëërru ki gïna raac. Gïna raac ni wø tïïyu, keda u gøøpa dëët jiy, ni kee u käla rïk dëëtge wøk;

³ni bëët keda u cama dëët jiya, ni gøøpu dëëtge, ni tøyu cuu moge, ni ŋøru geni kaamar cuu mo kïtha yi dak, kaamar rïŋö mo kïtha yi dhiithi.»

⁴'Ba da kany mo öö mou jwöŋö dëër Wuuö Jwøk, ni ö eni ni ba løk maru jïïu. 'Ba kar kaace, eni täärnyïme okane ki uuni kiper gïïa tïïyu na reyø.

⁵'Ba man beeye mana caan Wuuö Jwøki kiper nyïïkuk Jwøk mo wø køp luup ki wïthge, ni wø bwøth jiya nee gaage wøk, ena köö, ni «Kany wø näk da jiy mo tiet lakge di lëëŋŋö ki gïn mo nyamge, ge wø puta tïmö ni ge køpa luum bëët-mëër jïge. 'Ba ni näk da jiy mo dhøkge kär mooø ki cam, ge wø puta tïmö ni ge køpa luum leny jïge.

⁶Kiper manøgønø, da wäär mo öö kiperge mo bäŋ luup lääk mo ö bäätge, ni ö muudhe mo cøl ni neejïïm bäätge ni bäŋ luup adïëda mo køpge. Cäŋ opädhi bäät nyïïkuk Jwøk moøgø, ni ö dïcäŋŋi ni tïme na muudhö mo cøl bäätge.

⁷Jø wø køp gïï mo ena nyïm, wïthge olääi, ni ö jø wø køp luup adïëda ni tïm nyeŋge ni law. Geni, ge bëët täärnyïmge ouumge ki lään wïc, kiper mano ö Jwøki noo ba løk marge.»

⁸'Ba aani, dëëra päŋ ki teek, ki Jwïëc Wuuö Jwøk, ki ŋøl ma kare, ni cwïnya da cer, ki man caana gïïa bac nyïïkwaac Jeekapi jïge, ki raay moge, ge na jø Icriel.

⁹'Ba ennø, wïnynyu gïn, u na dïbwöthe mo nyïïkwaac Jeekap, ki u na kwääri moge, ge na jø Icriel, u ni yïthu reyø ki luum ŋøl mana näk adïëri, ni wø meen luubö mo tiir,

¹⁰u ni wø geer Dhayan na näk pääny Jwøk ki jap jiy mo wø rem moge kønynyu piny, ni beeye Jerucalem ni wø geerru ki køør tïïc gïï mo reyø.

¹¹U na dïbwöthe mo päänyögø, luup wø ŋøllu ka køør gïï wø cïp jïïu ki piny, ni ö dïlämme moe ni pwönyge jiy ki ciik ni ge di cunnö ki jammi, ni ö nyïïkuk Jwøki moe ni køpge luup adïëda kany wø mooc geni ki gwel. 'Ba ge wø poot köö ni dëëtge ege jääŋö dëër Wuuö Jwøk, ni ge köö, na «?Aŋø, Wuuö Jwøk ba bëëdö ni nut yïthakicwa? Bäŋ gïn mo leth mo ö bäätwa.»

¹²Kiper manøgønø, Dhayan na näk Jerucalem oränynyi ni neeruuth, ni puuri na pwöth jaak ki køøru, ni ö thuurri mana näk Øt Jwøk ogeer bääte ni tuue ka abuŋŋe.