Read anuak Mikiya 5 Bible Online

Mikiya 5 - anuak bible

Mikiya 5

¹'Ba ennø, u na jø Dhayan, pääŋŋu rou na dhøgi mo leny. Nyïïmän øøna nø cielge dïër. Nyeya mano ŋøl luup jø Icriel agøøcge ki thøra ki thääŋŋe.

²'Ba Wuuö Jwøk aköö, ni «Ï na Bethelem na en Eeparata, këël na bëëdï ni thiinhnha ïïni dï mïëc tuuŋ Juuda, ŋato käär jø Icriel othïïŋa kiper tïïc mara, ni eni ööi ki riï; ni öö mare käla ya acääŋŋe cøøn yïth nïra dïkwøŋ.»

³'Ba kiper manøgønø, Wuuö Jwøk jiye cïbe ceŋ nyïïmän, këël kanyo ö nyakøøe noo jït dëëre ki mäc noo lwaare ki nyilaal. Køøre thäk jø poge moa mak ki tøŋ na dööŋ oduui, ni dwätge ki jø poge ma jø Icriel.

⁴'Ba eno ö maal ni kwaac jiye kaamar pïïth dïëk, ni kwaaye ki nyeŋ Wuuö Jwøk na dwøŋ, Jwøk mare, ki teek mo käla baŋ Wuuö Jwøk. Ni ö geni ni bëëtge ni geno nikwak, kiper ki mano täge kar kaace nø, eni bëëdö ni dwøŋŋa eni, këël cuŋ piny bäre,

⁵ni bee eni noo käl bëët-mëër. 'Ba kanyo ö jø Aciria noo öge yi ŋöömö marø, noo nyøønge paan dwøŋ ki tietge, øøni, ø puta jääk baŋge ki dïbwöthe moa teek mo leny.

⁶Ni ö geni ni käärge jø wø en yi ŋööm Aciria ki dho opëëllö, ni beeye ŋööm Namrut noo käärge no opëëlle moge ege wöth wøk. 'Ba eni ø pieme piemø ceŋ jø Aciria, kanyo öge noo tukge ŋöömö marø, noo nyøønge ŋöömö marø.

⁷'Ba nyïïkwaac Jeekap moo dööŋ, geno bëëdö yïthakic wïth juurre mo thööth, ni ge caala thööy man wø cïp Wuuö Jwøki bäät beel. Ni bëëtge kaamar kuunhnhi mo jwøya beel, ni pädhö marge wala bäŋ pädhö marge ba koor man wø caan jiyi.

⁸Nyïïkwaac Jeekap moo dööŋ, geno bëëdö yïthakic wïth juurre, ni beeye wïth juurre mo thööth, ni ge caala ŋuu mo ena dï lääc paap, ni bëëtge kaamar nyi ŋuu mo ö dï pïïth dïëk, ni päär bäätge ni jeec ge, ni bäŋ ŋat mo maar lønyø jïre ki man køny geni.

⁹U na jø Icriel, nyïïmän mou oböötu, ni dïïrru wïthge bëët.

¹⁰'Ba mana caan Wuuö Jwøki beeye en, ena köö, ni «Noo tïme na dïcäŋece, aani okwëënyi mou moa en dïïu, wïthge dïïra dïïrö, ni raanynya jïëth leny mou mo wø tut okwëënyi.

¹¹Aani thuwø, päänye moa en yi ŋöömö maru raanynya raanynyø, ni ö kwör gwøk røki mou moa teek ni nyaa ge piny.

¹²Aani, ajuuk moø ni en dïïu yøø wïthge dïïra dïïrö, ni tïme ni bäŋ jiy mo thöödhö ki war dïïu këët.

¹³Aani, gïïa näk you tieŋø na gïï lam raanynya raanynyø, ni raanynya kïte moa näk you cwöth piny na gïï lam, kiper nee cøŋŋu ba këëllu piny këët nyïm gïïa tïïyu ki ceŋŋu.

¹⁴Aani, jenni mo wø lammu na no ocwöth piny ni wø cøøri na Acare pudha wøk, ni raanynya päänye mou.

¹⁵'Ba aani, ki køør wëër mara na dwøŋ, wïth juurre moo ba wïny mara, marge dwøga dëëtge.»