Read anuak Mikiya 4 Bible Online

Mikiya 4 - anuak bible

Mikiya 4

¹'Ba kanyo tïme na aŋuun nïne, kïdi mana en Øt Wuuö Jwøki bääte okëël piny ni teek, ni tïme na wïth kïte. Eno tïŋ maal ni kaala thuuri, ni ö wïth juurre ni rwäthge bääte.

²'Ba wïth juurre mo thööth öö ni köge, ni «Ööu, owaa cøø bäät Kïn Wuuö Jwøk, yi Øt Jwø Jeekap, kiper nee ø pwönynye ki jööre, nee ø cäädhø øtjööre.» Kiper luum ciik Jwøk wø caan ka yi Dhayan, ni beeye Jerucalem ni wø ö luup Wuuö Jwøki ki yie.

³'Ba eni luup ŋøle ŋølø yïthakic wïth juurre, ni ö wïth juurre moa teek ni dwøk ge kanya ciel, këël moa kwörge bäyö. Ni ö geni ni thääthge opëëlle moge na jap puur, ni thääthge tøøŋi moge na jap goor wïth jenni ki ge, ni bäŋe wï jur mo kwany tøŋ ki wï jur mør, ni ge ba pwönynyi këët ki leny.

⁴'Ba ŋati man nø otïmö ni bëëdö tier jaath omøk mare ki tier olaam mare ni yie met jaak, ni bäŋ ŋat mo wëëk geni lwär; kiper Wuuö Jwøk, eni na wïth jammi bëët, bee eni na caan luummögø ki dhee kiree.

⁵'Ba këël na bëët wïth juurre bëët ni ŋati man nø cäädhi ka nyeŋ jwøe, øøni, ø bëëdö ni ø cäädhi ka nyeŋ Wuuö Jwøk na bäre bäre, eni na Jwøk marø.

⁶'Ba mana caan Wuuö Jwøki beeye en, ena köö, ni «Noo tïme na dïcäŋece, aani, ŋööte cooŋa kanya ciel, ni lema jiy moa no ojarø, ki moa näk bäätge yaa kïthö ki gïï mo leth.

⁷Aani, ŋööte ki jiy moa no ojarø tïïa tïïö na mo dööŋ, ni tïïa geni na wï jur mo teek. Ni ööa, a na Wuuö Jwøk, ni käära geni ni aana nyeya marge bäät Kïn Dhayan, ki mano täge kar kaace nø, këël bäre bäre.

⁸Wui Dhayan, ï na thuur man wø ö Jwøki ni wø neet jiye ki yie, na caal pïïth dïëk, ï na thuur mar jø Dhayan, bëët käär jiy mana dïkwøŋ cäŋ ka duu kare jïrï, ni beeye käädö mar nyec noo dwøk kare yi pääny Jerucalem.

⁹«?'Ba ennø, aperŋø ni gööï ko oduuru ni dwørï ena maal, ni baŋŋï kaamar dhaagø mo ogøøc mäc lwaarri en? ?Aŋø, beeye kiper mana bäŋe nyeya jïrï? ?A ŋat wø cïpi ki pwöc jïrï athøw?

¹⁰Wui jø Dhayan, uuno baŋŋi ni rämu kaamar dhaagø mo ogøøc mäc lwaarri, kiper ennø, u dønynya wøk ki yi pääny ni u mak ki tøŋ, ni bëëdu kwör mo uuno nicweeŋŋa wøk jaak. Uuni, u cøøa Babiløn, 'ba a na Wuuö Jwøk, uuno piema ceŋ nyïïmän mou kunece.

¹¹'Ba ennø, u na jø Dhayan, wïth juurre mo thööth dëëtge adwalge na aciel kiperu, ni köge, ni ‹Dhayan ränynyö; ni neetø ränynyö mare ki nyeŋŋø.›

¹²'Ba geni, gïna nø caara, a na Wuuö Jwøk, kucge, ni gïïo tïïa, tiere kär ci cwïnyge. Aani gena cooŋa kanya ciel kaawat man wø cooŋ ŋaaŋe yi laara, ni gïnögø tïïa naa jääla geni.

¹³Wui jø Dhayan, ööu maal ni nyøru geni kaawat man wø ö dhäki wø dïnge beel; kiper u mooa mooø ki teek mo caala teek nywïënyö, ni tïïa tietu ni teek kaamar nywïënyö ma jwïël, ni nyathu wïth juurre na thäŋi.» 'Ba uuni, gïïa jootge bëët ki jöö mo patha kare, ni beege jap kwärö moge, ocïpu jï Wuuö Jwøk, eni na Kwäärö mar bäät piny bäre.