Read anuak Mikiya 6 Bible Online

Mikiya 6 - anuak bible

Mikiya 6

¹Ennø, wïnynyu gïno caan Wuuö Jwøki dëëtu, u na jø Icriel, ena köö, «Ööu maal ni caannu maru ni nëënö jï kïte, ni dwøl maru wïnyö jï thuuri.

²Wui kïte, u na nut cøøn, wïnynyu luum løøk mar Wuuö Jwøk, kiper Wuuö Jwøk jïre da løøk ki jiye, ni beege jø Icriel noo cääne ki geni.

³«?Wui jiya, agïnaŋø na tïïa dëëtu? ?Na agïnaŋø na ööla uuni ki gø? Beerra man løgu gø jïra.

⁴Ka adïëri møn, ya acääŋŋe uuna käla wøk ki Ijep, ni piema uuni ni päda uuni yi bëët laŋ, ni cööra Modhe nyïmmu, eni ka Aran ki Mariyam.

⁵U na jiya, ennø, beerra man parru wïthu ki luum gïna caar Balaki nyeny Möap nee tïïe dëëtu ki ri Beelam, ki gïna dwøk Beelammi o Beeyör ni eni kwiera mar Balak. Parru wïthu ki gïïa tägö kanya tïŋŋu Cëthim nou cøøa Gëlgela, kiper nee tïïe mo Wuuö Jwøk na beyø na tïïe nee ŋäyu.»

⁶?Aani, aano cøøa nyïm Wuuö Jwøk ki ŋø, ni cøŋŋa yaa këël piny nyïme, eni na Jwøk ni en maal? ?Løny ki man cøøa nyïme naa käära olämme mo wø waaŋ bäre, ki nyïïrøøe mo cwiicge oceele mo pulli?

⁷?Aŋø, løny jï Wuuö Jwøk ki man mïn yie ki nyöök rööm ma kume mo cïp no olämme, ki maaw mo caala pï näm mo thööth døc mo ba kwaan? ?Këël kanynya kiree, rømø ki man cïba gø no olämi kiper gïïa baaa? ?Eni na nyi yia, rømø ki man cïba gø kiper raay mo dëëra?

⁸Wui ï na dhaanhø, Wuuö Jwøk gïna beer anyoodhe jïrï. ?'Ba Wuuö Jwøk agïnaŋø ni manynye baŋï? Beeye ki man ŋølï luup na karge, ki man nyoothï mëër man wø ba jøøl, ki man cäädhï ki Jwøk marï ni riï iï dwøk piny.

⁹Wui tuuŋ Juuda, ki jø wø käär pääny Jerucalem, wïnynyu gïn. Dwør Wuuö Jwøk cwödö dï pääny, ni köö, ni «Leec wïc beeye ki man lwäär nyeŋ Wuuö Jwøk.

¹⁰?Aŋø, jammi mo wø joot ki jöö mo patha kare yïth uut jøøa reyø, ki jïge ni kuua, ki jap røm moa näk oŋøørø ni cëëgö, na näk ec raac ki ge?

¹¹?Aŋø, løny ki man wëënna jiy mo gïr røm marge ba ŋääth, ni gïïge mo wø nyooth peek gïrpiny paa kare?

¹²Jiy moa no okwär dï pääny, yïthge päŋ ki tïïc gïï mo reyø, ni jø wø bëëdö yi pääny manøgø, ge cara tööt, ni lëëpge cara luup cwøk.

¹³Kiper manøgønø, aani u wëëga täw mo leth ni raanynya uuni, ni ränynyu ki køør raay mou.

¹⁴Uuni, uuno cämö, 'ba u ba jäŋ, ni bëët yïthu ni poot ŋaam. Jammi mou odaaŋŋu nou kaanna geni, 'ba bäŋgø mo bøth, ni jammi moo kaannu cïba dhi tøŋ.

¹⁵Uuni, uuno pïïdhö, 'ba ba kayu. Ni wellu nyïïjaath man wø nyïïe wel na maaw, 'ba dëëtu ba wïïrru ki gø. Nyïïomøki obiiyu na køøŋø, 'ba køøŋŋe ba maathu.

¹⁶Kiper u bëëdö nou gwøga kööŋŋe mo nyeya ma Ømri, ki gïïa tïïc wääde bëët ma Akap ki jøøa käl dëëre, ni bëëdu nou caatha køør acaare moge. Kiper manøgønø, aani, u cïba cïbö jï ränynyö; u ni wø bëëdö päänyögø, u tïïa tïïö na gïr abuua, ni bëëdu, u na jiya, nou käära ajøøŋ yi piny bäre.»